ఇది కదా ట్విస్ట్ అంటే.. SRH గెలిస్తే ప్లేఆఫ్స్కు 2 జట్లు.. కాటేరమ్మ కొడుకులతో అట్లుంటది మరి..!
CSK vs SRH IPL 2026 Playoffs Scenario: సోమవారం రాత్రి 7:30 గంటలకు ప్రారంభం కానున్న ఈ మ్యాచ్ ఐపీఎల్ 2026 లోనే అత్యంత ఆసక్తికరమైన పోరుగా నిలవనుంది. హోమ్ గ్రౌండ్ సెంటిమెంట్తో చెన్నై విజృంభిస్తుందా, లేక పాట్ కమిన్స్ సారథ్యంలోని హైదరాబాద్ జట్టు చెపాక్ కోటను బద్దలు కొట్టి ప్లేఆఫ్స్ టికెట్ సాధిస్తుందా అనేది మరికొద్ది గంటల్లో తేలిపోనుంది.
CSK vs SRH IPL 2026 Playoffs Scenario: ఐపీఎల్ 2026 సీజన్ లీగ్ దశ ముగింపునకు చేరుకోవడంతో ప్రతి మ్యాచ్ ఇప్పుడు సరికొత్త సమీకరణాలను ముందుకు తెస్తోంది. ప్రస్తుతం ఏ ఒక్క మ్యాచ్లో తేడా వచ్చినా టోర్నమెంట్ నుంచి నిష్క్రమించాల్సి వస్తుంది. ఈ ఉత్కంఠభరిత వాతావరణంలో నేడు చెన్నైలోని ప్రతిష్టాత్మక చేపాక్ స్టేడియం వేదికగా చెన్నై సూపర్ కింగ్స్, సన్రైజర్స్ హైదరాబాద్ జట్ల మధ్య జరగబోయే 63వ లీగ్ మ్యాచ్ లీగ్ భవితవ్యాన్ని తేల్చనుంది. ఈ మ్యాచ్ ఫలితం కేవలం ఈ రెండు జట్లకే కాకుండా పాయింట్ల పట్టికలోని ఇతర జట్ల ప్లేఆఫ్ అవకాశాలను కూడా శాసించబోతుండటం విశేషం.
హైదరాబాద్ గెలిస్తే.. ఒకే దెబ్బకు రెండు పిట్టలు..!
ప్రస్తుత పాయింట్ల పట్టిక ప్రకారం సన్రైజర్స్ హైదరాబాద్ 12 మ్యాచ్లలో 7 విజయాలతో 14 పాయింట్లు సాధించి మూడో స్థానంలో కొనసాగుతోంది. నేటి మ్యాచ్లో గనుక హైదరాబాద్ జట్టు విజయం సాధిస్తే నేరుగా 16 పాయింట్లతో ప్లేఆఫ్స్ బెర్త్ను ఖరారు చేసుకుంటుంది. కేవలం హైదరాబాద్ మాత్రమే కాకుండా, ఈ విజయంతో గుజరాత్ టైటాన్స్ కూడా అధికారికంగా ప్లేఆఫ్స్కు క్వాలిఫై అవుతుంది. ఎందుకంటే గుజరాత్ ఇప్పటికే 13 మ్యాచ్లలో 8 విజయాలతో 16 పాయింట్లు సాధించి రెండో స్థానంలో ఉంది. ఆరెంజ్ ఆర్మీ చేతిలో సిఎస్కె ఓడిపోతే, గుజరాత్ రేసులో సురక్షితమైన స్థానానికి చేరుకుంటుంది.
చెన్నై గెలిస్తే.. బెంగళూరుకు బంపర్ ఆఫర్..
మరోవైపు చెన్నై సూపర్ కింగ్స్ ప్రస్తుతం 12 మ్యాచ్లలో 6 విజయాలతో 12 పాయింట్లతో ఆరో స్థానంలో ఉంది. డిఫెండింగ్ ఛాంపియన్స్కు ఈ మ్యాచ్ అత్యంత కీలకంగా మారింది. ఒకవేళ రుతురాజ్ సేన ఈ మ్యాచ్లో అద్భుత ప్రదర్శన చేసి గెలిస్తే, చెన్నై ప్లేఆఫ్ ఆశలు సజీవంగా ఉంటాయి. అంతేకాకుండా చెన్నై విజయం సాధిస్తే, అప్పటికే క్వాలిఫై అయిన రాయల్ ఛాలెంజర్స్ బెంగళూరు జట్టుకు క్వాలిఫయర్-1 లో ఆడే అవకాశం మరింత సులువవుతుంది. ఒకవేళ ఇక్కడ చెన్నై ఓడిపోతే మాత్రం ప్లేఆఫ్ ప్రయాణం దాదాపు ముగిసినట్లేనని విశ్లేషకులు భావిస్తున్నారు
సిఎస్కెకు జీవన్మరణ సమస్య.. ఎస్ఆర్హెచ్కు మరో అవకాశం..
ఈ పోరు చెన్నై సూపర్ కింగ్స్కు ‘చావో రేవో’ లాంటిది. సొంత మైదానంలో అభిమానుల మధ్య జరుగుతున్న ఈ మ్యాచ్లో ఓడిపోతే సిఎస్కె రేసు నుంచి తప్పుకుంటుంది. తద్వారా మిగిలిన ఒకే ఒక్క స్థానం కోసం పంజాబ్, రాజస్థాన్ జట్ల మధ్య తీవ్ర పోటీ నెలకొంటుంది. అయితే సన్రైజర్స్ హైదరాబాద్కు మాత్రం ఈ మ్యాచ్లో ఓడిపోయినా పెద్దగా ఆందోళన చెందాల్సిన అవసరం లేదు. ఎందుకంటే లీగ్ దశలో మరో మ్యాచ్ మిగిలి ఉంటుంది. అందులో గెలిచినా హైదరాబాద్ టీం ప్లేఆఫ్స్ చేరవచ్చు.
మరిన్ని క్రీడా వార్తల కోసం ఇక్కడ క్లిక్ చేయండి..