Mini Kashmir: కాశ్మీర్ వెళ్లకపోతున్నారా..? అయితే, మినీ కశ్మీర్కెళ్లండి.. ఇదే రైట్ టైమ్..
కాశ్మీర్ను సాధారణంగా భూలోక స్వర్గంగా భావిస్తారు పర్యాటకులు, ప్రకృతి ప్రేమికులు. అయితే ప్రస్తుతం భారత్, పాక్ దేశల నడుమ యుద్ధ వాతావరణంతో ఆ స్వర్గంలో టెన్షన్ నెలకొంది. ఇది కాశ్మీర్ వెళ్లాలనుకునే వారికి తీవ్ర నిరాశనే మిగిల్చింది. అలాంటివారికి మరో అద్భుత అవకాశం ఇది. వేసవి సెలవుల్లో కాశ్మీర్ వెళ్లాలనుకునే వారు ఈసారి మినీ కాశ్మీర్కు వెళ్లొచ్చు. ఇది కూడా మిమ్మల్ని మైమరచిపోయేలా చేస్తుంది. ప్రకృతి ప్రేమికులు, ట్రెక్కింగ్ అభిమానులు అయిన వారు తప్పకుండా ఈ ప్రదేశాన్ని అనుభవించాల్సిందే.
ఉత్తరాఖండ్లో ఉంది మినీ కాశ్మీర్ . ఉత్తరాఖండ్ రాష్ట్రం తన సహజసౌందర్యం కారణంగా దేవభూమిగా పేరుగాంచింది. ఇక్కడి పర్వత శ్రేణులు, నదులు, అరణ్యాలు, ఆధ్యాత్మిక ప్రదేశాలు పర్యాటకులను ఎక్కువగా ఆకర్షిస్తాయి. అందుకే ఏ యేడు కాయేడు ఇక్కడికి వచ్చే పర్యాటకుల సంఖ్య అంతకంతకూ పెరుగుతూ వస్తోంది. ఈ వేసవిలో కాశ్మీర్కు బదులుగా ఉత్తరాఖండ్లోని మున్సియారి వెళ్లడం ఒక ఉత్తమ ప్రత్యామ్నాయం అవుతుంది.
అయితే, ఉత్తరాఖండ్ రాష్ట్రంలో ఉన్న మున్సియారి అనే కొండ ప్రాంతాన్ని మినీ కాశ్మీర్ ఆఫ్ ఇండియాగా పిలుస్తారు. ఇక్కడి పచ్చని లోయలు, ఎత్తయిన హిమాలయ శ్రేణులు, ప్రశాంత వాతావరణం కాశ్మీర్ అనుభూతిని కలిగిస్తాయి. మే, జూన్ నెలలలో ఈ ప్రాంతం చూడదగినదిగా ఉంటుంది. వేసవి సెలవుల్లో కుటుంబంతో కలిసి వెళ్లేందుకు అనువైన ప్రదేశం ఇది.
మున్సియారి, ఉత్తరాఖండ్లోని పితోరాఘడ్ జిల్లాలో ఉంది. సముద్రమట్టానికి సుమారు 2,200 మీటర్ల ఎత్తులో ఉన్న ఈ ప్రదేశం పంచచూలి పర్వత శ్రేణిలో భాగంగా ఉంటుంది. ఇక్కడ మంచుతో కప్పబడిన పర్వతాలు, స్వచ్ఛమైన గాలి, ఆ అడవులు నిజంగా స్వర్గాన్ని గుర్తుచేస్తాయి. మే, జూన్ నెలల్లో ఇక్కడ ఉష్ణోగ్రతలు 10డిగ్రీల సెల్సీయస్గా నుంచి 25డిగ్రీల సెల్సీయస్ మధ్యే ఉంటాయి. అంతేకాదు..
పచ్చని ప్రకృతి, సూర్యకిరణాలు కలిసి మున్సియారిని మరింత అపూర్వంగా మార్చుతాయి. పూలతో నిండిన మొక్కలు, ప్రవహించే నదులు, చిన్న చిన్న జలపాతాలు ఈ ప్రదేశానికి ప్రత్యేక ఆకర్షణ. ట్రెక్కింగ్ ప్రేమికులకు మున్సియారి దైవానుగ్రహం. మిలాం గ్లేసియర్ ట్రెక్, కాలియాటాప్ ట్రెక్, నామిక్ గ్లేసియర్ ట్రెక్లు ఇక్కడ ముఖ్యమైనవి. వీటిలో ట్రెక్కింగ్ అనుభవం అత్యుత్తమంగా ఉంటుంది.
మున్సియారి సమీపంలో ఉన్న నందా దేవి ఆలయం, పార్వతీ దేవికి అంకితమైన ప్రాచీన గుడి. ఇది ప్రాంతానికి కేవలం 3 కిలోమీటర్ల దూరంలో ఉంది. ఉత్తరాఖండ్లో అత్యంత పురాతన దేవాలయాల్లో ఒకటిగా పేరు పొందింది. అంతేకాక, ఇక్కడే ఉన్న తమరి కుండ్ అనే సరస్సు కూడా పర్యాటకులను ఆకర్షించే మరో ప్రత్యేకత. నీలం రంగు నీటితో ఉన్న ఈ సరస్సు చుట్టూ పర్వతాల మధ్య ఎంతో అందంగా ఉంటుంది.