Hero Vida V1 Pro: టాప్ గేర్లో విడా వీ1 ప్రో అమ్మకాలు.. ఈ స్కూటర్లో ప్రత్యేకతలివే..
దేశంలో ఎలక్ట్రిక్ ద్విచక్ర వాహనాల వినియోగం విపరీతంగా పెరిగింది. పర్యావరణ పరిరక్షణ, ప్రభుత్వం ఇస్తున్న ప్రోత్సాహంతో వీటి మార్కెట్ వృద్ధి చెందుతోంది. అన్ని కంపెనీలు తమ ఉత్పత్తులను మన దేశ మార్కెట్లో ప్రవేశపెట్టేందుకు ప్రయత్నిస్తున్నాయి. ఇప్పటికే మార్కెట్లో ఓలా, ఏథర్, టీవీఎస్, హీరో వంటి బ్రాండ్లు ఎలక్ట్రిక్ స్కూటర్ల విక్రయాల్లో టాప్ లేపుతున్నాయి. హీరో మోటో కార్ప్‌ నుంచి అందుబాటులో ఉన్న విడా వీ1 కూడా వినియోగదారులను బాగా ఆకర్షిస్తోంది. విడా వి1 ప్రో, విడా వీ1 ప్లస్ అనే రెండు వేరియంట్లు మార్కెట్లో అందుబాటులో ఉన్నాయి. వాటిల్లో హీరో విడా వీ1 ప్రో మాత్రం అత్యధిక సేల్స్ రాబడుతోంది. ఇప్పుడు దీనికి సంబంధించిన పూర్తి వివరాలు చూద్దాం..
రిమూవబుల్ బ్యాటరీ.. హీరో విడా వీ1 ప్రో అత్యధికంగా అమ్ముడవుతోంది. రిమూవ్ చేయగల బ్యాటరీలు ఉండడం దీని ప్రత్యేకత. వినియోగదారులు బ్యాటరీ ప్యాక్‌లను బయటకు తీసి, వాటిని చార్జింగ్ చేయడానికి ఇంటికి తీసుకెళ్లవచ్చు. వీటిని బండి నుంచి చాలా సులభంగా తొలగించే వీలుంది. ఉదాహరణకు మీరు అపార్టుమెంట్‌ లో నివసిస్తున్నారు. మీరు బండి పార్కింగ్ చేసే చోట చార్జింగ్ పెట్టుకునే వీలు ఉండదు. అలాంటి సమయంలో బండిలోని బ్యాటరీలను బయటకు తీసి ఫ్లాట్ లో చార్జింగ్ పెట్టుకునే అవకాశం ఉంది.
సామర్థ్యం ఇది.. విడా ఎలక్ట్రిక్ స్కూటర్ లోని పీఎమ్ఎస్ఎమ్ మోటార్ శక్తివంతంగా పనిచేస్తుంది. ఇది 3.9 కేడబ్ల్యూ నుంచి నిరంతర శక్తిని, 6 కేడబ్ల్యూహెచ్ గరిష్ట శక్తిని ఉత్పత్తి చేయగలదు. అలాగే టార్క్ అవుట్‌పుట్ 25 ఎన్ఎమ్ గా ఉంది.
స్క్రీన్ ఫీచర్స్.. ప్రయాణం ఎలాంటి ఇబ్బందులు లేకుండా సాఫీగా సాగిపోతుంది. దీనిలోని టీఎఫ్‌టీ స్క్రీన్ ను ఎడమ స్విచ్ గేర్‌లోని బటన్ల ద్వారా నియంత్రించవచ్చు. ప్రత్యేక సెన్సార్ తో డే, నైట్ మోడ్ లకు మార్చుకోవచ్చు. అలాగే బ్లూటూత్ కనెక్టివిటీ సౌకర్యం కూడా ఉంది.
బూట్ స్పేస్.. విడా వీ1 ప్రో ఎలక్ట్రిక్ స్కూటర్ లో బూట్ చాలా విశాలంగా, లోతుగా ఉంది. దీనిలో హెల్మెట్‌ను సురక్షితంగా స్టోర్‌ చేసుకోవచ్చు. ముందుగా భాగంలో ఛార్జర్‌ను పెట్టుకోవడానికి వీలుగా ఖాళీ ఉంచారు.
సరికొత్తగా లైట్లు.. లెడ్ హెడ్‌ల్యాంప్‌ లో ప్రత్యేకమైన డేటైమ్ రన్నింగ్ ల్యాంప్‌ ఉంది. దీని డిజైన్ లాంగ్వేజ్ టెయిల్ ల్యాంప్‌కు కూడా ఫార్వార్డ్ చేశారు. రాత్రి సమయంలో ప్రయాణానికి వీలుగా కాంతివంతమైన లైటింగ్‌ ను ఇస్తుంది.