Ganesh Chaturthi: గణేశుడికి మోదకాలు కాదు.. బబుల్ టీ నైవేద్యం! థాయ్లాండ్లో వింత సంప్రదాయం వైరల్
Bubble Tea For Ganesha Temple in Thailand: బ్యాంకాక్లో గణేశుడికి మోదకాలు, లడ్డూలకు బదులుగా బబుల్ టీని నైవేద్యంగా సమర్పిస్తున్న ఆసక్తికరమైన సంప్రదాయం సోషల్ మీడియాలో వైరల్గా మారింది. కోరికలు నెరవేరిన తర్వాత భక్తులు మరిన్ని బబుల్ టీ కప్పులను సమర్పిస్తారనే స్థానిక నమ్మకం గురించి తెలుసుకుందాం.
Updated on: Sep 19, 2026 | 2:57 PM
Bubble Tea For Ganesha Temple in Bangkok: ఈ ఏడాది గణేష్ ఉత్సవాలు సెప్టెంబర్ 14, సోమవారం ప్రారంభమై.. సెప్టెంబర్ 25న అనంత చతుర్దశి సందర్భంగా గణపతి విసర్జనతో ముగియనున్నాయి. విఘ్నాలను తొలగించే దేవుడిగా, ఏ శుభకార్యానికైనా ముందుగా పూజించాల్సిన దైవంగా గణేశుడిని భక్తులు కొలుస్తారు. గణేష్ ఉత్సవాల్లో భాగంగా ఇళ్లలో, పండాళ్లలో గణపతిని ప్రతిష్ఠించి ప్రత్యేక పూజలు నిర్వహిస్తారు. మోదకాలు, లడ్డూలు, దూర్వా వంటి వాటిని నైవేద్యంగా సమర్పించడం ఆనవాయితీ.
అయితే.. గణేశుడికి సమర్పించే నైవేద్యం ప్రాంతాన్నిబట్టి మారుతుంటుంది. భారతదేశంలో మోదకాలు, లడ్డూలు వంటి సంప్రదాయ ప్రసాదాలకు ప్రత్యేక స్థానం ఉండగా.. థాయ్లాండ్ రాజధాని బ్యాంకాక్లో మాత్రం గణేశుడికి బబుల్ టీని నైవేద్యంగా సమర్పించే ఒక ఆసక్తికరమైన స్థానిక ఆచారం కనిపిస్తోంది. ప్రస్తుతం ఈ ప్రత్యేక పూజా విధానానికి సంబంధించిన వీడియో సోషల్ మీడియాలో వైరల్గా మారింది.
గణేశుడికి బబుల్ టీ నైవేద్యం
బ్యాంకాక్లోని యూనియన్ మాల్ వెలుపల ఉన్న గణేశ ఆలయం వద్ద భక్తులు బబుల్ టీ, అంటే బోబా మిల్క్ టీ కప్పులను గణేశుడికి సమర్పిస్తున్న దృశ్యాలు కనిపించాయి. బ్యాంకాక్కు చెందిన కంటెంట్ క్రియేటర్ పియా పింగ్ ఈ సంప్రదాయానికి సంబంధించిన వీడియోను ఇన్స్టాగ్రామ్లో షేర్ చేశారు. అందులో ఆమె కూడా గణేశుడికి బబుల్ టీని నైవేద్యంగా సమర్పిస్తున్నట్లు కనిపిస్తుంది.
కోరిక నెరవేరితే మరిన్ని కప్పులు
వీడియోలో పియా పింగ్ తెలిపిన వివరాల ప్రకారం, స్థానిక నమ్మకంలో భాగంగా భక్తులు తమ కోరికలు నెరవేరాలని కోరుకుంటూ గణేశుడికి బబుల్ టీని సమర్పిస్తారని చెబుతున్నారు. కోరిక నెరవేరిన తర్వాత కృతజ్ఞతగా మరింత ఎక్కువ మొత్తంలో బబుల్ టీని సమర్పిస్తారట.
ఉదాహరణకు.. ఒక భక్తుడు మొదట మూడు కప్పులు సమర్పిస్తే, కోరిక నెరవేరిన తర్వాత ఆరు లేదా పన్నెండు కప్పులను సమర్పించవచ్చని చెబుతున్నారు. కొన్ని సందర్భాల్లో ఈ సంఖ్య ఏకంగా 200 కప్పులకు కూడా చేరుతుందని వీడియోలో పేర్కొన్నారు.
ఆలయం దగ్గరే బబుల్ టీ గైడ్
ఈ స్థానిక ఆచారంలో మరో ఆసక్తికరమైన విషయం కూడా ఉంది. గణేశ ఆలయం సమీపంలో ప్రత్యేకంగా ఒక గైడ్ను ఏర్పాటు చేసి, యూనియన్ మాల్లోని వివిధ బబుల్ టీ బ్రాండ్ల దుకాణాలు ఎక్కడ ఉన్నాయో భక్తులకు తెలియజేస్తారని వీడియోలో చూపించారు. దీంతో భక్తులు తమకు నచ్చిన బబుల్ టీని కొనుగోలు చేసి గణేశుడికి నైవేద్యంగా సమర్పించవచ్చు.
సోషల్ మీడియాలో వైరల్గా మారిన వీడియో
గణేశుడికి బబుల్ టీ సమర్పిస్తున్న దృశ్యాలు సోషల్ మీడియాలో వైరల్ కావడంతో భారతీయ నెటిజన్లలో ఆసక్తికరమైన చర్చ మొదలైంది. గణేష్ పూజలో సాధారణంగా మోదకాలు, లడ్డూలు వంటి సంప్రదాయ నైవేద్యాలను చూసే భారతీయులకు ఈ విధానం కొత్తగా, ఆశ్చర్యంగా అనిపించింది. అయితే.. భక్తి, విశ్వాసాలు, నైవేద్యాల సమర్పణ విధానాలు ప్రాంతీయ సంప్రదాయాలను బట్టి మారుతుంటాయి. అందుకే బ్యాంకాక్లో కనిపిస్తున్న ఈ బబుల్ టీ నైవేద్యాన్ని అక్కడి స్థానిక గణేశ భక్తి సంప్రదాయంలో ఒక ప్రత్యేకమైన ఆచారంగా చూడవచ్చు.
వైరల్ వీడియో చూడండి..
View this post on Instagram
