ఉత్తరప్రదేశ్‌లో వేడెక్కిన సీట్ల పంచాయితీ.. కాంగ్రెస్‌కు మరో ఆఫర్ ఇచ్చిన ఎస్పీ?

Uttar Pradesh Elections

దేశంలోనే అతిపెద్ద రాష్ట్రం ఉత్తరప్రదేశ్‌ అసెంబ్లీ ఎన్నికలు 2027లో జరగనున్న నేపథ్యంలో రాష్ట్ర రాజకీయాలు ఇప్పటి నుంచే వేడెక్కాయి. భారతీయ జనతా పార్టీని అధికారానికి దూరం చేయాలనే లక్ష్యంతో సమాజ్‌వాదీ పార్టీ (ఎస్పీ), కాంగ్రెస్‌ కలిసి ముందుకు సాగాలని భావిస్తున్నాయి. అయితే.. సీట్ల పంపకమే ఈ రెండు పార్టీల మధ్య కీలక చర్చగా మారే సూచనలు కనిపిస్తున్నాయి. కాంగ్రెస్‌ ఎక్కువ స్థానాల్లో పోటీ చేయాలని చూస్తుండగా, ఎస్పీ మాత్రం తన బలానికి అనుగుణంగా సీట్ల కేటాయింపులు ఉండాలని భావిస్తున్నాయి..

ఉత్తరప్రదేశ్‌ అసెంబ్లీ ఎన్నికలు 2027 సమీపిస్తున్న వేళ సమాజ్‌వాదీ పార్టీ (ఎస్పీ), కాంగ్రెస్‌ మధ్య సీట్ల పంపకం చర్చలు ఆసక్తికరంగా మారుతున్నాయి. కాంగ్రెస్‌ 200కు పైగా స్థానాల్లో పోటీ చేయాలని కోరుకుంటోంది. 2024 లోక్‌సభ ఎన్నికల్లో యూపీలో ఆరు స్థానాలు గెలుచుకున్న విజయాన్ని కాంగ్రెస్‌ తన వాదనకు ఆధారంగా చూపుతోంది. మరోవైపు, గత ఎన్నికల్లో కాంగ్రెస్‌ పనితీరును పరిగణనలోకి తీసుకుని ఆ పార్టీకి 100లోపు సీట్లు కేటాయించాలని సమాజ్‌వాదీ పార్టీ భావిస్తున్నట్లు సమాచారం. కాంగ్రెస్‌కు 60 నుంచి 70 స్థానాలు ఇవ్వాలనే ప్రతిపాదనపై కూడా ప్రచారం జరుగుతోంది. అయితే, ఈ సంఖ్యలపై అధికారిక ధ్రువీకరణ లేదు. సీట్ల పంపకంపై ఇరు పార్టీల మధ్య తుది ఒప్పందం ఎలా కుదురుతుందన్నది రాజకీయ వర్గాల్లో ఉత్కంఠ రేపుతోంది.

యూపీలో మొత్తం ఎన్ని అసెంబ్లీ స్థానాలు?

దేశ రాజకీయాల్లో అత్యంత కీలకమైన రాష్ట్రాల్లో ఉత్తరప్రదేశ్‌ ఒకటి. ఇక్కడ మొత్తం 403 అసెంబ్లీ నియోజకవర్గాలు ఉన్నాయి. ప్రభుత్వాన్ని ఏర్పాటు చేయడానికి ఏ పార్టీకైనా కనీసం 202 స్థానాల్లో విజయం సాధించాలి. ప్రస్తుత అసెంబ్లీ పదవీకాలం 2027 మే 22తో ముగియనుంది. అందువల్ల తదుపరి ఎన్నికలు అంతకంటే ముందే నిర్వహించాల్సి ఉంటుంది.

ఎన్నికలు ఎప్పుడు జరగనున్నాయి?

