ట్రాన్స్ మహిళతో అమాత్యులు.. రాజకీయ దుమారం రేపుతోన్న వైరల్ వీడియో.. మంత్రి రాజీనామాకు డిమాండ్!

మహారాష్ట్ర మంత్రి నరహరి జిర్వాల్‌కు సంబంధించిన అభ్యంతరకరమైన వీడియో పెద్ద రాజకీయ వివాదాన్ని రేకెత్తించింది. వైరల్ అవుతున్న ఈ వీడియోపై కాంగ్రెస్ పార్టీ తీవ్రంగా స్పందిస్తూ, మంత్రి రాజీనామా చేయాలని డిమాండ్ చేసింది. ఈ వీడియోలో జిర్వాల్ తన అధికారిక నివాసంలో ఒక ట్రాన్స్‌వుమన్‌తో అభ్యంతరకరమైన స్థితిలో ఉన్నారని, ఇది అశ్లీలమైన, అనైతిక ప్రవర్తన అని కాంగ్రెస్ ఆరోపించింది. ఈ వీడియో ప్రజా జీవితానికి ఒక మచ్చ అని పేర్కొంటూ, దీనిపై తక్షణ చర్యలు తీసుకోవాలని, ఆయనను కేబినెట్ నుండి తొలగించాలని పార్టీ డిమాండ్ చేసింది. అయితే, జిర్వాల్ ఈ ఆరోపణలను తీవ్రంగా ఖండించారు. ఆ వీడియోను మార్ఫింగ్ చేశారని, తనను బ్లాక్‌మెయిల్ చేయడానికి ఇదొక కుట్ర అని ఆయన అన్నారు. తన రాజీనామాను ఎవరూ కోరలేదని, వీడియోలోని వ్యక్తి తనకు ఐదేళ్లుగా తెలుసని ఆయన స్పష్టం చేశారు.

అధికార పార్టీల మధ్య జరుగుతున్న గ్యాంగ్ వార్ ఫలితంగానే ఈ వివాదం మొత్తం తలెత్తిందని కాంగ్రెస్ నాయకుడు విజయ్ వడెట్టివార్ అభివర్ణించారు. ప్రభుత్వంలో కొనసాగుతున్న అంతర్గత కలహాలే ఇలాంటి సంఘటనలకు దారితీస్తున్నాయని, ఇవి రాష్ట్ర ప్రతిష్టను దెబ్బతీస్తున్నాయని ఆయన అన్నారు. అందుబాటులో ఉన్న సమాచారం ప్రకారం, బ్లాక్‌మెయిల్ చేసే ఉద్దేశ్యంతోనే ఆ వీడియోను విడుదల చేశారని ఆయన ఆరోపించారు. ఇలాంటి ఘటనలు మహారాష్ట్రకు అవమానకరమని, ప్రజల విశ్వాసాన్ని దెబ్బతీస్తాయని చెబుతూ వడెట్టివార్ మంత్రి ప్రవర్తనను విమర్శించారు. రాష్ట్ర కాంగ్రెస్ అధ్యక్షుడు హర్ష్ వర్ధన్ సప్కల్ ఈ సంఘటనను రాజకీయాల్లో నైతిక పతనానికి ఒక ఉదాహరణగా అభివర్ణించారు. ప్రజాప్రతినిధి మర్యాద, బాధ్యతలకు కట్టుబడి ఉండాలని, కానీ ఈ సందర్భంలో ఆ ప్రమాణాలను ఉల్లంఘించారని ఆయన అన్నారు.

సామాజిక కార్యకర్త అంజలి దమానియా కూడా ఈ విషయంపై సమగ్ర విచారణ జరపాలని డిమాండ్ చేశారు. ఒక సీనియర్ మంత్రి తన ప్రవర్తన విషయంలో మరింత జాగ్రత్తగా ఉండాలని ఆమె అన్నారు. నేషనలిస్ట్ కాంగ్రెస్ పార్టీ నాయకుడు జయంత్ పాటిల్ తాను ఆ వీడియోను చూడలేదని చెబుతూ, వ్యాఖ్యానించడానికి నిరాకరించారు.

మరిన్ని జాతీయ వార్తల కోసం ఇక్కడ క్లిక్ చేయండి..