Vadiyalu Pulusu: కూరగాయలు లేనప్పుడు క్షణాల్లో చేసుకునే నాటు స్టైల్ మినప వడియాల పులుసు.. అన్నంలోకి అద్భుతం!
Minapa Vadiyalu Pulusu Recipe: తెలుగువారి సాంప్రదాయ వంటకాలలో పులుసు వంటకలకు ఉన్న స్థానం ప్రత్యేకమైనది. వేసవి కాలంలో ముందస్తుగా సిద్ధం చేసుకుని నిల్వ ఉంచుకునే రకరకాల ఒడియాలలో మినప వడియాలు ఎంతో ప్రసిద్ధమైనవి. సాధారణంగా వీటిని నూనెలో వేయించుకుని నంజుకోవడానికి వాడుతుంటారు.
కానీ ఇంట్లో కూరగాయలు ఏమీ లేనప్పుడు లేదా ఎప్పుడైనా కారకారంగా, పుల్లపుల్లగా నోటికి రుచిగా తినాలనిపించినప్పుడు ఈ మినప వడియాలతో అద్భుతమైన పులుసు తయారు చేసుకోవచ్చు. వేడి వేడి అన్నంలో ఈ మినప వడియాల పులుసు వేసుకుని తింటే వేరే ఏ కూరా అవసరం లేకుండా కడుపు నిండా తినేయవచ్చు.
ఈ మినప వడియాల పులుసు తయారీ విధానం ఎంతో సులభం. ముందుగా బాండీలో రెండు టేబుల్ స్పూన్ల నూనె వేసి కాగాక, ఒక కప్పు మినప వడియాలు వేసి దోరగా ఎర్రటి రంగు వచ్చే వరకు వేయించి ఒక ప్లేట్లోకి తీసుకోవాలి. వడియాలు నూనెలో సరిగ్గా వేగితేనే పులుసులో నానిన తర్వాత కూడా మంచి రుచిని ఇస్తాయి.
ఇప్పుడు అదే బాండీలో మరికొద్దిగా నూనె వేసి సన్నగా తరిగిన రెండు కప్పుల ఉల్లిపాయ ముక్కలు, పచ్చిమిర్చి, కరివేపాకు వేసి దోరగా వేయించాలి. ఉల్లిపాయలు దోరగా వేగిన తర్వాత ఒక కప్పు టమోటా ప్యూరీ వేసి నూనె పైకి తేలే వరకు ఉడికించాలి.
ఆ తర్వాత అందులో సరిపడా ఉప్పు, ఒక టేబుల్ స్పూన్ కారం, పావు టీస్పూన్ పసుపు, ఒక టీస్పూన్ ధనియాల పొడి మరియు చిటికెడు ఇంగువ వేసి మసాలాలన్నీ నూనెలో బాగా వేగేలా కలుపుకోవాలి. మసాలాలు వేగిన తర్వాత ముందుగా వేయించి పెట్టుకున్న మినప వడియాలు వేసి బాగా కలిపి, అందులో ఒక కప్పు చింతపండు రసం మరియు ఒక కప్పు నీళ్లు పోసి కలపాలి.
మూతపెట్టి సన్నటి మంటపై పులుసు దగ్గరపడే వరకు ఉడికించాలి. పులుసు బాగా మరుగుతున్నప్పుడు ఒక టేబుల్ స్పూన్ బెల్లం తురుము, ఒక టీస్పూన్ నెయ్యి వేయాలి. బెల్లం, నెయ్యి వేయడం వల్ల పులుసుకి అద్భుతమైన రుచి సమతుల్యత లభిస్తుంది. చివరగా కొత్తిమీర చల్లుకుని దింపేస్తే గుమగుమలాడే మినప వడియాల పులుసు సిద్ధమవుతుంది.