G20 Summit: ప్రపంచ నేతలను అలరించిన వీనుల విందైన సంగీతం.. భారతీయ సంగీత వారసత్వాన్ని చాటేలా
భారత్ ఎంతో ప్రతిష్టాత్మకంగా నిర్వహిస్తున్న జీ20 సదస్సు తొలి రోజు విజయవంతంగా పూర్తయిన విషయం తెలిసిందే. ఈ సందర్భంగా సభ్యదేశాలు పలు కీలక విషయాలపై చర్చించాయి. ఆఫ్రికన్ యూనియన్ను జీ 20 కూటమిలో శాశ్వత సభ్యత్వం ఇస్తూ నిర్ణయం తీసుకున్నారు. ఇక అనంతరం సాయంత్రం రాష్టప్రతి ద్రౌపది ముర్ము ఇచ్చిన విందులో దేశాధినేతలు పాల్గొన్నారు. ఈ సందర్భంగా భారతీయ సంగీత వారసత్వ సంపదను చాటుతూ కళాకారులు అద్భుత ప్రదర్శనను నిర్వహించారు. శాస్త్రీయ సంగీతంతో పాటు సమకాలీన సంగీతంలో ఉపయోగించే వాద్య పరికరాలతో అతిథులను మెస్మరైజ్ చేశారు..
గాంధర్వ ఆతిథ్యం బృందం 'భారత వాద్య దర్శనం' పేరుతో గొప్ప ప్రదర్శన ఇచ్చింది. భారతీయ సంగీత వారసత్వ సంపద గొప్పతనాన్ని చాటి చెప్పేలా జరిగిన ఈ కార్యక్రమంలో శాస్త్రీయ సంగీతంతో పాటు సమకాలీన సంగీతంలో ఉపయోగించే పరికరాలతో సంగీత విభావరి నేతలను ఆకట్టుకుంది.
రాష్ట్రపతి ద్రౌపదీ ముర్ము ఇచ్చిన విందులో నిర్వహించిన ఈ కార్యక్రమం ప్రత్యేక ఆకర్షణగా నిలిచింది. సంతూర్, సారంగీ, జల్ తరంగ్, షెహనాయ్, మోహన్ వీణతో పాటు దేశవ్యాప్తంగా విభిన్న ప్రాంతాల్లో ప్రఖ్యాతిగాంచిన వాద్య పరికారలతో ఉద్భవించిన సంగీతం ఆహుతులను ఎంతగానో ఆకట్టుకుంది.
ఈ వాయిద్య పరికరాల్లో 34 హిందుస్తానీ, 18 కర్ణాటక సంగీతం, 26 జానపద సంబంధ పరికరాలను ఉపయోగించారు. మొత్తం 78 మంది కళాకారులు ఈ కార్యక్రమంలో పాల్గొన్నారు. వీరిలో కొందరు దివ్యాంగులు కూడా ఉన్నారు.
హిందుస్థానీ మ్యూజిక్ విభాగంలో రాగ్ దర్బారీ కండా, కాఫి-ఖెలత్ హోరి, ఫోక్ మ్యూజిక్: రాజస్థాన్-కేసరియా బలమ్, ఘుమర్, నింబురా నింబురా ఇలా రకరకాల విభాగాల్లో నిర్వహించిన సంగీత కచేరి దేశాధినేతలను విశేషంగా ఆకట్టుకుంది.
మ్యూజికల్ జర్నీ ఆఫ్ భారత్ అనే థీమ్తో సాగిన ఈ సంగీత ప్రదర్శనలో పాల్గొన్న కళాకారులు తమ మత ప్రాంతానికి చెందిన సంప్రదాయక వేషదారణలో పాల్గొని ప్రత్యేకంగా నిలిచారు.