Fish: చేపలను వండే ముందు ఇలా కడిగితే.. అస్సలు వాసన అనేదే ఉండదు..
నాన్ వెజ్ ప్రియులందరికీ చేపలంటే మస్త్ ఇష్టం. చేపల కోసం ఎంత దూరం వెళ్లి తెచ్చుకోవడానికైనా వెనకాడరు. అయితే చేపలను వండటం ఎంత ఇష్టమో, ఆ తర్వాత వచ్చే నీచు వాసన అంటే చాలా మందికి అంత చిరాకు. వంటగదిలో, చేతులపై, గిన్నెలపై ఆ వాసన రోజుల తరబడి పోదు. కానీ మీరు వంట మొదలు పెట్టే ముందే చేపలను కొన్ని పద్ధతుల్లో శుభ్రం చేస్తే, వాసన అస్సలు ఉండదు. అవేంటో ఇప్పుడు తెలుసుకుందాం..
చేపల కూర రుచి ఎంత బాగుంటుందో, వాటిని శుభ్రం చేసేటప్పుడు వచ్చే వాసన అంత ఇబ్బందికరంగా ఉంటుంది. చాలామంది ఎన్నిసార్లు కడిగినా ఆ వాసన పోవడం లేదని బాధపడుతుంటారు. అయితే వంటింట్లో లభించే ఉప్పు, నిమ్మకాయ, పసుపు వంటి వస్తువులతో చేపల నీచు వాసనను చిటికెలో మాయం చేయవచ్చు.
నిమ్మకాయ - ఉప్పు మ్యాజిక్: ఇది అందరికీ అందుబాటులో ఉండే సులభమైన పద్ధతి. చేపల వాసనను పోగొట్టడంలో నిమ్మకాయ అద్భుతంగా పనిచేస్తుంది. మొదట చేపలను చల్లటి నీటితో కడగాలి. ఆపై చేప ముక్కలపై ఉప్పు, నిమ్మరసం చల్లి బాగా రుద్దాలి. 10 -15 నిమిషాల పాటు అలాగే ఉంచి ఆ తర్వాత శుభ్రమైన నీటితో కడిగితే వాసన మటుమాయం.
పసుపు - వెనిగర్ క్లీనింగ్: కొన్ని రకాల చేపలు చాలా బలమైన వాసన వస్తాయి. అటువంటి వాటికి ఈ పద్ధతి బెస్ట్. ఒక గిన్నె నీటిలో టీస్పూన్ పసుపు, రెండు చెంచాల వెనిగర్ కలపండి. చేప ముక్కలను ఈ నీటిలో 5-7 నిమిషాలు నానబెడితే, వాసన పోవడమే కాకుండా అందులో ఉండే బ్యాక్టీరియా కూడా నశిస్తుంది. ఇది చేపలను డీప్ క్లీన్ చేస్తుంది.
బియ్యం లేదా గోధుమ పిండితో జిడ్డుకు చెక్: చేపలు కొన్నిసార్లు జిడ్డుగా అనిపిస్తాయి. ఆ జిడ్డు వల్లే వాసన ఎక్కువగా వస్తుంది. చేపలపై పొడి బియ్యం పిండి లేదా గోధుమ పిండిని చల్లి సున్నితంగా రుద్దాలి.5 నిమిషాల తర్వాత నీటితో కడిగేస్తే జిడ్డు మొత్తం పోయి, ముక్కలు ఫ్రెష్గా తయారవుతాయి.
జాగ్రత్తలు: చేపలను ఎప్పుడూ చల్లటి నీటితోనే కడగాలి. వేడి నీటిని వాడితే ఆ వేడికి వాసన మరింత పెరుగుతుంది. శుభ్రం చేసిన వెంటనే ముక్కలను ఆరబెట్టకుండా, వెంటనే మసాలాలు పట్టిస్తే వాసన రాదు. చేపలు కడిగిన తర్వాత మీ చేతులు నీచు వాసన రాకుండా ఉండాలంటే, నిమ్మచెక్కతో చేతులను రుద్దుకుని కడుక్కోండి.