2027 ఫిబ్రవరి-మార్చి నెలల్లో ఉత్తరప్రదేశ్‌ అసెంబ్లీ ఎన్నికలు జరిగే అవకాశం ఉందని అంచనాలున్నాయి. అయితే, ఇప్పటి వరకు భారత ఎన్నికల సంఘం ఎటువంటి అధికారిక షెడ్యూల్‌ను ప్రకటించలేదు. పోలింగ్‌ తేదీలు, ఎన్ని విడతల్లో ఎన్నికలు నిర్వహిస్తారు, ఓట్ల లెక్కింపు ఎప్పుడు ఉంటుందనే వివరాలు త్వరలోనే వెల్లడి కావల్సి ఉంది. 2022లో ఉత్తరప్రదేశ్‌ ఎన్నికలు ఏడు విడతల్లో జరిగాయి. ఈసారి కూడా రాష్ట్రవ్యాప్తంగా విస్తరించిన నియోజకవర్గాలు, భద్రతా ఏర్పాట్లు, ఎన్నికల నిర్వహణ అవసరాలను బట్టి పోలింగ్‌ విధానాన్ని ఎన్నికల సంఘం నిర్ణయించనుంది.

కాంగ్రెస్‌–ఎస్పీ మధ్య సీట్ల పంచాయితీ?

2027 ఎన్నికల్లో భారతీయ జనతా పార్టీని బీఓడించాలనే లక్ష్యంతో సమాజ్‌వాదీ పార్టీ, కాంగ్రెస్‌ కలిసి పోటీ చేయాలని భావిస్తున్నాయి. ఈ దిశగా విజయ అవకాశాలపై, సీట్ల సర్దుబాటుపై చర్చలు కొనసాగుతున్నాయి. అయితే, ఏ పార్టీ ఎన్ని స్థానాల్లో పోటీ చేయాలనే అంశం రెండు పార్టీల మధ్య ప్రధాన చర్చగా మారింది. తాజా మీడియా కథనాల ప్రకారం, కాంగ్రెస్‌ సుమారు 170 నియోజకవర్గాలతో కూడిన జాబితాను ఎస్పీకి అందించినట్లు సమాచారం. కొన్ని నివేదికల్లో కాంగ్రెస్‌ 175 నుంచి 200 స్థానాల వరకు కోరుకుంటున్నట్లు పేర్కొన్నాయి. అయితే, ఈ సంఖ్యలు చర్చల దశలో ఉన్నవే తప్ప, అధికారికంగా ఖరారైన సీట్ల కేటాయింపులు కావని రాజకీయవర్గాలు చెబుతున్నాయి.

కాంగ్రెస్‌ తనకు బలమైన అభ్యర్థులు ఉన్న నియోజకవర్గాలు, పార్టీ సంస్థాగతంగా మెరుగ్గా ఉన్న ప్రాంతాలకు ప్రాధాన్యం ఇవ్వాలని చూస్తోంది. 2024 లోక్‌సభ ఎన్నికల్లో ఉత్తరప్రదేశ్‌లో ఆరు స్థానాలను గెలుచుకున్న ఫలితాన్ని కూడా తన వాదనకు ఆధారంగా చూపుతోంది. మరోవైపు, ఎస్పీ మాత్రం రాష్ట్రంలో తనకున్న బలాన్ని దృష్టిలో ఉంచుకుని ఎక్కువ స్థానాల్లో పోటీ చేయాలని భావిస్తోంది. కాంగ్రెస్‌కు సుమారు 60 నుంచి 70 స్థానాలు కేటాయించే ప్రతిపాదనను తెరపైకి తీసుకువచ్చినట్లు పార్టీవర్గాల్లో చర్చ మొదలైంది. అయితే, ఈ సంఖ్యలపై రెండు పార్టీలు తుది ఒప్పందానికి వచ్చినట్లు అధికారిక ప్రకటన రాలేదు.

బరిలో ఉండే ప్రధాన పార్టీలు ఏవి?

