T20 World Cup 2026 : ఈ వార్త తెలిస్తే బ్యాటర్లు పార్టీ చేసుకుంటారు.. టీ20 వరల్డ్ కప్ నుంచి డేంజరస్ బౌలర్ అవుట్

T20 World Cup 2026 : టీ20 వరల్డ్ కప్ 2026 సమరానికి అంతా సిద్ధమవుతున్న వేళ, శ్రీలంక క్రికెట్ జట్టుకు ఊహించని షాక్ తగిలింది. ఆ జట్టు స్టార్ పేసర్, వికెట్ టేకింగ్ బౌలర్‌గా పేరు తెచ్చుకున్న ఇషాన్‌ మలింగ గాయం కారణంగా టోర్నీ మొత్తానికి దూరమయ్యాడు. ఇంగ్లాండ్‌తో జరిగిన టీ20 మ్యాచ్‌ సందర్భంగా మలింగ భుజానికి తీవ్రమైన గాయమైంది. దీంతో అతడు కోలుకోవడానికి కనీసం ఆరు వారాల సమయం పడుతుందని వైద్యులు తేల్చి చెప్పారు. ప్రపంచకప్ ముంగిట ఇలా జరగడం లంక జట్టు ఆశలపై నీళ్లు చల్లినట్లయింది.

శ్రీలంక క్రికెట్‌లో ప్రస్తుతం ఇషాన్‌ మలింగ ఒక సంచలనం. కేవలం 24 ఏళ్ల వయసులోనే తన అద్భుతమైన బౌలింగ్‌తో బ్యాటర్లను వణికించాడు. ఇప్పటివరకు 8 టీ20ల్లో 8 వికెట్లు తీసినప్పటికీ, ఐపీఎల్‌లో సన్‌రైజర్స్ హైదరాబాద్ తరపున ఆడిన తీరు అతడిని స్టార్‌ను చేసింది. గత ఐపీఎల్ సీజన్‌లో కేవలం 7 మ్యాచ్‌ల్లోనే 13 వికెట్లు పడగొట్టి అందరి దృష్టిని ఆకర్షించాడు. అలాంటి కీలక బౌలర్ ఇప్పుడు భుజం గాయం వల్ల ఆరు వారాల పాటు ఆటకు దూరం కావడం శ్రీలంకకు పెద్ద లోటు.

ఎవరీ ఇషాన్‌ మలింగ? ఎందుకింత హైప్?

లెజెండరీ బౌలర్ లసిత్ మలింగ పేరును గుర్తుకు తెచ్చేలా ఇతని బౌలింగ్ శైలి ఉంటుంది. అందుకే అభిమానులు ఇతడిని ఎంతో ఇష్టపడతారు. ముఖ్యంగా డెత్ ఓవర్లలో యార్కర్లు వేయడంలో ఇషాన్ దిట్ట. ఐపీఎల్‌లో 31 పరుగులిచ్చి 3 వికెట్లు తీయడం అతని కెరీర్ బెస్ట్ ప్రదర్శనగా ఉంది. టీ20 వరల్డ్ కప్‌లో శ్రీలంకకు ఇతనే ప్రధాన అస్త్రం అని భావించిన తరుణంలో, ఈ గాయం వార్త ఆ జట్టును ఆత్మరక్షణలో పడేసింది.

మలింగ స్థానంలో వచ్చేది ఎవరు?

ఇషాన్‌ మలింగ దూరమవ్వడంతో అతని స్థానాన్ని భర్తీ చేసేందుకు దిల్షాన్ మధుశంక లేదా ప్రమోద్ మదుషన్ పేర్లు ప్రముఖంగా వినిపిస్తున్నాయి. తాజా సమాచారం ప్రకారం, దిల్షాన్ మధుశంక రేసులో ముందున్నాడు. గతంలో గాయాలతో సతమతమైన మధుశంక, ఇప్పుడు పూర్తి ఫిట్‌నెస్‌తో తిరిగి రావడం లంకకు కలిసొచ్చే అంశం. ప్రస్తుతం అతను ఒమన్‌తో జరగబోయే ప్రాక్టీస్ మ్యాచ్ కోసం శ్రీలంక-ఎ జట్టులో చేరాడు. అక్కడ తన ఫామ్ నిరూపించుకుంటే నేరుగా వరల్డ్ కప్ ప్రధాన జట్టులోకి వస్తాడు.

వరల్డ్ కప్ కోసం శ్రీలంక జట్టు (ప్రస్తుతానికి): దసున్ శనక (కెప్టెన్), పథుమ్ నిస్సాంక, కమిల్ మిషార, కుసాల్ మెండిస్, చరిత్ అసలంక, కుసాల్ పెరీరా, కమిందు మెండిస్, జనిత్ లియానగే, పవన్ రత్నాయకే, వనిందు హసరంగ, దునిత్ వెల్లలాగే, మహీశ్ తీక్షణ, దుష్మంత చమీర, మతీషా పతిరానా.

శ్రీలంక ఫిబ్రవరి 1వ తేదీనే తన జట్టును ప్రకటించినప్పటికీ, ఐసీసీ నిబంధనల ప్రకారం గాయపడిన ఆటగాళ్ల స్థానంలో కొత్తవారిని తీసుకునే అవకాశం ఉంది. దసున్ శనక సారథ్యంలో లంక ఈసారి ఎలా రాణిస్తుందో చూడాలి.

మరిన్ని క్రీడా వార్తల కోసం ఇక్కడ క్లిక్ చేయండి..