Sakib Hussain : ఆర్మీలోకి వెళ్లాలనుకుని ఐపీఎల్ స్టార్‌గా.. తల్లి నగలు అమ్మి కొన్న షూస్‌తో చరిత్ర.. ఎవరీ సాకిబ్ హుస్సేన్ ?

Sakib Hussain

Sakib Hussain : ఐపీఎల్ 2026 సీజన్‌లో సన్‌రైజర్స్ హైదరాబాద్ (SRH) కనుగొన్న మరో అద్భుత ఆణిముత్యం సాకిబ్ హుస్సేన్. బీహార్‌లోని గోపాల్‌గంజ్ నుంచి వచ్చిన ఈ 21 ఏళ్ల యువ వేగశౌరి, తన అరంగేట్రం మ్యాచ్‌లోనే రాజస్థాన్ రాయల్స్ బ్యాటర్ల వెన్నులో వణుకు పుట్టించాడు. కేవలం 30 లక్షల బేస్ ప్రైస్‌తో జట్టులోకి వచ్చిన సాకిబ్, తన తొలి మ్యాచ్‌లోనే 4 వికెట్లు తీసి భారత రికార్డును సమం చేశాడు. దేశం కోసం సరిహద్దుల్లో రైఫిల్ పట్టుకోవాలనుకున్న ఈ కుర్రాడు, ఇప్పుడు తన బంతితో మైదానంలో వికెట్లను కూలుస్తున్నాడు.

అరంగేట్రంలోనే రికార్డుల వేట

ఏప్రిల్ 13న హైదరాబాద్‌లోని ఉప్పల్ మైదానంలో రాజస్థాన్ రాయల్స్‌తో జరిగిన మ్యాచ్‌లో సాకిబ్ హుస్సేన్ అద్భుతమైన బౌలింగ్ గణాంకాలను నమోదు చేశాడు. తన 4 ఓవర్ల కోటాలో కేవలం 24 పరుగులు మాత్రమే ఇచ్చి 4 కీలక వికెట్లు పడగొట్టాడు. తద్వారా ఐపీఎల్ అరంగేట్రంలో అత్యుత్తమ ప్రదర్శన చేసిన భారత ఆటగాడిగా ముంబై ఇండియన్స్ బౌలర్ అశ్విని కుమార్ పేరిట ఉన్న రికార్డును సాకిబ్ సమం చేశాడు. రాజస్థాన్ లాంటి పటిష్టమైన బ్యాటింగ్ లైనప్‌ను కకావికలం చేసి, సన్‌రైజర్స్‌కు ఘనవిజయాన్ని అందించాడు.

సైనికుడు కావాలనుకుని.. క్రికెటర్‌గా మారి

సాకిబ్ హుస్సేన్ చిన్నప్పటి కల భారత సైన్యంలో చేరడం. దేశం కోసం సరిహద్దుల్లో రైఫిల్ పట్టుకుని పోరాడాలని కంకణం కట్టుకున్నాడు. కానీ విధి మరోలా ఉంది. క్రీడల పట్ల ఉన్న ఆసక్తి అతడిని క్రికెట్ వైపు మళ్లించింది. ఆర్థిక ఇబ్బందులు ఉన్నా, తండ్రి అనారోగ్యంతో వ్యవసాయం మానేసినా సాకిబ్ వెనకడుగు వేయలేదు. ఇంట్లో తినడానికి తిండి లేని పరిస్థితుల్లో కూడా క్రికెట్ ఆడాలనే తన పట్టుదలను చూసి, అతడి తల్లి తన ఒంటిపై ఉన్న నగలను అమ్మి సాకిబ్‌కు క్రికెట్ షూస్ కొనిచ్చింది. ఆ కష్టానికి ప్రతిఫలమే నేడు ఐపీఎల్ వేదికపై అతను అందుకుంటున్న నీరాజనాలు.

సాకిబ్ బౌలింగ్‌లో స్పెషాలిటీ ఏంటి?

సాకిబ్ కేవలం వేగంతోనే కాకుండా తన స్లోయర్ బంతులతో బ్యాటర్లను బోల్తా కొట్టించడంలో దిట్ట. గంటకు 140 కిలోమీటర్ల పైగా వేగంతో బంతులు వేస్తూనే, అకస్మాత్తుగా వేగాన్ని తగ్గించి బ్యాటర్ల టైమింగ్‌ను దెబ్బతీస్తాడు. రాజస్థాన్ మ్యాచ్‌లో డోనోవన్ ఫెరీరాను తన స్లోయర్ బంతితోనే అవుట్ చేసి అందరినీ ఆశ్చర్యపరిచాడు. ఇప్పటివరకు 13 టీ20 మ్యాచ్‌లు ఆడిన సాకిబ్ మొత్తం 14 వికెట్లు తీశాడు. తన ప్రతిభను గుర్తించిన సన్‌రైజర్స్ యాజమాన్యం అతడిని 30 లక్షల రూపాయలకు కొనుగోలు చేసింది. ఇప్పుడు ఆ నమ్మకాన్ని సాకిబ్ వంద శాతం నిలబెట్టుకున్నాడు.

మరిన్ని క్రీడా వార్తల కోసం ఇక్కడ క్లిక్ చేయండి..