Upcoming EVs: మార్కెట్లోకి క్యూ కడుతున్న ఎలక్ట్రిక్ కార్లు.. లిస్ట్‌లో టాప్ బ్రాండ్లు..
మన దేశం ఎలక్ట్రిక్ వాహనాలకు హబ్ మారుతోంది. కొనుగోళ్లు బాగా పెరుగుతున్నాయి. ద్విచక్ర వాహనాల నుంచి కార్లు, బస్సుల వరకూ మార్కెట్లో దర్శనమిస్తున్నాయి. టాప్ బ్రాండ్లకు చెందిన కార్లు మన దేశంలో లాంచ్ అవుతున్నాయి. మరికొన్ని టాప్ మోడళ్లు లాంచింగ్ రెడీ అయ్యారు. రానున్న సంవత్సరం అంటే 2024 చివరి నాటికి దాదాపు పది కొత్త ఎలక్ట్రిక్ కార్లు మన దేశీయ మార్కెట్లోకి అడుగు పెట్టబోతున్నాయి. వాటిల్లో ప్రపంచ వ్యాప్తంగా పేరు పొందిన బ్రాండ్లు ఉన్నాయి. ఈ నేపథ్యంలో మార్కెట్లో విడుదలకు సిద్ధంగా ఉన్న టాప్ ఐదు కార్ల గురిచి ఇప్పుడు తెలుసుకుందాం..
ఎంజీ విండ్సర్ ఈవీ.. ఈ జాబితాలోని మొదటి ఎలక్ట్రిక్ కారు జేఎస్‌డబ్ల్యూ ఎంజీ మోటార్ నుంచి వస్తోంది. దీని పేరు ఎంజీ విండ్సర్ ఈవీ. ఇది విడుదలకు సిద్ధంగా ఉంది. ఈ ఏడాది సెప్టెంబర్ 11న ఇది మన దేశంలో లాంచ్ కానుంది. ఈ బ్రాండ్ నుంచి వస్తున్న మూడో ఎలక్ట్రిక్ కారు ఇది. కామెట్ ఈవీ, జెడ్ఎస్ ఈవీల తర్వాత బ్రిటీష్ బ్రాండ్ ఎంజీ నుంచి వస్తున్న మూడో కారు ఈ విండ్సర్. ఈ కొత్త కారు 50.6కేడబ్ల్యూహెచ్ బ్యాటరీ ప్యాక్ తో వచ్చే అవకాశం ఉంది. దీనిని ఒక్కసారి ఛార్జ్ చేస్తే దాదాపు 460 కి.మీ వస్తుందని చెబుతున్నారు. ప్రధాన ఫీచర్లలో పెద్ద 15.6-అంగుళాల టచ్ స్క్రీన్ ఇన్ఫోటైన్మెంట్ సిస్టమ్, ఎయిర్ లైన్-రకంగా ఉండే వెనుక సీట్లు 135-డిగ్రీ రిక్లైనింగ్ ఫంక్షన్లతో లాంజ్ లాంటి వైబ్, పనోరమిక్ సన్రూఫ్ వంటివి ఉన్నాయి.
కియా ఈవీ9.. కొరియన్ ఆటో దిగ్గజం కియా నుంచి వస్తున్న ఎస్ యూవీ మోడల్ కియా ఈవీ9. ఈ కారు అక్టోబర్ 3న మన దేశంలో లాంచ్ చేసేందుకు సర్వం సిద్ధం చేస్తున్నారు. అదే రోజు కొత్త తరం కార్నివాల్ ఎంపీవీని కూడా విడుదల చేస్తున్నారు. ఈవీ9 ఒక వేరియంట్ గానే మార్కెట్లో అందుబాటులో ఉంటుంది. ఇది ఒకసారి చార్జ్ చేస్తే దాదాపు 434 కిలోమీటర్ల పరిధిని అందిస్తుంది. 379 బీహెచ్పీ, 700ఎన్ఎం టార్క్ అవుట్పుట్, లెవెల్-3 అడాస్ సూట్ వంటి మరిన్ని ఫీచర్లు ఉంటాయని చెబుతున్నారు.
