ఉదయాన్నే ఖాళీ కడుపుతో పాలు తాగితే లాభామా..? నష్టమా..? నిపుణులు ఏం చెబుతున్నారంటే..
మన ఆహారంలో పాలు చాలా ముఖ్యమైన భాగం. పాలు మన శరీరంలోని ఎముకలు, కండరాలు రెండింటినీ బలోపేతం చేయడంలో సహాయపడుతుంది. కానీ పాల వినియోగం పూర్తి ప్రయోజనం పొందడానికి సరైన సమయంలో, సరైన మార్గంలో తీసుకోవడం చాలా ముఖ్యం. పాలు హెల్తీ డ్రింక్ అయినప్పటికీ, ఎప్పుడు పడితే అప్పుడు పాలు తాగకూడదు. చాలా మంది నిద్రకు ముందుగా పాలు తాగుతుంటారు. కొందరు ఉదయాన్నే ఖాళీ కడుపుతో పాలు తాగుతుంటారు. పాలలో ప్రోటీన్లు, కాల్షియం, విటమిన్ డి, ఆరోగ్యకరమైన కొవ్వులు, ఇతర పోషకాలు పుష్కలంగా ఉన్నాయి. అవన్నీ మన ఆరోగ్యానికి మేలు చేస్తాయి. ఇలాంటి పాలను పరగడుపునే తాగితే లాభామా..? లేక నష్టమా..? అనే విషయం ఎప్పుడైనా ఆలోచించారా..? ఇక్కడ తెలుసుకుందాం...
ఉదయాన్నే ఖాళీ కడుపుతో పాలు తాగడం ఆరోగ్యానికి చాలా మేలు చేస్తుందని పోషకాహార నిపుణులు చెబుతున్నారు.. ఎందుకంటే ఇందులో మన మొత్తం ఆరోగ్యానికి అవసరమైన కాల్షియం, ప్రొటీన్లు, విటమిన్లు,మినరల్స్ వంటి పోషకాలు ఉంటాయి. రోజూ ఉదయాన్నే ఖాళీ కడుపుతో పాలు తాగడం వల్ల గ్యాస్, త్రేనుపు వంటి సమస్యలు నయమవుతాయంటున్నారు. అంతే కాకుండా, పాలలో ఉండే కొవ్వు పొట్టలోని పొరల్లో వ్యాపించి చికాకును తగ్గించడంలో సహాయపడుతుంది.
పాలలో ఉండే ప్రొటీన్ , దాని శక్తి మెదడును బూస్ట్ చేయడానికి సహాయపడుతుంది. ఇది జీర్ణం కావడానికి చాలా సమయం పడుతుంది. అందువల్ల, పరగడుపునే పాలు తాగడం వల్ల త్వరగా ఆకలి వేయదు. దీంతో జీర్ణవ్యవస్థ కూడా మెరుగవుతుంది. ఇది మెదడుకు పదును పెడుతుంది. ఎముకలను బలపరుస్తుంది.
అయితే, కొంతమందికి పాల ఉత్పత్తుల వల్ల అలెర్జీ కలిగిస్తుంది. అలాంటి వారికి ఖాళీ కడుపుతో పాలు తాగితే కడుపు ఉబ్బరం, విరేచనాలు వంటి జీర్ణ సమస్యలు ఇబ్బంది పెడుతుంటాయి. కొంతమందికి ఉదయాన్నే పాలు తాగడం వల్ల శరీరంలో యాసిడ్ ఉత్పత్తి పెరగడం, త్రేనుపులు, గ్యాస్ట్రిక్ సర్క్యులేషన్ వంటి సమస్యలు ఎదురవుతాయి.
అలాగే, కొన్ని రకాల మందులు వాడే వారు ఖాళీ కడుపుతో పాలు తాగడం మంచిది కాదు. ఎందుకంటే పాలలో కాల్షియం ఉంటుంది, ఇది మందులు పనికిరాకుండా చేస్తుంది. అలాగే పాలలో ఉండే ఐరన్ పూర్తిగా లభించదు. ప్రతిరోజూ ఉదయం ఖాళీ కడుపుతో తాగడం వల్ల బరువు పెరుగుతారు.
రోజంతా చురుగ్గా ఉండాలంటే శరీరానికి తగిన శక్తి అవసరం. మీ శరీరానికి తగినంత శక్తి లభించకపోతే, మీరు అలసిపోయినట్లు, బలహీనంగా అనిపించవచ్చు. ప్రతిరోజూ ఉదయం ఒక గ్లాసు వేడి పాలను తీసుకోవడం వల్ల శరీరానికి శక్తిని అందిస్తుంది. శరీరానికి శక్తిని, బలాన్ని ఇచ్చే చాలా గుణాలు పాలలో ఉన్నాయి. దానిని తీసుకోవడం చాలా ప్రయోజనకరంగా ఉంటుంది.