మాంచెస్టర్ టెస్ట్లో నంబర్ వన్గా రిషబ్ పంత్.. చరిత్ర సృష్టించడానికి 40 అడుగుల దూరంలో..
India vs England: భారత్, ఇంగ్లాండ్ మధ్య నాల్గవ టెస్ట్ మ్యాచ్ మాంచెస్టర్లోని ఓల్డ్ ట్రాఫోర్డ్లో జరుగుతుంది. భారత విధ్వంసక ఆటగాడు రిషబ్ పంత్ ఈ మ్యాచ్లో చరిత్ర సృష్టించగలడు. రోహిత్ శర్మను వెనక్కు నెట్టడం ద్వారా అతను ప్రపంచ టెస్ట్ ఛాంపియన్షిప్లో నంబర్ 1 భారత బ్యాట్స్మన్గా మారగలడు.
భారత వికెట్ కీపర్-బ్యాట్స్మన్ రిషబ్ పంత్ మరో అరుదైన రికార్డును సొంతం చేసుకునే దిశగా అడుగులు వేస్తున్నాడు. ప్రపంచ టెస్ట్ ఛాంపియన్షిప్ (WTC) చరిత్రలో అత్యధిక పరుగులు సాధించిన భారత ఆటగాడిగా నిలవడానికి కేవలం కొన్ని పరుగుల దూరంలో ఉన్నాడు. ప్రస్తుతం ఈ రికార్డు భారత టెస్ట్ కెప్టెన్ రోహిత్ శర్మ పేరిట ఉంది.
ప్రస్తుత గణాంకాల ప్రకారం, రోహిత్ శర్మ 69 ఇన్నింగ్స్లలో 2716 పరుగులు చేసి ఈ జాబితాలో అగ్రస్థానంలో ఉన్నాడు. రిషబ్ పంత్ 67 ఇన్నింగ్స్లలో 2677 పరుగులు సాధించి రోహిత్ తర్వాత రెండో స్థానంలో నిలిచాడు. అంటే, రోహిత్ శర్మ రికార్డును అధిగమించడానికి పంత్కు కేవలం 40 పరుగులు మాత్రమే అవసరం.
ఈ జాబితాలో విరాట్ కోహ్లీ (79 ఇన్నింగ్స్లలో 2617 పరుగులు) మూడో స్థానంలో, శుభ్మన్ గిల్ (65 ఇన్నింగ్స్లలో 2500 పరుగులు) నాలుగో స్థానంలో, రవీంద్ర జడేజా (64 ఇన్నింగ్స్లలో 2212 పరుగులు) ఐదో స్థానంలో ఉన్నారు.
రిషబ్ పంత్ ఇటీవల కాలంలో అద్భుతమైన ఫామ్ను కొనసాగిస్తున్నాడు. ముఖ్యంగా ఇంగ్లాండ్ పర్యటనలో అతని బ్యాటింగ్ పరుగుల వరద పారిస్తోంది. ఆడిన ఆరు ఇన్నింగ్స్లలో రెండు సెంచరీలు, రెండు అర్ధ సెంచరీలు సాధించి జట్టుకు కీలక పరుగులు అందించాడు. లార్డ్స్లో జరిగిన టెస్టులో వేలుకు గాయమైనప్పటికీ, మాంచెస్టర్లో జరగనున్న నాలుగో టెస్టుకు అతను అందుబాటులో ఉంటాడని జట్టు యాజమాన్యం ధృవీకరించింది. ఇది భారత జట్టుకు శుభవార్త.
మాంచెస్టర్లో జరగనున్న నాలుగో టెస్టులో రిషబ్ పంత్ మరో 40 పరుగులు చేస్తే, రోహిత్ శర్మను అధిగమించి WTC చరిత్రలో అత్యధిక పరుగులు సాధించిన భారత ఆటగాడిగా రికార్డు సృష్టిస్తాడు. ఈ ఘనత అతని కెరీర్లో ఒక మైలురాయిగా నిలవడమే కాకుండా, టెస్ట్ క్రికెట్లో అతని ప్రాముఖ్యతను మరింత పెంచుతుంది. పంత్ తన విధ్వంసకర బ్యాటింగ్తో, ఒత్తిడిలో బౌండరీలు రాబట్టే సామర్థ్యంతో భారత జట్టుకు ఎంతో ప్రయోజనకరంగా మారుతున్నాడు.
ఈ రికార్డుతో పాటు, పంత్ ఇప్పటికే WTC చరిత్రలో అత్యధిక సిక్సర్లు కొట్టిన భారత బ్యాట్స్మెన్గా నిలిచాడు. అతను 35 మ్యాచ్ల్లో 62 సిక్సర్లు బాది ఈ రికార్డును సాధించాడు, గతంలో రోహిత్ శర్మ పేరిట (56 సిక్సర్లు) ఉన్న రికార్డును బద్దలు కొట్టాడు. మాంచెస్టర్ టెస్ట్ భారత జట్టుకు సిరీస్ను సమం చేయడానికి కీలకం కానుంది. ఈ మ్యాచ్లో రిషబ్ పంత్ తన బ్యాటింగ్తో జట్టును గెలిపించడమే కాకుండా, వ్యక్తిగతంగా ఒక అద్భుతమైన రికార్డును నెలకొల్పాలని భారత అభిమానులు ఆశిస్తున్నారు.