Maharashtra: మహారాష్ట్ర కొత్త సీఎంగా దేవేంద్ర ఫఢ్నవీస్‌.. ఏక్‌నాథ్‌షిండే, అజిత్‌పవార్‌కు కీలక పదవులు..?
మహారాష్ట్ర కొత్త సీఎం క్లారిటీ వచ్చేసింది. దేవేంద్ర ఫఢ్నవీస్‌ ముఖ్యమంత్రి పగ్గాలు చేపట్టబోతున్నారు. శివసేన చీఫ్ ఏక్‌నాథ్‌షిండే, ఎన్సీపీ అధినేత అజిత్‌పవార్‌కు ఏ పదవులు దక్కనున్నాయి?
మహారాష్ట్ర కొత్త సీఎం క్లారిటీ వచ్చేసింది. కొత్త ముఖ్యమంత్రిగా దేవేంద్ర ఫడ్నవీస్ బాధ్యతలు చేపట్టనున్నారు. భారతీయ జనతా పార్టీ కోర్ కమిటీ సమావేశంలో ఆయన పేరును ఆమోదించారు. గురువారం(డిసెంబర్ 5) ఆయన సీఎంగా ప్రమాణ స్వీకారం చేయనున్నారు. ఈమేరకు మహారాష్ట్ర బీజేపీ చీఫ్ అధికారికంగా ప్రకటించారు. దీంతో మహారాష్ట్ర సీఎంగా దేవేంద్ర ఫఢ్నవీస్‌ రెండోసారి పదవి బాధ్యతలు చేపట్టబోతున్నారు.
గత 11 రోజులుగా సాగుతున్న మహాయుతి హైవోల్టేజీ డ్రామా ఎట్టకేలకు ముగిసింది. దేవేంద్ర ఫడ్నవీస్ ముఖ్యమంత్రి పదవికి ఎట్టకేలకు మార్గం సుగమం అయింది. పార్టీ కోర్ కమిటీ సమావేశంలో దేవేంద్ర ఫడ్నవీస్‌ను శాసనసభాపక్ష నేతగా ఎన్నుకున్నారు. ఫడ్నవీస్ ముఖ్యమంత్రి కావడం ఖాయమని తేలిపోయింది. రేపు డిసెంబర్ 5న ఆజాద్ మైదాన్‌లో ఫడ్నవీస్ ప్రమాణ స్వీకారోత్సవం జరగనుంది. ముఖ్యమంత్రిగా ప్రమాణ స్వీకారం చేసిన తర్వాత రాష్ట్ర 21వ ముఖ్యమంత్రిగా ఫడ్నవీస్ రాష్ట్ర బాధ్యతలు చేపట్టనున్నారు.
భారతీయ జనతా పార్టీ లెజిస్లేచర్ పార్టీ సమావేశం అనంతరం మహాయుతి నేతలు గవర్నర్‌ను కలిసి తమ అభ్యర్థనను వినిపిస్తారని బీజేపీ నేత సుధీర్ ముంగంటివార్ తెలిపారు. రాష్ట్రంలో ప్రభుత్వాన్ని ఏర్పాటు చేసేందుకు మహాయుతి మిత్రపక్షాలు బుధవారం మధ్యాహ్నం 3.30 గంటలకు గవర్నర్ సీపీ రాధాకృష్ణన్‌ను కలుస్తాయని మహారాష్ట్ర బీజేపీ చీఫ్ చంద్రశేఖర్ బవాంకులే తెలిపారు.
ఎమ్మెల్యేల సమావేశంలో దేవేంద్ర ఫడ్నవీస్ పేరుతో ప్రతిపాదన తీసుకురావాలని బీజేపీ కోర్ కమిటీలో నిర్ణయించారు. సుధీర్ ముంగంటివార్, చంద్రకాంత్ పాటిల్ ఇద్దరూ దేవేంద్ర ఫడ్నవీస్ పేరును ప్రతిపాదించారు. ఆ తర్వాత బీజేపీ శాసనసభాపక్ష నేతగా దేవేంద్ర ఫడ్నవీస్ ఏకగ్రీవంగా ఎన్నికయ్యారు. దీని తర్వాత మహారాష్ట్రలో అధికార ఏర్పాటు వేగం పెరిగింది. కేంద్ర సమన్వయకర్తలు విజయ్ రూపానీ, నిర్మలా సీతారామన్ సమక్షంలో లెజిస్లేచర్ పార్టీ నాయకుడి పదవిని ఖరారు చేశారు. శాసనసభాపక్ష నేతగా దేవేంద్ర ఫడ్నవీస్ ఎన్నికైన తర్వాత ఎట్టకేలకు అధికార స్థాపనకు మార్గం సుగమమైంది.
