Google Wallet: భారత్‌లోకి గూగుల్ వ్యాలెట్ వచ్చేసింది.. ఫీచర్స్‌ ఇవే..
ప్రముఖ సెర్చ్‌ ఇంజన్‌ దిగ్గజం గూగుల్ వ్యాలెట్ పేరుతో సేవలను ఇతరదేశాల్లో అందుబాటులోకి తీసుకొచ్చిన విషయం తెలిసిందే. అయితే తాజాగా గూగుల్ ఈ సేవలను భారత్‌లో లాంచ్‌ చేశారు. భారత్‌లోని ఆండ్రాయిడ్ యూజర్లకు గూగుల్ వ్యాలెట్ సేవలను అందుబాటులోకి తీసుకొచ్చారు. ఇంతకీ గూగుల్ వ్యాలెట్‌లో ఎలాంటి ఫీచర్లు ఉంటాయి.? అసలు దీని ఉపయోగం ఏంటి.? ఇప్పుడు తెలుసుకుందాం..
గూగుల్ వ్యాలెట్ సేవలు ఇండియాలోని ఆండ్రాయిడ్ యూజర్లకు అందుబాటులోకి వచ్చాయి. ఇతర దేశాలతో పోల్చితే భారత్‌లో కొన్ని మార్పులు చేర్పులు చేసి ఈ సేవలను అందుబాటులోకి తీసుకొచ్చారు. భారత్‌లోని పలు బ్రాండ్స్‌తో ఒప్పందం చేసుకున్నారు.
ప్లేస్టోర్‌లో గూగుల్ వ్యాలెట్ యాప్‌ డౌన్‌లోడ్‌ చేసుకోవడం ద్వారా ఈ సేవలను పొందొచ్చు. అయితే ఈ యాప్‌లో ప్రస్తుతానికి డెబిట్‌ కార్డ్, క్రెడిట్ కార్డ్ డిటెయిల్స్‌ సేవ్ చేసుకునే ఫీచర్ మాత్రం అందుబాటులో లేదు.
ఈ వ్యాలెట్ ఫీచర్ల విషయానికొస్తే మీరు ఒకవేళ సినిమా టికెట్‌ బుక్ చేశారనుకుంటే వెంటనే ఆ ఈ టికెట్ను గూగుల్ వ్యాలెట్‌లో సేవ్ చేసుకోవచ్చు. అలాగే ఈ వ్యాలెట్‌తో మెట్రో టికెట్స్‌ను సైతం బుక్ చేసుకోవచ్చు. హైదరాబాద్‌ మెట్రో, కొచ్చి మెట్రోతో పాటు అబిబస్‌ టికెట్స్ కూడా బుక్ చేసుకోవచ్చు.
వీటితో పాటు ఎయిర్ ఇండియా, ఎయిర్ ఇండియా ఎక్స్‌ప్రెస్, ఇండిగో వంటి సంస్థలకు చెందిన ఎయిర్ టికెట్స్‌ను ఈ యాప్‌తో బుక్ చేసుకోవచ్చు. ఈ పాస్‌లను వ్యాలెట్‌లో సేవ్ చేసుకోవచ్చు.
ఆన్‌లైన్‌ షాపింగ్ చేసే సమయంలో వచ్చే రివార్డ్ పాయింట్స్‌ను ఈ వ్యాలెట్‌లో సేవ్ చేసుకోవచ్చు. రివార్డ్ పాయింట్స్‌ని రిట్రీవ్ చేసుకునే ఫీచర్‌ను సైతం అందించారు. కాగా గూగుల్ వ్యాలెట్‌లో ఎలాంటి లావాదేవీలు చేసుకోవడానికి వీలు ఉండదు. ఇందుకు గూగుల్ పే మాత్రమే ఉపయోగించుకోవాల్సి ఉంటుంది.