చరిత్రకు సజీవ సాక్ష్యం.. 375 ఏళ్ల డచ్ భవన ప్రస్థానం.. ఫొటోలు చూస్తే ఫిదా అవ్వాల్సిందే
ఏలూరు: భారతదేశాన్ని పాలించిన రాజులు, నవాబులు, మరియు విదేశీ వర్తకులు తమ పాలనకు గుర్తుగా ఎన్నో కోటలు, కట్టడాలను నిర్మించారు. వందల సంవత్సరాలు గడుస్తున్నా నేటికీ చెక్కుచెదరకుండా నిలిచిన ఈ చారిత్రాత్మక కట్టడాల ద్వారానే.. అప్పటి సంస్కృతి, సాంప్రదాయాలను, నిర్మాణ నైపుణ్యాలను నేటి తరం వారు తెలుసుకోగలుగుతున్నారు. ఈ కోవలోకే వస్తుంది పశ్చిమ గోదావరి జిల్లా, నరసాపురంలోని ప్రముఖ ‘శ్రీ యర్రమిల్లి నారాయణ మూర్తి (వై.ఎన్.) కళాశాల’ ప్రాంగణంలో ఉన్న పురాతన పరిపాలనా భవనం. మూడు శతాబ్దాలకు పైగా చరిత్రకు సజీవ సాక్ష్యంగా నిలిచిన ఈ భవనం.. నాటి విదేశీ వాణిజ్యానికి, నేటి విద్యా ప్రగతికి వారధిగా నిలుస్తోంది. డచ్ కాలం నాటి వాచ్ టవర్.. బ్రిటీష్ వారి కార్యాలయం
నరసాపురం ప్రాంతాన్ని కేంద్రంగా చేసుకుని విదేశీయులు వర్తక వాణిజ్యాలు నిర్వహించే రోజుల్లో.. సాగర సంగమానికి సమీపంలో, వశిష్ఠ గోదావరి తీరాన సరిగ్గా 1650వ సంవత్సరంలో డచ్ వారు ఈ భవనాన్ని నిర్మించారు. అప్పట్లో సముద్ర మార్గంలో ప్రయాణించే ఓడలు, వాడల కదలికలను నిఘా వేసి పర్యవేక్షించడానికి ఈ ఎత్తైన భవనాన్ని ఒక 'వాచ్ టవర్'గా ఉపయోగించేవారు. డచ్ వారి నిష్క్రమణ అనంతరం ఈ భవనం బ్రిటీష్ వారి ఆధీనంలోకి వెళ్ళింది. బ్రిటీష్ పాలకులు సైతం ఈ భవన వైభవాన్ని చూసి ముగ్ధులై, దీనిని తమ అడ్మినిస్ట్రేటివ్ ఆఫీస్ (కార్యాలయం)గా మార్చుకుని పాలన సాగించారు.
స్వాతంత్ర్యం తర్వాత విద్యా నిలయంగా రూపాంతరం.. దేశానికి స్వాతంత్ర్యం వచ్చిన తర్వాత, ఈ చారిత్రాత్మక కట్టడం విద్యా మందిరంగా మారి సరికొత్త రూపాన్ని సంతరించుకుంది. ప్రస్తుతం ఇది శ్రీ వై.ఎన్. కళాశాల పరిపాలనా భవనంగా సేవలందిస్తోంది. నాటి నిర్మాణ నైపుణ్యం ఎంత పటిష్టమైనదో చెప్పడానికి వందల ఏళ్లుగా చెక్కుచెదరని ఈ భవనమే నిదర్శనం. ప్రస్తుతం ఈ భవనం గ్రౌండ్ ఫ్లోర్ లో కళాశాల పరిపాలనా కార్యాలయం (ఆఫీస్) నడుస్తోంది. మొదటి అంతస్తు కళాశాల విద్యార్థినుల వెయిటింగ్ హాల్గా ఉపయోగపడుతోంది. ఇక రెండవ అంతస్తు కళాశాల గెస్ట్ హౌస్గా సేవలందిస్తోంది.
సినీ, రాజకీయ ప్రముఖుల జ్ఞాపకాల వేదిక.. ఈ చారిత్రాత్మక కళాశాలలో చదువుకుని, సమాజంలో ఉన్నత స్థానాలకు చేరుకున్న ఎందరో మేధావులు, సినీ, రాజకీయ ప్రముఖులకు ఈ భవనంతో విడదీయరాని బంధం ఉంది. ఇక్కడే చదువుకున్న దర్శక రత్న దాసరి నారాయణరావు, రెబెల్ స్టార్ కృష్ణంరాజు, మరియు మెగాస్టార్ చిరంజీవి వంటి మహామహులు నరసాపురం వచ్చినప్పుడల్లా ప్రత్యేకంగా ఈ భవనాన్ని వీక్షించడానికి వస్తుంటారు. ఇక్కడి గెస్ట్ హౌస్లోనే సేదతీరుతూ, తమ పాత కాలేజీ రోజులను, మధుర జ్ఞాపకాలను నెమరువేసుకుంటారు. ఈ భవనం ముందు ఫొటోలు దిగడం ఇక్కడి పూర్వ విద్యార్థులకు ఒక మధురమైన అనుభూతి.
నాటి సైనిక సైరన్.. నేటి విద్యా గంట.. ఈ భవనం పైభాగంలో ఒక పెద్ద ఇత్తడి గంట ఉంది. డచ్, బ్రిటీష్ కాలంలో శత్రువుల కదలికలను గమనించి, సైనికులను అప్రమత్తం చేయడానికి ఈ భారీ గంటను ఉపయోగించేవారు. కాలం మారినా ఆ గంట ప్రాధాన్యత మాత్రం మారలేదు. ఇప్పటికీ ఈ కళాశాల యాజమాన్యం తరగతుల నిర్వహణ కోసం ప్రతి 50 నిమిషాలకు ఒకసారి ఈ పురాతన ఇత్తడి గంటనే మోగిస్తూ.. విద్యార్థులను పీరియడ్ల సమయం పట్ల అప్రమత్తం చేస్తోంది.
నాటి విదేశీ పాలకుల వ్యూహాత్మక స్థావరం.. నేడు వేలాది మంది విద్యార్థుల భవిష్యత్తును తీర్చిదిద్దే విద్యా నిలయంగా మారడం నిజంగా అభినందనీయం. ఇంతటి చారిత్రాత్మక వారసత్వాన్ని వై.ఎన్. కళాశాల యాజమాన్యం, విద్యార్థులు ఎంతో బాధ్యతగా సంరక్షించుకుంటూ ఆదర్శంగా నిలుస్తున్నారు.