ఇదేదో పిచ్చి మొక్క అనుకుంటే పొరపాటే.. కిడ్నీలో రాళ్లను కరిగించే పిండి కూర.. ఆరోగ్య ప్రయోజనాలు తెలిస్తే..
ఆకుకూరల్లో పోషక పదార్ధాలు సమృద్ధిగా ఉంటాయి. అందుకే శరీర పెరుగుదల, దృఢత్వానికి, చక్కని ఆరోగ్యానికి ఇవి చాలా ముఖ్యమైనవి. మన చుట్టూ ఉన్న ప్రకృతిలో అనేక రకాల ఆకుకూరలు వినియోగంలో ఉన్నాయి. వీటిలో పాలకూర, తోటకూర, గోంగూర, మెంతికూర, మునగాకులు, పుదీన తదితరాలు ప్రముఖమైనవి. వీటితో పాటు తెల్లగలిజేరు, పొన్నగంటికూర, గొర్మిటికూర, పిండికూర వంటివి పుష్కలమైన పోషకాలు, ఆరోగ్యప్రయోజనాలు కలిగినవి కూడా ఉన్నాయి. అనారోగ్య సమస్యలతో ఇబ్బంది పడుతున్నవారికి కొన్ని రకాల ఆకు కూరలు అద్భుత సంజీవనిగా పనిచేస్తాయి. అలాంటి వాటిలో పిండికూర ఒకటి. పిండి కూరతో కలిగే ఆరోగ్య ప్రయోజనాలు తెలిస్తే ఆశ్చర్యపోతారు.
ఆకుకూరలు ఎక్కువగా ఖనిజ పోషకాలు, ఇనుముధాతువు కలిగి ఉంటాయి. శరీరంలో ఐరన్‌లోపం కారణంగా అనీమియాతో ఇబ్బంది పడుతున్న వారు ప్రతిరోజూ తీసుకొనే ఆహారంలో ఆకుకూరలను తప్పకుండా చేర్చాలి. దీంతో అనీమియాను నివారించి, చక్కని ఆరోగ్యాన్ని పొందవచ్చు అంటున్నారు ఆరోగ్య నిపుణులు. ఆకుకూరల్లో కాల్షియం, బీటాకెరోటిన్, విటమిన్ - సి కూడా పుష్కలంగా ఉంటాయి. ఆకుకూరలద్వారా లభించే కెరోటిన్ మనశరీరంలో విటమిన్-ఎ గా మారి అంధత్వం రాకుండా చేస్తుంది. విటమిన్-సి ఆరోగ్యకరమైన ఎముకలు, దంతాలకు చాలా అవసరమైన పోషకం. ఆకుకూరల్లో కొన్ని రకాల బి- కాంప్లెక్స్ విటమిన్లు కూడాఉంటాయి.
పిండి కూర ఆకును మనం పల్లెటూళ్లలో ఎక్కడపడితే అక్కడ విరివిగా చూస్తుంటాం. ఈ పిండి కూర మన ఇంటి ముందు, మన పెరట్లో, చెలకల్లో అంతటా కనిపిస్తుంది. సంక్రాంతి సమయంలో గొబ్బెమ్మలకు గరిక, రేగు పండ్లు, నవ ధాన్యాలతోపాటు ఈ పిండి కూర రెక్కలను కూడా అలంకరిస్తారు. కొండపిండి చెట్టు అని, తెలగ పిండి చెట్టు అని కూడా పిలుస్తారు. అయితే పిండి కూర ఆకులకు విశేషమైన గుణం ఉందంటున్నారు ఆయుర్వేద ఆరోగ్య నిపుణులు. ఈ పిండికూరను పాషాణభేది అని కూడా అంటారు. అంటే రాళ్లను కూడా కరిగిస్తుందని దీని అర్థం. కిడ్నీలో రాళ్లను కరిగించే అద్భుత గుణం ఈ పిండికూరలో ఉందంటున్నారు నిపుణులు.
పిండి కూర మొక్కను వేర్లతో సహా ఉపయోగిస్తారు. ఇందుకోసం కావాల్సిన మోతాదులో పిండికూర మొక్కలను తీసుకుని బాగా కడగాలి. దానిని తురిమి అర లీటరు నీటిలో వేసి మరగబెట్టాలి. ఈ నీరు సగానికి మరిగిన తరువాత స్టౌవ్‌ ఆఫ్‌ చేసుకుని వడబోసుకోవాలి. దీనికి ఒక 30 గ్రాముల పటిక బెల్లం. 2 గ్రాముల శిలాజిత్ పొడి కలుపుకోవాలి. ఈ మిశ్రమాన్ని ప్రతిరోజూ పరగడపున.. తాగాలి. ఈ కషాయం తాగిన గంట వరకు ఎలాంటి ఆహారం తీసుకోకుండా ఉండాలని నిపుణులు చెబుతున్నారు. ఇలా చేస్తే మూత్రాశయంలో, కిడ్నీలో ఉన్న రాళ్లు కరిగి మూత్రం ద్వారా వెళ్లిపోతాయని చెబుతున్నారు.
పిండి కూర మొక్కను వేర్లతో సహా తెచ్చి బాగా కడిగి మెత్తగా దంచాలి. ఒక ముద్దలాగా చేసి ఒక గుడ్డలో వేసి పిండితే రసం వస్తుంది. సమపాళ్లలో పటిక బెల్లం కలపాలి. ఇప్పుడు దీనిని సన్నని మంటపై మరిగించాలి. లేతగా పాకం వచ్చే వరకూ మరిగించాలి. ఆ తరువాత చల్లార్చి నిల్వ ఉంచుకోవచ్చు. దీనిని పెద్దవాళ్లయితే రోజుకు ఒకటి రెండు చెంచాలు, పిల్లలైతే అర చెంచా రోజూ తీసుకుంటే మూత్రపిండాల వ్యాధులు రాకుండా జాగ్రత్త పడవచ్చు.
పిండి కూర ఆకును చాలా మంది కూరగా వండుకొని తింటుంటారు. ఉల్లిపాయతో లేదంటే పప్పులో వేసి వండుకుంటే చాలా రుచిగా ఉంటుంది. మంచి ఆరోగ్యం కూడా. పిండి కూర ఆకులతో కూర చేసుకుని తినటం వల్ల మూత్రపిండాల్లో ఉన్న వ్యర్థాలు మూత్రం ద్వారా వెల్లిపోతాయని ఆయుర్వేద ఆరోగ్య నిపుణులు చెబుతున్నారు.
మీకు అందుబాటులో పిండి కూర లభిస్తే.. దాన్ని వేర్లతో సహా ఇంటికి తెచ్చుకోవాలి. వేర్లు, ఆకులు, పువ్వులతో పాటుగా ఎండబెట్టి పొడి చేసి నిల్వ ఉంచుకోవచ్చు. మీరు రోజు వాడుకునే టీ పొడికి బదులుగా పిండికూర పొడిని వేసుకుని టీ చేసుకుని కూడా తాగొచ్చు. క్రమం తప్పకుండా కొన్ని రోజుల పాటు ఇలా చేస్తూ ఉంటే.. మూత్రాశయ సంబంధిత వ్యాధులన్నీ నయమవుతాయి. (నోట్‌: ఇందులోని అంశాలు కేవలం అవగాహన కోసం మాత్రమే. ఆరోగ్య నిపుణుల సలహాల మేరకు అందించడం జరుగుతుంది. ఏదైనా సందేహాలు ఉంటే వైద్య నిపుణులను సంప్రదించండి.)