బీవైడీ ఈ6.. గ్లోబల్ వైడ్ గా ఎలక్ట్రిక్ కార్ల దిగ్గజం టెస్లాకు చెమటలు పట్టిస్తున్న చైనా ఈవీ బ్రాండ్ బీవైడీ. ఈ కంపెనీ నుంచి ఈ6 ఎలక్ట్రిక్ ఎంపీవీని కొత్త అవతార్ లో లాంచ్ చేసేందుకు కసరత్తు చేస్తోంది. దీనికి సంబంధించిన టీజర్ కూడా విడుదల చేసింది. దీనిలో డిజైన్ అప్డేట్లతో పాటు, కొత్త ఈ6 పెద్ద 12.8- అంగుళాల ఫ్లోటింగ్ టచ్ స్క్రీన్ ఇన్ఫోటైన్మెంట్ సిస్టమ్, పనోరమిక్ సన్రూఫ్, వెంటిలేటెడ్ ఫ్రంట్ సీట్లు, 360-డిగ్రీ సరౌండ్ వ్యూ కెమెరా, మరిన్నింటిని పొందే అవకాశం ఉంది. ఇది ఒక పెద్ద 71.7కేడబ్ల్యూహెచ్ బ్యాటరీ ప్యాక్ ను కలిగి ఉంటుంది. ఒకే చార్జ్ తో దాదాపు 530 కిలోమీటర్ల పరిధిని అందిస్తుంది. 204 బీహెచ్పీ, 310ఎన్ఎం టార్క్ అవుట్ పుట్ ను అందిస్తుంది. అలాగే డీసీ ఫాస్ట్ ఛార్జింగ్ సామర్థ్యం కలిగి ఉంటుంది.
మెర్సిడెస్ బెంజ్ ఈక్యూజీ/ఎలక్ట్రిక్ జీ వ్యాగన్.. మన దేశంలో అత్యంత ఖరీదైన ఎలక్ట్రిక్ కారు మేబ్యాక్ ఈక్యూఎస్ 680ని విడుదల చేసిన తర్వాత.. ఈ లగ్జరీ బ్రాండ్ నుంచి ఈక్యూజీ/ ఎలక్ట్రిక్ జీ వ్యాగన్ పేరుతో కొత్త ఎస్ యూవీ రానుంది. బెంజ్ ఇప్పటికే భారతదేశంలో జీ-క్లాస్ ఎస్‌యూవీ ఎలక్ట్రిఫైడ్ వెర్షన్ కోసం బుకింగ్ ను తెరిచింది. ఇది గతంలో ఈక్యూజీ కాన్సెప్ట్ ఎలక్ట్రిక్ ఎస్‌యూవీగా గ్లోబల్ మార్కెట్లలో ప్రదర్శితమవుతోంది. ఈ సంవత్సరం చివరి నాటికి దీనిని లాంచ్ చేసే అవకాశం ఉంది. ఈ ఎలక్ట్రిక్ ఎస్ యూవీలో 116కేడబ్ల్యూహెచ్ బ్యాటరీ ప్యాక్ ఉంటుంది. దీనిని ఒక్కసారి చార్జ్ చేస్తే 470 కిలోమీటర్ల రేంజ్ ఇస్తుంది.
టాటా హారియర్ ఈవీ.. భారతదేశంలో ఎలక్ట్రిక్ కార్ల సెగ్మెంట్లో టాటా మోటార్స్ అగ్రగామిగా ఉంది. అనేక మోడళ్ల ఈవీలు ఈ కంపెనీ నుంచి అందుబాటులో ఉన్నాయి. దీనిని మరింత విస్తరించేందుకు టాటా మోటార్స్ యోచిస్తోంది. ఈ క్రమంలో టాటా హారియర్ ఈవీని లాంచ్ చేసేందుకు ముహూర్తం ఖరారు చేసింది. ప్రస్తుతం ఉన్న ఐసీఈ మోడల్లో చిన్న చిన్న మార్పులు చేసి, డిజైన్ ను అలాగే ఉంచుతోంది. ఇది రెండు బ్యాటరీ ఆప్షన్లలో వచ్చే అవకాశం ఉంది. ఆల్-వీల్-డ్రైవ్ సెటప్ సామర్థ్యాలు, 500 కి.మీ కంటే ఎక్కువ రేంజ్ అంచనా వేస్తున్నారు.