విధాన్ భవన్‌లో ఈ పార్టీ సమావేశం అనంతరం శాసనసభా పక్ష సమావేశం జరగింది. దీని తరువాత, బీజేపీ దాని మిత్రపక్షాల ముఖ్య నాయకులతో కలిసి మధ్యాహ్నం 3.30 గంటలకు తమ మద్దతు లేఖలతో గవర్నర్ వద్దకు వెళ్లనున్నారు. అందులో మహాయుతి నాయకులు కూడా ఉంటారు. బీజేపీ గవర్నర్‌ను కలిసి ప్రభుత్వ ఏర్పాటుకు సంసిద్ధత వ్యక్తం చేయనున్నారు. ముఖ్యమంత్రి ఎన్నుకోవడానికి, భారతీయ జనతా పార్టీ మహారాష్ట్ర లెజిస్లేటివ్ పార్టీ సమావేశానికి కేంద్ర ఆర్థిక మంత్రి నిర్మలా సీతారామన్, గుజరాత్ మాజీ సీఎం విజయ్ రూపానీని పరిశీలకులుగా నియమించింది.
మహారాష్ట్ర అసెంబ్లీ ఎన్నికల ఫలితాలు నవంబర్ 23న వెలువడ్డాయి. ఇందులో మహాకూటమికి స్పష్టమైన మెజారిటీ రావడంతో బీజేపీ అతిపెద్ద పార్టీగా అవతరించింది. ఇందులో బీజేపీకి అత్యధికంగా 132 సీట్లు వచ్చాయి. ఏక్‌నాథ్ షిండే నేతృత్వంలోని శివసేన 57 సీట్లు, అజిత్ పవార్ నేతృత్వంలోని ఎన్సీపీ 41 సీట్లు గెలుచుకున్నాయి. ఫలితం వచ్చి 10 రోజులు గడిచాయి. మహాకూటమిలోని శివసేన, ఎన్సీపీ ఎమ్మెల్యేలు తమ తమ శాసనసభాపక్ష నేతలను ఎన్నుకున్నారు. అయితే అతిపెద్ద పార్టీగా అవతరించిన బీజేపీ నుంచి శాసనసభాపక్ష నేత ఎన్నిక కాలేదు. ఈ నేపథ్యంలో, శాసనసభా పక్ష నేతను ఎన్నుకునేందుకు బీజేపీ డిసెంబర్ 4న శాసనసభలో కీలక సమావేశం నిర్వహించింది.
డిసెంబర్ 5న ప్రధాని మోదీ, ఇతర నేతల సమక్షంలో కొత్త ముఖ్యమంత్రి ప్రమాణ స్వీకారం చేయనున్నారు. ముంబైలోని ఆజాద్ మైదాన్‌లో ప్రమాణస్వీకార కార్యక్రమం జరగనుంది. కొత్త ముఖ్యమంత్రి ప్రమాణ స్వీకార కార్యక్రమం రేపు, గురువారం, డిసెంబర్ 5, ముంబైలోని ఆజాద్ మైదాన్‌లో జరగనుంది. కొత్త ముఖ్యమంత్రితోపాటు ఇద్దరు ఉపముఖ్యమంత్రుల ప్రమాణస్వీకారోత్సవం జరగనున్నట్లు సమాచారం. ఈ కార్యక్రమానికి ప్రధాని నరేంద్ర మోదీ హాజరుకానున్నారు. కేంద్ర మంత్రులు అమిత్ షా, జె.పి.నడ్డా, నితిన్ గడ్కరీ, ఉత్తరప్రదేశ్ ముఖ్యమంత్రి యోగి ఆదిత్యనాథ్‌తో పాటు పలువురు ప్రముఖులు హాజరుకానున్నారు. మహారాష్ట్ర బీజేపీ అధ్యక్షుడు చంద్రశేఖర్ బవాన్‌కులే ఈ వేడుకకు సంబంధించిన ఏర్పాట్లను పర్యవేక్షిస్తున్నారు. ఈ ప్రమాణ స్వీకారోత్సవానికి ఎన్డీయే పాలిత రాష్ట్రాల ముఖ్యమంత్రులు, ఉప ముఖ్యమంత్రులకు కూడా ఆహ్వానాలు పంపినట్లు సంబంధిత వర్గాలు చెబుతున్నాయి.
మరిన్ని జాతీయ వార్తల కోసం ఇక్కడ క్లిక్ చేయండి..