INDW vs AUSW T20 WC: ప్రారంభమైన ఆస్ట్రేలియా, భారత్ టీ20 సెమీస్.. గెలిస్తే ఫైనల్ లేదా ఇంటికే..!
ఐసీసీ ఉమెన్స్ టీ20 వరల్డ్‌కప్ 2023 టోర్నీలో భాగంగా టీమిండియాతో జరుగుతున్న సెమీ ఫైనల్ మ్యాచ్‌లో ఆస్ట్రేలియా టాస్ గెలిచి బ్యాటింగ్ ఎంచుకుంది. దక్షిణాఫ్రికా వేదికగా జరుగుతున్న ఈ టోర్నీ ‘గ్రూప్ బీ’ లో రెండు జట్లు టాప్ 2 స్థానాల్లో ఉన్నాయి.
ఉమెన్స్ టీ20 వరల్డ్‌కప్ 2023 ‘గ్రూప్ బీ’ టాప్ 2 స్థానాలలో ఉన్న ఆస్ట్రేలియా, భారత్ జట్ల మధ్య ఈ రోజు సెమీ ఫైనల్ జరుగుతోంది. తొలుత టాస్ గెలిచిన ఆస్ట్రేలియా ముందుగా బ్యాటింగ్‌ను ఎంచుకుంది.
మరోవైపు టీమిండియా ఆల్‌రౌండర్ పూజా వస్త్రాకర్ గాయం కారణంగా టోర్నీకి దూరం కావడంతో ఆమె స్థానంలో స్నేహ్ రాణా జట్టులోకి వచ్చింది. కెప్టెన్ హర్మన్ప్రీత్ కౌర్ కూడా మ్యాచ్‌కు ముందు అనారోగ్యంతో బాధపడినా.. మ్యాచ్‌లో కొనసాగుతోంది.
అయితే టీమిండియాపై ఆస్ట్రేలియాకి గొప్ప రికార్డు ఉంది. ఇప్పటిదాకా ఈ ఇరుజట్ల మధ్య 30 మ్యాచులు జరగగా 22 మ్యాచుల్లో ఆస్ట్రేలియానే గెలిచింది. 7 మ్యాచుల్లో భారత జట్టు గెలవగా..ఒక మ్యాచ్ ఫలితం తేలకుండానే రద్దయ్యింది.
ఇంకా ఉమెన్స్ టీ20 వరల్డ్‌కప్‌లో ఇప్పటి వరకూ ఐదు సార్లు భారత్, ఆస్ట్రేలియా జట్లు తలపడగా..టీమిండియా రెండు మ్యాచ్‌ల్లో మాత్రమే విజయం సాధించింది.
ఈ క్రమంలో ఉమెన్స్ టీ20 వరల్డ్‌ కప్ ఫైనల్‌లో టీమిండియా ఆడాలంటే.. ఆస్ట్రేలియాతో జరుగుతున్న సెమీఫైనల్‌లో భారత్ తప్పక గెలిచి తీరాలి. ఒక వేళ ఈ మ్యాచ్ చేజారితే టీమిండియా ఇంటిబాట పట్టాల్సిందే..!
భారత జట్టు: షెఫాలీ వర్మ, స్మృతి మంధాన, జెమీమా రోడ్రిగ్స్, హర్మన్ప్రీత్ కౌర్(కెప్టెన్), రిచా ఘోష్(వికెట్ కీపర్), దీప్తి శర్మ, యస్తికా భాటియా, స్నేహ్ రాణా, శిఖా పాండే, రాధా యాదవ్, రేణుకా ఠాకూర్ సింగ్
ఆస్ట్రేలియా జట్టు: అలీసా హీలి(వికెట్ కీపర్), బెత్ మూనీ, మెగ్ లానింగ్, అష్‌లీగ్ గార్నర్, ఎలీసా పెర్రీ, తహిళా మెక్‌గ్రాత్, గ్రాస్ హారీస్, జార్జియా వారెహం, జెస్ జానసెన్, మెగన్ స్కాట్, డార్సీ బ్రౌన్