WTC Final: పాక్తోపాటు టీమిండియాకు బిగ్ షాకిచ్చిన బంగ్లాదేశ్.. ఇక ఫైనల్ ఆడేది ఆ 2 జట్లే..?
WTC Points Table Updates: పాకిస్తాన్తో జరిగిన టెస్ట్ సిరీస్లో బంగ్లాదేశ్ చారిత్రాత్మక విజయాన్ని నమోదు చేసింది. సిల్హెట్ వేదికగా జరిగిన రెండో టెస్టులో 78 పరుగుల తేడాతో గెలిచి, సిరీస్ను 2-0తో క్లీన్స్వీప్ చేసింది. ఈ అద్భుత విజయంతో ప్రపంచ టెస్ట్ ఛాంపియన్షిప్ (డబ్ల్యూటీసీ) పాయింట్ల పట్టిక ఒక్కసారిగా మారిపోయింది. భారత్ సమీకరణాలపై కూడా ఇది తీవ్ర ప్రభావం చూపుతోంది.
Team India WTC Final Qualification: రెండో టెస్ట్ మ్యాచ్లో బంగ్లాదేశ్ విధించిన 437 పరుగుల భారీ లక్ష్యంతో బరిలోకి దిగిన పాకిస్తాన్ జట్టు, ప్రత్యర్థి బౌలర్ల దాటికి తట్టుకోలేక చేతులెత్తేసింది. మహ్మద్ రిజ్వాన్ ఒంటరి పోరాటం చేస్తూ 94 పరుగుల అద్భుత ఇన్నింగ్స్ ఆడినప్పటికీ, మిగిలిన ఆటగాళ్ల నుంచి సరైన మద్దతు లభించలేదు. దీంతో పాకిస్తాన్ రెండో ఇన్నింగ్స్ 358 పరుగుల వద్ద ముగిసింది. ఈ ఘోర పరాజయంతో పాకిస్తాన్ క్రికెట్ జట్టు పరువు గంగలో కలవడమే కాకుండా, టెస్ట్ ఛాంపియన్షిప్ రేసులో చావుదెబ్బ తింది.
పాకిస్తాన్ను వారి సొంత గడ్డపైనే మట్టికరిపించిన బంగ్లాదేశ్, పాయింట్ల పట్టికలో ఊహించని రీతిలో దూసుకుపోయింది. సిరీస్ ప్రారంభానికి ముందు ఎనిమిదో స్థానంలో ఉన్న బంగ్లా టైగర్స్, ఈ క్లీన్స్వీప్తో ఏకంగా ఐదో స్థానానికి చేరుకున్నారు. ప్రస్తుత డబ్ల్యూటీసీ సీజన్లో వారు ఆడిన నాలుగు మ్యాచ్లలో రెండింటిలో విజయం సాధించి, ఒకటి డ్రా చేసుకోగా, మరొకటి ఓడిపోయారు. ప్రస్తుతం బంగ్లాదేశ్ గెలుపు శాతం 58.33కి చేరింది. ఇది ప్రస్తుతానికి భారత జట్టు కంటే మెరుగ్గా ఉండటం గమనార్హం.
డబ్ల్యూటీసీ పట్టికలో భారత జట్టు ప్రస్తుత పరిస్థితి కాస్త ఆందోళనకరంగానే ఉంది. ఇంగ్లాండ్ పర్యటనను 2-2తో డ్రా చేసుకున్న భారత్, ఆ తర్వాత వెస్టిండీస్ను 2-0తో ఓడించింది. కానీ, దక్షిణాఫ్రికా చేతిలో 0-2తో సిరీస్ కోల్పోవడం భారత జట్టు అవకాశాలను దెబ్బతీసింది. ప్రస్తుతం 48.15 గెలుపు శాతంతో టీం ఇండియా ఆరో స్థానంలో కొనసాగుతోంది. అయితే బంగ్లాదేశ్ చేతిలో దారుణంగా ఓడిపోయిన పాకిస్తాన్ ఐదో స్థానం నుంచి ఎనిమిదో స్థానానికి పడిపోవడం భారత్కు ఒక రకంగా ఊరట కలిగించే అంశమే.
ప్రస్తుత పాయింట్ల పట్టికను పరిశీలిస్తే ఆస్ట్రేలియా జట్టు 87.50 గెలుపు శాతంతో అజేయంగా మొదటి స్థానంలో కొనసాగుతోంది. మరోసారి ఆస్ట్రేలియా ఫైనల్ చేరడం దాదాపు ఖాయంగా కనిపిస్తోంది. ఇక 77.78 శాతంతో న్యూజిలాండ్ రెండో స్థానంలో, 75 శాతంతో దక్షిణాఫ్రికా మూడో స్థానంలో ఉన్నాయి. ప్రస్తుత సమీకరణాల ప్రకారం ఆస్ట్రేలియా, న్యూజిలాండ్ జట్లు ఫైనల్ రేసులో అత్యంత బలంగా కనిపిస్తున్నాయి. నాలుగో స్థానంలో శ్రీలంక (66.67 శాతం) కొనసాగుతోంది.
బంగ్లాదేశ్ సాధించిన ఈ అద్భుత విజయం ఉపఖండపు క్రికెట్ సమీకరణాలను పూర్తిగా మార్చేసింది. పట్టికలో వెనుకబడిన భారత్, రాబోయే టెస్ట్ సిరీస్లలో భారీ విజయాలు సాధిస్తే తప్ప ఫైనల్ రేసులోకి రావడం కష్టం. లీగ్ దశ ముగిసేసరికి టాప్-2 లో నిలిచేందుకు అన్ని జట్ల మధ్య పోటీ ఇప్పుడు మరింత ఆసక్తికరంగా మారింది.