MG Comet Electric Car: రోజుకు రూ.17ఖర్చుతో 230 కిలోమీటర్లు ప్రయాణించొచ్చు.. ఎంజీ ఎలక్ట్రిక్ కారు మామూలుగా లేదుగా..
గ్లోబల్ మార్కెట్లో ఎలక్ట్రిక్ కార్లకు డిమాండ్ పెరుగుతోంది. అన్ని కంపెనీల నుంచి విద్యుత్ శ్రేణి వాహనాలు వస్తున్నాయి. ఇటీవలే ప్రపంచ దిగ్గజ బ్రాండ్ అయిన మోరిస్ గ్యారెజెస్(ఎంజీ) నుంచి మన దేశంలో ఓ బుల్లి కారు లాంచ్ అయ్యింది. దాని పై ఎంజీ కామెట్. ఇది చూడటానికి చిన్నగా ఉన్నా అందులోని ఫీచర్లు ఆకర్షిస్తున్నాయి. దీంతో ఈ కార్లను కూడా పెద్ద సంఖ్యలోనే కొనుగోలు చేస్తున్నారు. సాధారణంగా ఎలక్ట్రిక్ కార్ల ధర ఎక్కువగానే ఉన్నా.. రన్నింగ్ కాస్ట్ చాలా తక్కువ ఉంటుంది. ఈ ఎంజీ కామెట్ కారైతే ఓ పిజ్జా కోసం ఖర్చుపెట్టే నగదుతో మొత్తం నెలంతా తిరిగేయొచ్చు. ఈ నేపథ్యంలో ఈ కారుకు సంబంధించిన పూర్తి వివరాలు ఇప్పుడు చూద్దాం..
ఎంజీ నుంచి వచ్చిన రెండో ఎలక్ట్రిక్ కారు ఈ కామెట్. ఇది చాలా తక్కువ ఖర్చుతో మనం ప్రయాణాలు చేయొచ్చు. ఈ మినీ ఎలక్ట్రిక్ కారును మీరు కేవలం రూ. 7.98లక్షల ప్రారంభ ధరతో ఇంటికి తీసుకురావొచ్చు. దీని రన్నింగ్ కాస్ట్ ఒక నెలకు పిజ్జా ధరకంటే తక్కువగా ఉంటుంది.
దీనికి రెండు, నాలుగు సీట్లు ఉంటాయి. ఈ ఏడాదే ఎంజీ ఈ కారును విడుదల చేసింది. పలు వేరియంట్లలో అందుబాటులో ఉంది. ఒక్కో వేరియంట్లో ఒక్కోరకమైన ఫీచర్లు ఉన్నాయి. ఎంజీ కామెట్ ఫేస్ ధర రూ. 7.98లక్షలు కాగా, ఎంజీ కామెట్ ప్లే ధర రూ. 9.28లక్షలు, ఎంజీ కామెట్ ప్లష్ ధర రూ. 9.98లక్షలు ఉంటుంది.
ఈ కారులో 10.25 అంగుళాల టచ్ స్క్రీన్ ఇన్ఫోటైన్ మెంట్ సిస్టమ్ ఉంటుంది. వైర్ సెల్ ఆండ్రాయిడ్ ఆటో, ఆపిల్ కార్ ప్లేలను మద్దతు ఇస్తుంది. స్టీరింగ్ వీల్ పై కంట్రోల్ బటన్లు ఉంటాయి. ఇది 17.3 కేడబ్ల్యూహెచ్ బ్యాటరీని కలిగి ఉంటుంది. ఎలక్ట్రిక్ మోటార్ 41బీహెచ్పీ శక్తిని, 110ఎంఎన్ టార్క్ ను ఉత్పత్తి చేస్తుంది.
ఈ బ్యాటరీని ఒక్కసారి చార్జ్ చేస్తే 230 కిలోమీటర్లు పరిధిని అందిస్తుంది. దీనిలో పోర్టబుల్ చార్జర్ అందుబాటులో ఉంటుంది. 3.3 కేడబ్ల్యూ చార్జర్ తో ఏడుగంటల్లోనే ఫుల్ చార్జ్ అవుతుంది. 5 గంటల్లోనే సున్నా నుంచి 80శాతం వరకూ చార్జ్ అవుతుంది.
ఇక సేఫ్టీ విషయానికి వస్తే డ్యూయల్ ఎయిర్ బ్యాగ్స్, ఈబీడీ, ఏబీఎస్, రియర్ పార్కింగ్ సెన్సార్, సీట్ బెల్ట్ రిమైండర్, స్పీడ్ అలర్ట్ సిస్టమ్, టైర్ ప్రెజర్ మానిటరింగ్ సిస్టమ్, రివర్స్ పార్కింగ్ కెమెరా, స్పీడ్ సెన్సింగ్ డోర్ లాక్ ఫంక్షన్ వంటి ఫీచర్లు ఉంటాయి. ఈ కారులో 55 కంటే ఎక్కువ కార్ ఫీచర్లు, వైర్ లెస్ ఆండ్రయిడ్, ఆపిల్ కార్ ప్లే, ఫోటింగ్ ఆపిల్ కార్ ప్లే, ఫ్లోటింగ్ ట్విన్ డిస్ ప్లే, 100 కంటే ఎక్కువ వాయిస్ కమాండ్లు, డిజిటల్ కీ వంటి అత్యాధునిక ఫీచర్లు ఉంటాయి.
నెల మొత్తానికి దీనిని చార్జ్ చేయడానికి కేవలం రూ. 519 మాత్రమే ఖర్చు అవుతుందని కంపెనీ పేర్కొంది. నెలకు 1000 కిలోమీటర్ల పరిధిని దృష్టిలో పెట్టుకొని దీనిని లెక్కించారు. దీని ప్రకారం చూస్తే రోజుకు చార్జింగ్ కోసం అయ్యే ఖర్చు కేవలం రూ. 17 మాత్రమే.(ఇది ఢిల్లీలో కరంట్ చార్జీల ఆధారంగా ఇచ్చినది)