Ravindra Jadeja: ఇంగ్లాండ్ గడ్డపై అరుదైన రికార్డ్.. తొలి ఆసియా ఆటగాడిగా జడేజా..
Ravindra Jadeja Records: మాంచెస్టర్ టెస్ట్లో 31 పరుగులు చేసిన వెంటనే రవీంద్ర జడేజా చరిత్ర సృష్టించాడు. ఇంతకు ముందు ఏ ఆసియా ఆటగాడు చేయలేని ఘనతను అతను చేశాడు. అదే సమయంలో, అతను గ్యారీ సోబర్స్ను కూడా ఒక ప్రత్యేక రికార్డుతో సమం చేశాడు.
Ravindra Jadeja Records: భారత టెస్ట్ క్రికెట్ చరిత్రలో ఆల్ రౌండర్ రవీంద్ర జడేజా తనకంటూ ఓ ప్రత్యేక స్థానాన్ని సంపాదించుకున్నారు. బ్యాటింగ్, బౌలింగ్, ఫీల్డింగ్లో తన అద్భుత ప్రదర్శనలతో జట్టుకు ఎన్నో విజయాలు అందించారు. తాజాగా ఇంగ్లాండ్తో జరుగుతున్న టెస్ట్ సిరీస్లో భాగంగా, 'సర్' జడేజా మరో అరుదైన మైలురాయిని అధిగమించారు. ఇంగ్లాండ్ గడ్డపై 1000 టెస్ట్ పరుగులు పూర్తి చేయడమే కాకుండా, 30కి పైగా వికెట్లు పడగొట్టిన మొట్టమొదటి ఆసియా ఆటగాడిగా చరిత్ర సృష్టించారు.
ఈ అద్భుతమైన ఘనతను సాధించిన ప్రపంచంలోనే మూడవ ఆల్ రౌండర్గా జడేజా నిలిచారు. ఇంతకుముందు ఇంగ్లాండ్ దిగ్గజ ఆల్ రౌండర్ విల్ఫ్రెడ్ రోడ్స్ (ఆస్ట్రేలియాలో 1032 పరుగులు, 42 వికెట్లు), వెస్టిండీస్ లెజెండ్ సర్ గ్యారీ సోబర్స్ (ఇంగ్లాండ్లో 1820 పరుగులు, 62 వికెట్లు) మాత్రమే ఈ ఘనతను సాధించారు. ఈ జాబితాలో జడేజా చేరడం, అది కూడా ఆసియా ఖండం నుంచి తొలి ఆటగాడిగా నిలవడం భారత క్రికెట్కు ఎంతో గర్వకారణం.
జడేజా ఇంగ్లాండ్లో ఇప్పటివరకు ఆడిన టెస్టుల్లో 1000కి పైగా పరుగులు (ఈ సిరీస్ లో 400+ పరుగులు) చేసి, 30కి పైగా వికెట్లు (ప్రస్తుతం 34 వికెట్లు) తీశారు. ఇంగ్లాండ్లో స్పిన్నర్లకు అంతగా అనుకూలించని పిచ్లపై ఒక ఆల్ రౌండర్గా ఇలాంటి ప్రదర్శన చేయడం జడేజా సామర్థ్యానికి నిదర్శనం.
ప్రస్తుత ఇంగ్లాండ్ సిరీస్లో జడేజా బ్యాటింగ్లో అద్భుతమైన ఫామ్ను కొనసాగిస్తున్నారు. ఇప్పటికే అనేక అర్ధసెంచరీలు సాధించి, భారత బ్యాటింగ్కు వెన్నెముకగా నిలిచారు. బౌలింగ్లో అంచనాలకు తగ్గట్టుగా వికెట్లు తీయకపోయినా, కీలక సమయాల్లో బ్యాటింగ్ ప్రదర్శనతో జట్టుకు అండగా నిలుస్తున్నారు.
ఈ ఘనతతో రవీంద్ర జడేజా భారత క్రికెట్ చరిత్రలో సునీల్ గవాస్కర్, సచిన్ టెండూల్కర్, రాహుల్ ద్రవిడ్, విరాట్ కోహ్లీ, కేఎల్ రాహుల్, రిషబ్ పంత్ వంటి దిగ్గజాల సరసన నిలిచారు. ఇంగ్లాండ్ గడ్డపై టెస్టుల్లో 1000 పరుగులు పూర్తి చేసిన ఏడవ భారత ఆటగాడిగా ఆయన రికార్డు సృష్టించారు.
ఈ మ్యాచ్ రెండో ఇన్నింగ్స్లో రవీంద్ర జడేజా కూడా 50 పరుగుల మార్కును చేరుకున్నాడు. ఈ సిరీస్లో ఇది అతనికి 5వ హాఫ్ సెంచరీ. ఈ సిరీస్లోని దాదాపు ప్రతి మ్యాచ్లోనూ అతను జట్టుకు బ్యాటింగ్తో తన వంతు సహకారం అందించాడు. అదే సమయంలో, ఇంగ్లాండ్లో 6 నుంచి 11వ నంబర్ మధ్య బ్యాటింగ్ చేస్తూ ఒక సిరీస్లో 5 హాఫ్ సెంచరీలు సాధించిన మొదటి ఆసియా ఆటగాడిగా కూడా అతను నిలిచాడు.