CMF phone 1: రూ. 12వేలకే నథింగ్ నుంచి కొత్త ఫోన్.. ఫీచర్స్‌ ఎలా ఉండనున్నాయంటే
లండన్‌కు చెందిన ప్రముఖ స్మార్ట్‌ ఫోన్ దిగ్గజం నథింగ్‌కు భారత్‌లో ఎలాంటి క్రేజ్‌ ఉందో ప్రత్యేకంగా చెప్పాల్సిన పనిలేదు. ఈ బ్రాండ్‌ నుంచి ఇప్పటి వరకు వచ్చిన రెండు ఫోన్‌లకు మంచి ఆదరణ లభించింది. అయితే తాజాగా నథింగ్ మరో బడ్జెట్ ఫోన్‌ను లాంచ్‌ చేసేందుకు సిద్ధమైంది. ఈ ఫోన్‌కు సంబంధించిన పూర్తి వివరాలు ఇప్పుడు తెలుసుకుందాం..
మిడ్‌ రేంజ్‌ బడ్జెట్‌ను టార్గెట్ చేసుకొని ఫోన్‌లను తీసుకొస్తూ మార్కెట్లో తనకంటూ ఓ ప్రత్యేక స్థానాన్ని సంపాదించుకుంది లండన్‌కు చెందిన స్మార్ట్‌ ఫోన్ తయారీ సంస్థ నథింగ్. అయితే తాజాగా ఈ బ్రాండ్‌ నుంచి బడ్జెట్ ఫోన్ మార్కెట్లోకి వస్తోంది.
సీఎమ్‌ఎఫ్‌ ఫోన్ 1 పేరుతో ఈ ఫోన్‌ను తీసుకొస్తున్నారు. అయితే ఫోన్ మార్కెట్లోకి ఎప్పుడు వస్తుందన్న దానిపై ఎలాంటి క్లారిటీ లేకపోయినప్పటికీ కంపెనీ ఈ ఫోన్‌కు సంబంధించి ఓ టీజర్‌ను విడుదల చేసింది. త్వరలోనే ఈ ఫోన్ మార్కెట్లోకి రానుందని ట్వీట్ చేశారు.
ఇదిలా ఉంటే ఈ ఫోన్‌ను రూ. 12,000 బడ్జెట్‌లో తీసుకొస్తున్నట్లు తెలుస్తోంది. కంపెనీ చేసిన ట్వీట్‌ను గమనిస్తే ఈ ఫోన్ ఆరెంజ్‌ కలర్‌లో లెదర్‌ ప్యానల్‌తో డిజైన్‌ చేసినట్లు స్పష్టమవుతోంది. ఫోన్‌కి కింద చివరల్లో రొటేట్ చేసేందుకు వీలుగా ఉన్న ఓ బటన్‌ను ఇచ్చారు.
ఈ ఫోన్ ఫీచర్లకు సంబంధించి ఇప్పటి వరకు ఎలాంటి అధికారిక ప్రకటన లేకపోయినప్పటికీ నెట్టింట కొన్ని ఫీచర్లు వైరల్ అవుతున్నాయి. వీటి ప్రకారం ఈ ఫోన్‌లో 6.7 ఇంచెస్‌తో కూడిన 120 హెచ్‌జెడ్‌ ఓఎల్‌ఈడీ స్క్రీన్‌ను అందించనున్నట్లు తెలుస్తోంది.
అలాగే ఈ ఫోన్‌లో మీడియా టెక్‌ డైమెన్సిటీ 7200 ఎస్‌ఓసీ ప్రాసెసర్‌ను ఇవ్వనున్నట్లు తెలుస్తోంది. ఇక ఈ ఫోన్‌ను 128 జీబీ, 256 జీబీ స్టోరేజ్‌తో పాటు 6 జీబీ ర్యామ్‌ వేరియంట్‌లో తీసుకొస్తున్నట్లు సమాచారం. త్వరలోనే ఈ ఫోన్ మార్కెట్లోకి అధికారికంగా లాంచ్‌ కానుంది.