Crime: ఐదేళ్ల చిన్నారి చెప్పిన సాక్ష్యం.. నేరస్తుడికి జీవిత ఖైదు!

Mumbai Dentist Umesh

కోల్ కతా, జులై 26: కళ్ల ముందే కన్న తల్లిని చంపుతుంటే అడ్డుకోలేని వయసు ఆ చిన్నారిది. పసివాడు తనేం చేస్తాడులే అనుకన్నాడా నేరస్తుడు. చివరకు ఆ బాలుడు చెప్పిన సాక్ష్యం అతన్ని కటకటాలపాటు చేసింది. నిందితుడు మరెవరో కాదు సొంత తండ్రే. 2016లో ఐదేళ్ల కుమారుడి ఎదుటే కట్టుకున్న భార్యను అత్యంత కిరాతకంగా చంపాడు డెంటిస్ట్‌ ఉమేష్‌ బోబాలే. కొడుకు చెప్పిన సాక్ష్యం ఆధారంగానే ముంబైలోని సెషన్స్‌ కోర్టు సోమవారం తండ్రి ఉమేష్‌కు జీవితఖైదు విధించింది.

2016 డిసెంబర్‌ 11న దాదర్ ప్రాంతంలో ఈ హత్య జరిగింది. ఐదేళ్ల కుమారుడు కళ్లెదుటే భార్య తనూజను వంట గదిలో కత్తితో కిరాతకంగా గొంతుకోసి చంపాడు ఉమేష్. మృతురాలి శరీరంపై 34 కత్తిగాట్లు ఉన్నట్లు పోస్టుమార్టం రిపోర్టు వెల్లడించింది. ఈ హత్య జరగడానికి కొన్ని నెలల ముందు ఈ దంపతులు విడాకుల కోసం దరఖాస్తు చేసుకోవడం కొసమెరుపు. విడాకులు ఖరారైతే భార్యకు భరణం చెల్లించాల్సి వస్తుందని, అందుకే హత్యకుపాల్పడినట్లు రుజువైంది.

ఉమేష్‌, తనూజకు 2009లో వివాహం జరిగింది. పెళ్లైన 6 నెలలకే దంపతుల మధ్య గొడవలు మొదలయ్యాయని మృతురాలి సోదరి చెప్పింది. తనూజ గర్భం దాల్చిన సమయంలోనూ ఆమెకు అక్రమసంబంధాలు అంటగట్టి వేధించేవాడని, బిడ్డకు డీఎన్‌ఏ టెస్టు కూడా చేయించాడని సాక్షులు తెలిపారు. 10 మంది సాక్షుల ఆధారాలు, కొడుకు ఇచ్చిన వాంగ్మూలం ఆధారంగా నిందితుడు ఉమేష్‌ జీవితకాల ఖైదు విధిస్తూ కోర్టు తాజాగా తీర్పు వెలువరించింది.

మరిన్ని జాతీయ వార్తల కోసం క్లిక్‌ చేయండి.