పుట్టినరోజు నాడే అద్భుతం.. బాక్సింగ్‌లో భారత స్టార్ లవ్లీనా బోర్గోహెయిన్‌‌కు స్వర్ణ పతకం..

ఆసియా క్రీడల్లో భారత క్రీడాకారులు సత్తాచాటుతున్నారు. తాజాగా.. ఆసియా క్రీడల్లో భారత్‌కు మరో స్వర్ణం లభించింది. ఆసియా క్రీడల్లో మహిళల 75 కేజీల విభాగంలో అద్భుతమైన ప్రదర్శనతో బాక్సింగ్ స్వర్ణం గెలుచుకుని, లవ్లీనా బోర్గోహైన్ తన 29వ పుట్టినరోజున తనకు తానే ఒక చక్కటి బహుమతిని ఇచ్చుకుంది. శుక్రవారం నిషియో జిమ్నాసియంలో జరిగిన మహిళల 75 కేజీల విభాగం ఫైనల్ పోరులో చైనాకు చెందిన జియి బావోను ఓడించిన భారత స్టార్ బాక్సర్ లవ్లీనా బోర్గోహైన్.. తన తొలి ఆసియా క్రీడల స్వర్ణాన్ని ఖాతాలో వేసుకుంది.. తద్వారా, దిగ్గజ క్రీడాకారిణి మేరీ కోమ్ తర్వాత ఆసియాడ్ స్వర్ణం గెలిచిన రెండవ భారత మహిళగా నిలిచింది. ఈ విజయంతో, 2014లో మేరీ కోమ్ తర్వాత ఆసియా క్రీడల్లో స్వర్ణ పతకం సాధించిన తొలి మహిళా బాక్సర్‌గా లవ్లీనా నిలిచింది. హోరాహోరీగా సాగిన ఈ పోరులో భారత క్రీడాకారిణి చైనాకు చెందిన జియి బావోను 5-0 తేడాతో ఓడించింది. లోవ్లినా మూడవ రౌండ్‌లో అద్భుతంగా ఆడింది.. వ్యూహాత్మకంగా జియిని తప్పించుకుంటూ, మ్యాచ్‌లో ఆమెకు పునరాగమనం చేసే అవకాశాన్ని లేకుండా చేసింది.

ఆరో స్థానంలో భారత్..

ఈ స్వర్ణంతో భారత్‌ పతకాల సంఖ్య 70కి చేరగా, పతకాల పట్టికలో ఆరో స్థానంలో నిలిచింది. భారత్ ఖాతాలో 12 స్వర్ణాలు, 24 రజతాలు, 34 కాంస్యాలు ఉన్నాయి..

అంతకుముందు కజకిస్తాన్‌కు చెందిన నటాల్యా బోగ్దానోవాను ఓడించి ఫైనల్‌కు ప్రవేశించిన లోవ్లినా, హాంగ్‌జౌలో జరిగిన 2022 ఆసియా క్రీడల్లో తాను సాధించిన రజత పతకాన్ని అధిగమించి, ఈ ఖండాంతర ఈవెంట్‌లో చివరకు స్వర్ణాన్ని దక్కించుకుంది.

28 ఏళ్ల లవ్లీనా బోర్గోహైన్.. ఇప్పటికే ఒలింపిక్ క్రీడలు, ప్రపంచ ఛాంపియన్‌షిప్‌లు, ఆసియా క్రీడలు, ఆసియా ఛాంపియన్‌షిప్‌లలో పతకాలు గెలుచుకోగా, నగోయాలో సాధించిన స్వర్ణం ఆమె కెరీర్‌కు మరో ముఖ్యమైన అధ్యాయాన్ని జోడిస్తుంది.

లోవ్లినా బోర్గోహైన్ ఎవరు?

భారత స్టార్ బాక్సర్ లవ్లీనా బోర్గోహైన్.. అస్సాంలోని గోలాఘాట్ జిల్లాలోని బరోముఖియా గ్రామానికి చెందినది.. 1997 అక్టోబర్ 2న జన్మించిన ఆమె, మొదట తన కవల సోదరీమణులను అనుసరించి కిక్‌బాక్సింగ్‌లోకి ప్రవేశించింది. అయితే, స్పోర్ట్స్ అథారిటీ ఆఫ్ ఇండియా ఆమె పాఠశాలలో నిర్వహించిన ట్రయల్స్‌లో గుర్తించడంతో 2012లో బాక్సింగ్‌లోకి అడుగుపెట్టింది.