Local Corporator: మీ లోకల్ కార్పొరేటర్ ఏం చేస్తారో తెలుసా? ఆయనకున్న బాధ్యతలు ఏంటి?

Municipal

Local Corporator: గతంలో అందించిన వ్యాసాల్లో మీ వీధిలోని గుంతలు, పాడైపోయిన రహదారులకు మీ ఎంపీ (MP) కారణం కాదని, మీ ఎమ్మెల్యే (MLA) కూడా కాదని తెలుసుకున్నారు. మరి అసలు బాధ్యులు ఎవరు? ఆ బాధ్యుడే మీ కౌన్సిలర్. కొన్ని ప్రాంతాల్లో వీరినే కార్పొరేటర్ అని పిలుస్తారు. మన నగరం అనేది ఒకే పెద్ద యూనిట్ కాదు. పాలనా సౌలభ్యం కోసం నగరాన్ని వార్డులుగా విభజిస్తారు. సాధారణంగా ప్రతి వార్డులో సుమారు 30,000 నుండి 40,000 మంది జనాభా ఉంటారు. ప్రతి వార్డు ప్రజలు తమ ప్రతినిధిగా ఒక కౌన్సిలర్‌ను ఎన్నుకుంటారు. భారతీయ నగర పాలక వ్యవస్థలో ప్రజాస్వామ్యబద్ధంగా ఎన్నికయ్యే అత్యంత చిన్న, స్థానిక పదవి ఇది. మేయర్, ఎమ్మెల్యే లేదా ఎంపీ నియోజకవర్గాల కంటే ఇది చాలా చిన్నది. మీ వీధి సమస్యల గురించి స్పష్టమైన అవగాహన ఉండాల్సిన ప్రజాప్రతినిధి వీరే!

కౌన్సిలర్ అసలు బాధ్యత ఏమిటి?

తన చిన్న వార్డు పరిధిలోని సమస్యలపై అధికారుల వద్ద గళమెత్తడమే కౌన్సిలర్ ప్రాథమిక విధులు.

• చెత్త సేకరణ సరిగ్గా జరగకపోవడం
• వీధిదీపాలు వారాల తరబడి వెలగకపోవడం
• వర్షాకాలంలో మురుగునీటి కాలువలు పొంగిపొర్లుతుండటం

ఇలాంటి స్థానిక సమస్యలను నేరుగా మున్సిపల్ అధికారుల దృష్టికి తీసుకెళ్లి పరిష్కరించే బాధ్యత కౌన్సిలర్‌దే.
అంతేకాకుండా, వీరు మరొక కీలకమైన పని చేస్తారు. మేయర్‌ను ఎన్నుకోవడం. మన దేశంలో చాలా నగరాల్లో మేయర్ పదవి ప్రధానంగా నామమాత్రమైనది (సభలకు అధ్యక్షత వహించడం వరకు). అయితే, మున్సిపల్ కౌన్సిల్ సమావేశాల్లో ఓటింగ్ ద్వారా ఆ మేయర్‌ను పదవిలో కూర్చోబెట్టేది ఈ కౌన్సిలర్లే.

మూడు లక్షల కంటే ఎక్కువ జనాభా ఉన్న నగరాల్లో 1992 రాజ్యాంగ సవరణ ప్రకారం ‘వార్డు కమిటీలు’ ఏర్పాటు చేయడం నిర్బంధం. సాధారణంగా ఈ కమిటీలకు స్థానిక కౌన్సిలరే అధ్యక్షత వహిస్తారు. ప్రజలకు, పాలనా యంత్రాంగానికి మధ్య నేరుగా వారధిలా పనిచేస్తూ, సమస్యలు పెద్ద బ్యూరోక్రసీలో చిక్కుకోకుండా త్వరగా పరిష్కారం అయ్యేలా చూడటమే ఈ వార్డు కమిటీల ముఖ్య ఉద్దేశం.

సమస్య ఎక్కడ వస్తోంది?

మీ ఫిర్యాదులను స్వీకరించడానికి పరిష్కరించడానికి కౌన్సిలర్ సరైన వ్యక్తే. కానీ ఇక్కడే ఒక అసలు ట్విస్ట్ ఉంది!
మేయర్‌లాగే కౌన్సిలర్లు కూడా కొన్ని పరిమితులను ఎదుర్కొంటారు. క్షేత్రస్థాయిలో రోజువారీ పనులను అమలు చేసేది కౌన్సిలర్ కాదు. రాష్ట్ర ప్రభుత్వం నియమించే ‘మున్సిపల్ కమిషనర్’. ఈ అధికారి కౌన్సిలర్‌కు బాధ్యత వహించరు. కౌన్సిలర్ మీ చెత్త సమస్యపై ఎంత గట్టిగా మాట్లాడినా, లేఖలు రాసినా, ఫాలోఅప్ చేసినా.. పని జరగాలంటే మాత్రం కమిషనర్ పరిధిలోని అధికారులే స్పందించాలి.

మీ వీధికి సంబంధించిన నిజమైన అధికార శ్రేణి:

• కౌన్సిలర్: సమస్యను గుర్తించి, అధికారుల దృష్టికి తీసుకెళ్తారు (ఎందుకంటే వీరు ప్రజలకు దగ్గరగా ఉంటారు).
  మున్సిపల్ కమిషనర్ పరిధిలోని శాఖలు: ఆ సమస్యను క్షేత్రస్థాయిలో పరిష్కరించాలి.
• రాష్ట్ర ప్రభుత్వం: ఈ రెండింటి వెనుక ఉంటూ, పనులు చేయడానికి కావలసిన నిధులు, అధికారాలను కేటాయిస్తుంది.
  ఈ మూడు లింకుల్లో ఏ ఒక్కటి సరిగ్గా పనిచేయకపోయినా మనకు ఎదురయ్యేది ప్రతిసారీ చూసే అనుభవమే. సమస్య ఉంటుంది. దాన్ని తెలిసిన ప్రజాప్రతినిధి ఉంటారు. కానీ నెలల తరబడి ఏ మార్పు ఉండదు.

మనం ఏమి చేయాలి?

భారతీయ ప్రజాస్వామ్యం మనకు వివిధ స్థాయిల్లో (వార్డు/గ్రామం, నగరం, జిల్లా, రాష్ట్రం, దేశం) ప్రతినిధులను ఇచ్చింది. మీ నిర్దిష్ట సమస్య ఏ అధికార పరిధిలోకి వస్తుందో తెలుసుకోవడం చిన్న విషయమేమీ కాదు. అనవసరంగా అందరిపై ఆగ్రహం వ్యక్తం చేయడానికి, సరైన తలుపు తట్టి పని పూర్తి చేయించుకోవడానికి మధ్య ఉన్న తేడా అదే!
అందుకే తదుపరిసారి మీ వీధిలో ఏదైనా స్థానిక సమస్య ఎదురైతే.. మొదట మీ వార్డు కౌన్సిలర్ ఎవరో తెలుసుకోండి. మీ నగరంలో వార్డు కమిటీ సమావేశాలు జరుగుతుంటే హాజరవ్వండి. మీ వీధి సమస్యపై అధికారులు ఏ సమాధానం ఇచ్చారో నేరుగా కౌన్సిలర్‌ను అడగండి. మన ప్రసిద్ధ ప్రజాస్వామ్యంలో ప్రశ్నలు అడిగే పౌరుల కోసం చాలామంది ప్రజాప్రతినిధులు ఎదురుచూస్తుండటం మిమ్మల్ని ఆశ్చర్యపరచవచ్చు.