Sleep for Healthy Heart: హార్ట్ ఎటాక్ రావొద్దంటే రాత్రిళ్లు ఈ ఒక్కపని చేయండి.. పదికాలాలపాటు నిండు ఆరోగ్యం మీ సొంతం
నేటి కాలంలో వయసుతో సంబంధం లేకుండా ప్రతి ఒక్కరూ హార్ట్ ఎటాక్ సమస్యతో బాధపడుతున్నారు. ఇలా జరగకుండా ఉండాలంటే రాత్రిళ్లు హాయిగా 8 గంటల పాటు నిద్రపోవాలని నిపుణులు సూచిస్తున్నారు. రాత్రంతా నిద్రపోతే భవిష్యత్తులో కూడా గుండె సంబంధిత సమస్యలు రానేరావంటున్నారు నిపుణులు..
ప్రతి మనిషి ఆరోగ్యంగా ఉండాలంటే నిద్ర చాలా అవసరం. మంచి రాత్రి నిద్ర రోజంతా ఉల్లాసంగా ఉంచుతుంది. ముఖ్యంగా గుండె ఆరోగ్యంగా ఉండాలంటే తగినంత నిద్ర కావాలి. మంచి రాత్రి నిద్ర హృదయ సంబంధ వ్యాధుల ప్రమాదాన్ని తగ్గిస్తుంది. ఇటీవలి పరిశోధనల ప్రకారం తక్కువ నిద్ర అధిక రక్తపోటు సమస్యను పెంచుతుందని తేలింది. ఇది క్రమంగా గుండెపై ప్రభావం చూపుతుందని పరిశోధకులు చెబుతున్నారు. ఈ అధ్యయనం ప్రకారం ఏడు గంటల కంటే తక్కువ నిద్రపోవడమే అనారోగ్యానికి మూలకారణం.
అంటే, మీ గుండె ఆరోగ్యం మీ చేతుల్లోనే ఉందన్నమాట. మంచి రాత్రి నిద్ర మీ ఆయుష్షును పెంచుతుందని, గుండె జబ్బులను నివారిస్తుందని అధ్యయనాలు చెబుతున్నాయి. మన దేశంలో పురుషుల కంటే స్త్రీలు తక్కువ నిద్రపోతారు. రాత్రి ఆలస్యంగా నిద్రపోయి తెల్లవారుజామున నిద్రలేస్తుంటారు. ఇలా చేయడం వల్ల గుండె సమస్యలు మహిళల్లో అధికంగా తలెత్తుతున్నాయి. ఏడు గంటల కంటే తక్కువ నిద్రపోవడం వల్ల అధిక రక్తపోటు ముప్పు 7 శాతం పెరుగుతుంది. ఐదు గంటల కంటే తక్కువ నిద్రపోవడం వల్ల నిద్ర 11 శాతం గుండె జబ్బుల ముప్పు పెరిగిందని ఈ అధ్యయనంలో తేలింది.
ఏడెనిమిది గంటల నిద్ర ఆరోగ్యకరమైన గుండెకు మంచిదని శాస్త్రవేత్తలు చెబుతున్నారు. కానీ నిద్రలో తరచుగా మేల్కొలపడం అధిక రక్తపోటు ప్రమాదాన్ని పెంచుతుంది. 16 అధ్యయనాల్లో ఈ విషయం వెల్లడైంది. గత ఐదేళ్లలో ఆరు దేశాల నుంచి పది లక్షల మందికి పైగా ప్రజల నుంచి సేకరించిన డేటా ద్వారా ఈ అధ్యయనం చేశారు. తక్కువ నిద్రపోయే వారు అధిక రక్తపోటుతో బాధపడే అవకాశం ఉందని తేలింది.
అలాగే మీరు ఎంత తక్కువ నిద్రపోతే, భవిష్యత్తులో అధిక రక్తపోటు వచ్చే అవకాశాలు అంత ఎక్కువగా ఉన్నాయని ఈ అధ్యయనం చెబుతోంది. కాబట్టి, ప్రతిరోజూ ఏడెనిమిది గంటల నిద్ర మీ గుండె ఆరోగ్యానికి మంచిది. అదేవిధంగా, మధుమేహం, ధూమపానం అధిక రక్తపోటు ప్రమాదాన్ని 20 శాతం పెంచుతాయి.
రాత్రంతా హాయిగా నిద్రపోవాలంటే.. రాత్రిళ్లు మొబైల్, టీవీ చూసే అలవాటు మానుకోవాలి. ధూమపానం, మద్యం సేవించడం వల్ల నిద్ర సమస్యలు తలెత్తుతాయి. ఆందోళన, డిప్రెషన్, స్లీప్ అప్నియా సమస్యలు నిద్ర సమస్యలను కలిగిస్తాయి. రాత్రి షిఫ్ట్ సమయంలో అతిగా తినడం వల్ల మంచి నిద్రకు ఆటంకం ఏర్పడుతుంది. వీటన్నింటికీ దూరంగా ఉంటే నాణ్యమైన నిద్ర అందుతుంది.