IPL 2026: 0,0,0,0,0,0.. 14 మ్యాచ్లలో 6సార్లు జీరోకే.. తలనొప్పిలా మారిన కాటేరమ్మకొడుకు
Abhishek Sharma's IPL 2026 Nightmare: 2024 ఐపీఎల్లో అద్భుతంగా రాణించిన అభిషేక్ శర్మ, 2026లో పేలవమైన ఫామ్ను ఎదుర్కొంటున్నాడు. అతను వరుసగా డకౌట్ అవుతూ, టీ20 ప్రపంచ కప్, ఐపీఎల్ 2026లో పరుగుల కరువును ఎదుర్కొంటున్నాడు. 75 రోజుల్లో 14 మ్యాచ్లలో 6 సార్లు డకౌట్ అవ్వడం సన్రైజర్స్ హైదరాబాద్ను ఆందోళనకు గురిచేసింది. జట్టు విజయం కోసం అతని ఫామ్ మెరుగుపడాల్సిన అవసరం ఉంది.
2024 ఐపీఎల్లో తన విధ్వంసకర బ్యాటింగ్తో సంచలనం సృష్టించిన అభిషేక్ శర్మ, దాదాపు ఏడాదిన్నర పాటు అంతర్జాతీయ క్రికెట్లో కూడా అదే తరహా సంచలనాన్ని కొనసాగించాడు. అయితే, 2026 సంవత్సరం ఇప్పటివరకు అతనికి అంతగా కలిసి రాలేదు. ఒకవైపు పరుగులు చేయడంలో విఫలమవుతున్న అభిషేక్, మరోవైపు ఖాతా తెరవడానికి కూడా ఇబ్బంది పడుతున్నాడు.
2026 టీ20 ప్రపంచకప్లో వరుసగా మూడుసార్లు సున్నా పరుగులకే అవుటై తన జట్టును ఇబ్బందుల్లోకి నెట్టిన అభిషేక్ శర్మ.. ఇప్పుడు ఐపీఎల్లో కూడా జీరోనే కంటిన్యూ చేస్తున్నాడు. లక్నో సూపర్ జెయింట్స్తో జరిగిన మ్యాచ్లో అతను మొదటి ఓవర్లోనే మహమ్మద్ షమీ బౌలింగ్లో వికెట్ ఇచ్చేశాడు.
2026లో అభిషేక్ శర్మ ఖాతా తెరవడంలో విఫలమవడం ఇది ఆరోసారి. జనవరి 21 నుంచి ఏప్రిల్ 5 వరకు జరిగిన టీ20 సిరీస్లో, అభిషేక్ మొత్తం 75 రోజుల్లో 14 టీ20 మ్యాచ్లు ఆడాడు. వీటిలో అతను ఆరుసార్లు డకౌట్ అయ్యాడు. న్యూజిలాండ్తో జరిగిన టీ20 సిరీస్లో కూడా అభిషేక్ రెండుసార్లు ఖాతా తెరవడంలో విఫలమయ్యాడు.
అభిషేక్ ఐపీఎల్ 2026లో ఇప్పటివరకు కేవలం మూడు మ్యాచ్లు మాత్రమే ఆడాడు. కానీ ఆ మూడు ఇన్నింగ్స్లలో అతను 18 సగటుతో కేవలం 55 పరుగులు మాత్రమే చేశాడు. అంతకుముందు, అతను కేకేఆర్పై 48 పరుగులు, ఆర్సీబీపై కేవలం 7 పరుగులు మాత్రమే చేశాడు.
ఇప్పుడు, ఏప్రిల్ 11, శనివారం నాడు, సన్రైజర్స్ హైదరాబాద్ తమ నాలుగో మ్యాచ్లో పంజాబ్ కింగ్స్తో తలపడనుంది. ఈ లీగ్లో ఇప్పటివరకు సన్రైజర్స్ ఒక మ్యాచ్ గెలిచి, రెండు మ్యాచ్లు ఓడిపోయింది. అందువల్ల, తదుపరి రౌండ్కు అర్హత సాధించాలంటే సన్రైజర్స్ మిగిలిన మ్యాచ్లలో తప్పక గెలవాలి. అది జరగాలంటే, అభిషేక్ జట్టు కోసం రాణించాల్సి ఉంటుంది.