Next Test Captain: టెస్ట్ కెప్టెన్సీ కోసం భారీ స్కెచ్ ఏసిన ప్రిన్స్! ఇప్పటినుండే ఆ ఇద్దరిని సంప్రదించిన గిల్
టెస్ట్ కెప్టెన్సీ బాధ్యతలను శుభ్మాన్ గిల్కు అప్పగించేందుకు బీసీసీఐ సన్నాహాలు చేస్తున్నట్లు సమాచారం. ఈ మేరకు గిల్ ఇప్పటికే అజిత్ అగార్కర్, గౌతమ్ గంభీర్లను కలిసి భవిష్యత్ ప్రణాళికలపై చర్చించాడు. మే 23 లేదా 24న అధికారికంగా గిల్ పేరు ప్రకటించే అవకాశం ఉంది. మరోవైపు, విరాట్ కోహ్లీ రిటైర్మెంట్ అంశంపై కూడా బీసీసీఐ చర్చలు జరుపుతోంది.
భారత టెస్ట్ క్రికెట్కు సంబంధించి కీలక పరిణామాలు చోటు చేసుకుంటున్న ఈ సమయంలో, యువ బ్యాట్స్మన్ శుభ్మాన్ గిల్ను భారత తదుపరి టెస్ట్ కెప్టెన్గా నియమించే దిశగా బీసీసీఐ ముందడుగు వేసినట్లు తాజా నివేదికలు సూచిస్తున్నాయి. ఇటీవల టెస్ట్ క్రికెట్కు రోహిత్ శర్మ రిటైర్మెంట్ ప్రకటించడంతో, కొత్త నాయకత్వ బాధ్యతల కోసం చర్చలు జరుగుతున్న వేళ గిల్ పేరు మొదటిగా వినిపిస్తోంది.
ఇదే సందర్భంలో గిల్ బీసీసీఐ చైర్మన్ ఆఫ్ సెలెక్టర్స్ అజిత్ అగార్కర్, ప్రస్తుత భారత ప్రధాన కోచ్ గౌతమ్ గంభీర్లను వ్యక్తిగతంగా కలసి భవిష్యత్ ప్రణాళికలపై చర్చించినట్లు సమాచారం. దైనిక్ జాగరణ్లో వచ్చిన సమాచారం ప్రకారం, మే 23 లేదా 24న జరగనున్న విలేకరుల సమావేశం ద్వారా బీసీసీఐ గిల్ను అధికారికంగా భారత టెస్ట్ కెప్టెన్గా ప్రకటించనుంది. 25 ఏళ్ల గిల్ ఇప్పటికే భారత్ తరఫున 32 టెస్టులు ఆడి, 35.06 సగటుతో 1893 పరుగులు సాధించడమే కాకుండా, ఐదు శతకాలు సాధించి తన సామర్థ్యాన్ని నిరూపించాడు. అజింక్య రహానే మరియు చతేశ్వర్ పుజారా వంటి అనుభవజ్ఞుల ప్రస్థానం ముగిసిన తర్వాత, గిల్ భారత టెస్ట్ లైనప్లో కీలక స్థానాన్ని దక్కించుకున్నాడు.
ఇదిలా ఉండగా, టెస్ట్ వైస్ కెప్టెన్గా రిషబ్ పంత్ను ఎంపిక చేసే అవకాశాలు ఉన్నట్లు తెలుస్తోంది. మరోవైపు, టీమ్ఇండియా ప్రధాన పేసర్ జస్ప్రీత్ బుమ్రాపై ఇప్పటికే వర్క్ లోడ్ ఎక్కువగా ఉన్నందున, అదనపు నాయకత్వ బాధ్యతలు అతనిపై మోపకుండా, గిల్-పంత్ నేతృత్వంపై బీసీసీఐ దృష్టి కేంద్రీకరించనుంది. ఈ క్రమంలో భారత జట్టు ఎంపిక కూడా త్వరలోనే జరగనుంది. మరోవైపు, టెస్ట్ క్రికెట్కు రిటైర్మెంట్ తీసుకోవాలని భావిస్తున్న విరాట్ కోహ్లీతో కూడా బీసీసీఐ చర్చలు జరుపుతోందని సమాచారం. ఇంగ్లండ్తో జరగబోయే కీలక సిరీస్ దృష్టిలో ఉంచుకుని, అతని అనుభవాన్ని ఉపయోగించుకునే ఉద్దేశంతో ఈ చర్చలు కొనసాగుతున్నాయి. కానీ కోహ్లీ రిటైర్ అయితే, భారత బ్యాటింగ్ లైనప్ అనుభవ రాహిత్యంతో బరిలోకి దిగాల్సి వస్తుంది, ఇది యువ ఆటగాళ్లకు సవాలుతో కూడిన అవకాశం కావచ్చు. వీలైనంత త్వరగా కొత్త నాయకత్వానికి బాధ్యతలు అప్పగించాలన్న ఉద్దేశంతో బీసీసీఐ అన్ని దశలను వేగంగా పూర్తిచేస్తున్నట్లు తెలుస్తోంది.
మరిన్ని క్రికెట్ వార్తల కోసం ఇక్కడ క్లిక్ చేయండి..