1. భారతీయ జనతా పార్టీ (బీజేపీ): ముఖ్యమంత్రి యోగి ఆదిత్యనాథ్‌ నాయకత్వంలో అధికారాన్ని నిలబెట్టుకోవాలని బీజేపీ లక్ష్యంగా పెట్టుకోనుంది. కేంద్రంలో అధికారంలో ఉన్న ఎన్డీఏ కూటమి మద్దతు కూడా ఆ పార్టీకి కీలకం.

2. సమాజ్‌వాదీ పార్టీ (ఎస్పీ): అఖిలేశ్‌ యాదవ్‌ నాయకత్వంలోని ఎస్పీ ప్రధాన ప్రతిపక్ష శక్తిగా బీజేపీకి సవాల్‌ విసరాలని చూస్తోంది. కాంగ్రెస్‌తో కలిసి పోటీ చేయడం ద్వారా ఓట్ల విభజనను తగ్గించుకోవడం కూటమికి కీలకం కావచ్చు.

3. కాంగ్రెస్‌: ప్రియాంక గాంధీ వాద్రా సహా పార్టీ నాయకులు సీట్ల పంపకం, అభ్యర్థుల ఎంపిక, రాష్ట్రంలో పార్టీ బలోపేతంపై దృష్టి సారిస్తున్నారు. ఎస్పీతో ఒప్పందం ఎంతవరకు కుదురుతుందన్నది ఎన్నికల సమీకరణాలను ప్రభావితం చేయవచ్చు.

4. బహుజన్‌ సమాజ్‌ పార్టీ (బీఎస్పీ): మాజీ ముఖ్యమంత్రి మాయావతి నాయకత్వంలోని బీఎస్పీ కూడా కీలక రాజకీయ శక్తి. దళిత ఓటర్లలో పార్టీకి ఉన్న మద్దతు, ఇతర సామాజిక వర్గాలపై ప్రభావం ఎన్నికల ఫలితాల్లో పాత్ర పోషించవచ్చు.

5. ఎన్డీఏ భాగస్వామ్య పార్టీలు: రాష్ట్రీయ లోక్‌దళ్‌ (ఆర్‌ఎల్‌డీ), అప్నా దళ్‌ (సోనీలాల్‌), నిషాద్‌ పార్టీ, సుహెల్దేవ్‌ భారతీయ సమాజ్‌ పార్టీ (ఎస్‌బీఎస్‌పీ) వంటి పార్టీలు కూడా సీట్ల కేటాయింపులు, ప్రాంతీయ సామాజిక సమీకరణాల్లో ప్రాధాన్యం పొందే అవకాశం ఉంది. ఈ పార్టీలకు ఎన్ని స్థానాలు కేటాయిస్తారనేది ఇంకా ఖరారు కాలేదు.

6. ఇతర పార్టీలు: ఆమ్‌ ఆద్మీ పార్టీ (ఆప్‌), ఆజాద్‌ సమాజ్‌ పార్టీ వంటి రాజకీయ శక్తులు కూడా తమ బలాన్ని బట్టి ఎన్నికల్లో పోటీ చేసే అవకాశముంది. అయితే, వాటి తుది వ్యూహాలు, కూటములపై స్పష్టత రావాల్సి ఉంది.

ప్రస్తుతానికి సీట్ల పంపకం, అభ్యర్థుల ఎంపిక, కూటముల తుది రూపంపై స్పష్టత రావాల్సి ఉంది. ఎన్నికల సంఘం అధికారిక షెడ్యూల్‌ ప్రకటించిన తర్వాతే పోలింగ్‌ తేదీలు, విడతలు, ఇతర ఎన్నికల వివరాలపై పూర్తి స్పష్టత లభించనుంది.

గత ఎన్నికల ఫలితాలు ఏం చెబుతున్నాయి?

