ప్రోటోకాల్ పక్కన పెట్టి.. కోటా బజార్‌లో పానీపూరీ ఆస్వాదించిన లోక్‌సభ స్పీకర్ ఓం బిర్లా!

Om Birla Viral Video

లోక్‌సభ స్పీకర్, కోటా-బుండి పార్లమెంటు సభ్యులు ఓం బిర్లా సాదాసీదా జీవితం తెలియజేసే మరో వీడియో సోషల్ మీడియాలో వైరల్‌గా మారింది. కోటాలోని రాంపురా బజార్‌ వీధుల్లో ఆయన పానీపూరీని ఆస్వాదిస్తున్న దృశ్యాలు నెటిజన్ల దృష్టిని ఆకర్షిస్తున్నాయి. సెప్టెంబర్ 22న రాంపురాలోని ప్రసిద్ధ ‘పానీ పతాసే’ను ఓం బిర్లా రుచి చూశారు.

వైరల్ వీడియోలో స్పీకర్ ఓం బిర్లా పానీపూరీ బండి వద్ద నిలబడి వాటిని తింటూ కనిపించారు. ఆయనతో పాటు కోటాకు చెందిన పలువురు బీజేపీ నాయకులు కూడా ఉన్నారు. సాధారణంగా ప్రోటోకాల్, భద్రతా సిబ్బంది మధ్య కనిపించే స్పీకర్.. స్థానిక మార్కెట్‌లో సాధారణంగా ప్రజలు తినే స్ట్రీట్‌ ఫుడ్‌ను ఆస్వాదించడం వీడియోలో కనిపించింది.

పానీపూరీ తిన్న తర్వాత ఓం బిర్లా తన జేబులో నుంచి డబ్బులు తీసి విక్రేతకు ఇవ్వడానికి ప్రయత్నించినట్లు వీడియోలో కనిపిస్తోంది. అయితే విక్రేత డబ్బులు తీసుకోవడానికి తొలుత నిరాకరించాడు. అయితే చుట్టుపక్కల ఉన్నవారు డబ్బులు తీసుకోవాలని చెప్పడంతో చివరకు ఓం బిర్లా డబ్బులు ఇచ్చి అక్కడి నుంచి వెళ్లిపోయారు. ఇందుకు సంబంధించి మొత్తం ఘటనకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది.

ఈ వీడియోను ఇన్‌స్టాగ్రామ్‌లో bobby_mahawar6363 ఖాతా ద్వారా షేర్ చేశారు. వీడియోపై సోషల్ మీడియా వినియోగదారులు వివిధ రకాలుగా స్పందిస్తున్నారు. కొందరు ఓం బిర్లా సాధారణంగా ప్రజల మధ్య కలిసిపోయే తీరాన్ని ప్రస్తావిస్తుండగా, మరికొందరు కోటా రాంపురా ప్రాంతంలోని పానీపూరీ ప్రత్యేకతను కామెంట్ చేస్తున్నారు.

ఓం బిర్లా సాధారణ జీవనశైలికి సంబంధించిన వీడియోలు గతంలోనూ సోషల్ మీడియాలో వైరల్ అయ్యాయి. 2026 మేలో కోటాలోని ఓ భండారాలో సాధారణ ప్రజలతో కలిసి నేలపై కూర్చుని పూరీ-కూర్మా తిన్న వీడియో కూడా వైరల్ అయింది. తాజా పానీపూరీ వీడియో కూడా ప్రస్తుతం సోషల్ మీడియాలో చక్కర్లు కొడుతోంది. ముఖ్యంగా లోక్‌సభ స్పీకర్‌ హోదాలో ఉన్న వ్యక్తి స్థానిక మార్కెట్‌లో సాధారణంగా కనిపించే విధంగా స్ట్రీట్‌ ఫుడ్‌ ఆస్వాదించడం ఈ వీడియోకు ప్రత్యేక ఆకర్షణగా మారింది.

వీడియో ఇక్కడ చూడండి..

మరిన్ని జాతీయ వార్తల కోసం ఇక్కడ క్లిక్ చేయండి..