Aamani: ఆరోజు సౌందర్య నాకు ఫోన్ చేసి బోరున ఏడ్చేసింది.. అసలేం జరిగిందంటే.. ఆమని కామెంట్స్..
తెలుగులో ఒకప్పుడు అగ్ర కథానాయికగా ఓ వెలుగు వెలిగిన హీరోయిన్ ఆమని. రోజా, మీనా, సౌందర్య వంటి హీరోయిన్లతోపాటు తనకంటూ మంచి ఇమేజ్ క్రియేట్ చేసుకుంది. ముఖ్యంగా ఫ్యామిలీ ప్రేక్షకులకు ఇష్టమైన హీరోయిన్. ప్రస్తుతం సెకండ్ ఇన్నింగ్స్ లో అటు సీరియల్స్.. ఇటు సినిమాలతో బిజీగా ఉంటుంది.
ఒకప్పుడు తెలుగులో వరుస సినిమాలతో కథానాయికగా తనదైన ముద్ర వేసింది హీరోయిన్ ఆమని. ముఖ్యంగా జగపతి బాబు, ఆమని కాంబోలో వచ్చిన చిత్రాలు బాక్సాఫీస్ వద్ద మంచి విజయాన్ని సాధించాయి. అప్పట్లో గ్లామర్ పాత్రలకు దూరంగా హోమ్లీ హీరోయిన్ గా ఇమేజ్ క్రియేట్ చేసుకుంది. ప్రస్తుతం సెకండ్ ఇన్నింగ్స్ స్టార్ట్ చేసిన ఆమె.. అటు బుల్లితెరపై సీరియల్స్.. ఇటు సినిమాల్లో కీలకపాత్రలు పోషిస్తూ బిజీగా ఉంటుంది. ఇటీవల ఓ ఇంటర్వ్యూలో తన సినీ ప్రయాణంతోపాటు.. దివంగత హీరోయిన్ సౌందర్యతో తనకున్న అనుబంధం గురించి చెప్పుకొచ్చింది.
తన తండ్రి మరణించిన విషాద సమయంలో ఆమెకు మంచి సినిమా అవకాశం వచ్చిందని.. ఆ సమయంలో తనకు వెళ్ళాలనే ఆసక్తి లేకపోయినా, తన తల్లి ప్రోత్సాహంతో ఆడిషన్స్కు హాజరైనట్లు తెలిపింది. దర్శకుడు ఈవీవీకి తన తండ్రి మరణించిన విషయం తెలిసి, డిప్రెషన్లో ఉన్నారని చెప్పడంతో, తనను చూసిన తర్వాత దర్శకుడు షాక్ అయ్యారని ఆమని గుర్తు చేసుకున్నారు. ఫోటోలలో కనిపించినంత అందంగా లేరని భావించిన ఈవీవీ, అప్పటికప్పుడు మేకప్ వేసి వీడియో టెస్ట్ చేయించారని అన్నారు. ఆ టెస్ట్లో ఆమె 100% ఓకే అవ్వడంతో, వెంటనే అడ్వాన్స్ ఇచ్చి సినిమాకు ఎంపిక చేశారు.
అప్పట్లో తండ్రిని కోల్పోయిన దుఃఖంలో ఉన్నప్పటికీ, "జంబలకిడి పంబ" వంటి పెద్ద హిట్ సినిమా ఆమె జీవితానికి ఒక మలుపునిచ్చింది. అక్కడ నుండి తమిళ చిత్రసీమకు దూరమై, తెలుగు సినీ పరిశ్రమలో స్థిరపడ్డారు. ఆ తర్వాత "మిస్టర్ పెళ్ళాం" చిత్రంతో రాజేంద్ర ప్రసాద్తో కలిసి నటించి, బాపు వంటి గొప్ప దర్శకుడితో పనిచేసే అవకాశం వచ్చింది. ఈ సినిమా ఆమెకు మంచి నటిగా పేరును, అవార్డును తెచ్చిపెట్టింది. తన కెరీర్ విజయం వెనుక కేవలం తన టాలెంట్ మాత్రమే కాదని, దైవశక్తి, తండ్రి ఆశీస్సులు ఉన్నాయని ఆమని బలంగా నమ్ముతారు.
సౌందర్యతో తన స్నేహం గురించి మాట్లాడుతూ, తామిద్దరూ బెంగళూరు కావడం, కన్నడ భాష మాట్లాడటం తమను కలిపిందని ఆమని తెలిపారు. "అన్నాచెల్లెలు", "అమ్మదొంగ" వంటి నాలుగు, ఐదు చిత్రాలలో కలిసి నటించినప్పుడు, షూటింగ్ సమయంలో కన్నడ పాటలు పాడుకుంటూ, భాషను పంచుకుంటూ చాలా సన్నిహితంగా మారారు. వ్యక్తిగత విషయాలు కూడా పంచుకునేవారని చెప్పారు. వివాహానంతరం కూడా వారి స్నేహం కొనసాగిందని, సౌందర్య తన తండ్రి మరణించినప్పుడు ఫోన్ చేసి ఓదార్చిందని ఆమని గుర్తు చేసుకున్నారు. సౌందర్య ఎంత పెద్ద హీరోయిన్ అయినా, ప్రశాంత్ కుటీర్లో ఉండేదని, ఆ వెజిటేరియన్ ఫుడ్, ఇంటి వాతావరణం తనకు చాలా ఇష్టమని ఆమని వివరించారు. సౌందర్య తన గదిని కూడా మార్చలేదని, ఆ ప్రశాంత్ కుటీర్ను విడిచిపెట్టలేదని ఆమని తెలిపారు.
"సౌందర్య నాకు చాలా క్లోజ్ ఫ్రెండ్. ఇప్పటికీ ఎక్కడైనా ఆమె పేరు వినిపించినా, ఆమె ఫోటో చూసినా నేను తట్టుకోలేకపోతాను, కళ్లల్లో నీళ్లు తిరుగుతాయి" అంటూ ఆమని ఆవేదన వ్యక్తం చేశారు. "ఆమె చనిపోయిన రోజు నేను వేరే ఒక సినిమా షూటింగ్లో బిజీగా ఉన్నాను. అంతకు ముందే తను నన్ను కలవడానికి రమ్మని అడిగింది. కానీ నాకున్న షూటింగ్ షెడ్యూల్స్ వల్ల నేను వెళ్లలేకపోయాను. ఆ తర్వాత కొద్దిసేపటికే ఆమె హెలికాప్టర్ ప్రమాదంలో మరణించిందనే వార్త విని నేను తీవ్ర దిగ్భ్రాంతికి గురయ్యాను" అని ఆమని చెప్పారు.