2022 అసెంబ్లీ ఎన్నికల్లో బీజేపీ ఒక్కటే 255 స్థానాలను గెలుచుకుంది. ఎస్పీ 111 స్థానాల్లో విజయం సాధించింది. బీజేపీ నేతృత్వంలోని ఎన్డీఏ మొత్తం 273 స్థానాలతో ప్రభుత్వాన్ని ఏర్పాటు చేసింది.

2024 లోక్‌సభ ఎన్నికల్లో మాత్రం ఉత్తరప్రదేశ్‌లో రాజకీయ చిత్రం కొంత మారింది. రాష్ట్రంలోని 80 లోక్‌సభ స్థానాల్లో ఎస్పీ 37, బీజేపీ 33, కాంగ్రెస్‌ ఆరు స్థానాలు గెలుచుకున్నాయి. ఈ ఫలితాలు 2027 అసెంబ్లీ ఎన్నికలకు ముందు పార్టీలకు ముఖ్యమైన రాజకీయ సంకేతాలుగా మారాయి. అయితే, లోక్‌సభ, అసెంబ్లీ ఎన్నికల ఓటింగ్‌ సరళి ఒకేలా ఉంటుందని భావించలేము.

అఖిలేశ్‌ యాదవ్‌ ఏమంటున్నారు?

బీజేపీని ఓడించడమే తమ కూటమి ప్రధాన లక్ష్యమని అఖిలేశ్‌ యాదవ్‌ పేర్కొన్నారు. కాంగ్రెస్‌, సమాజ్‌వాదీ పార్టీ, ఇండియా కూటమి కలిసి పనిచేయాలని, ప్రజలకు తమ ఉమ్మడి లక్ష్యాన్ని వివరించి ఎన్నికల్లో ముందుకు సాగుతామని ఆయన చెప్పారు. అయితే, కూటమి లక్ష్యం ఒక్కటే అయినప్పటికీ సీట్ల పంపకం విషయంలో పరస్పర అంగీకారం సాధించడం కీలకం. ఏ నియోజకవర్గంలో ఏ పార్టీకి గెలుపు అవకాశాలు ఎక్కువగా ఉన్నాయి? అభ్యర్థుల బలం ఎంత? స్థానికంగా పార్టీకి ఉన్న సంస్థాగత మద్దతు ఏ స్థాయిలో ఉంది? అనే అంశాల ఆధారంగా చర్చలు సాగుతున్నాయి.

యూపీ ఎన్నికలపై దేశవ్యాప్తంగా ఆసక్తి ఎందుకు?

ఉత్తరప్రదేశ్‌లో 403 అసెంబ్లీ స్థానాలు ఉండటంతో ఇక్కడి ఫలితాలు దేశ రాజకీయాలపై కూడా ప్రభావం చూపగలవు. బీజేపీ అధికారాన్ని నిలబెట్టుకుంటుందా? ఎస్పీ–కాంగ్రెస్‌ కూటమి బలమైన పోటీ ఇస్తుందా? బీఎస్పీ ఎంత మేరకు ఓట్లను ప్రభావితం చేస్తుంది? ఎన్డీఏ భాగస్వామ్య పార్టీలు ఎన్ని స్థానాల్లో పోటీ చేస్తాయి? అన్న అంశాలపై ఆసక్తి నెలకొంది.

మొత్తానికి.. 403 స్థానాలున్న ఉత్తరప్రదేశ్‌లో 2027 ఎన్నికలకు ముందే సీట్ల లెక్కలు మొదలయ్యాయి. కాంగ్రెస్‌ ఆశిస్తున్న స్థాయిలో సీట్లు దక్కుతాయా? ఎస్పీ తన పట్టును కొనసాగిస్తుందా? ఈ రెండు పార్టీల మధ్య ఒప్పందం బీజేపీకి ఎంతవరకు సవాల్‌ విసురుతుంది? అన్నది రాబోయే రోజుల్లో తేలనుంది.

మరిన్ని జాతీయ వార్తల కోసం ఇక్కడ చూడండి..