పసిపిల్లల ఆరోగ్యంతో చెలగాటమా..? నెస్లే ఇండియాపై FSSAI బిగ్ యాక్షన్.. 3 కేసులు నమోదు!
శిశువుల ఫార్ములా ఆహార ఉత్పత్తులకు సంబంధించి నెస్లే ఇండియాపై భారత ఆహార భద్రత, ప్రమాణాల ప్రాధికార సంస్థ (FSSAI) చర్యలు ప్రారంభించింది. నెస్లేకు చెందిన శిశు పోషకాహార ఉత్పత్తులకు సంబంధించి మూడు వేర్వేరు విచారణ కేసులను నమోదు చేసినట్లు ఎఫ్ఎస్ఎస్ఏఐ వెల్లడించింది.
న్యూఢిల్లీ: శిశువుల ఫార్ములా ఆహార ఉత్పత్తులకు సంబంధించి నెస్లే ఇండియాపై భారత ఆహార భద్రత, ప్రమాణాల ప్రాధికార సంస్థ (FSSAI) చర్యలు ప్రారంభించింది. నెస్లేకు చెందిన శిశు పోషకాహార ఉత్పత్తులకు సంబంధించి మూడు వేర్వేరు విచారణ కేసులను నమోదు చేసినట్లు ఎఫ్ఎస్ఎస్ఏఐ వెల్లడించింది.
FSSAI పరిశీలనలో నాన్ ఎక్సెల్లా ప్రో స్టేజ్-1, లాక్టోజెన్ ప్రో-1 ఉత్పత్తుల ప్రచారం, లేబుళ్లపై ఉన్న కొన్ని వాదనలపై అభ్యంతరాలు వ్యక్తమయ్యాయి. నాన్ ఎక్సెల్లా ప్రో స్టేజ్-1కు సంబంధించి ‘ఐదు హెచ్ఎంవోలు’, ‘వే ప్రోటీన్’ వంటి అంశాలను ప్రచారంలో ప్రస్తావించినట్లు అధికారులు తెలిపారు. లాక్టోజెన్ ప్రో-1 విషయంలో ‘వే ప్రోటీన్ సులభంగా జీర్ణమవుతుంది’ అనే వాదనను పరిశీలించినట్లు పేర్కొన్నారు.
ఈ వాదనలు శిశు ఆహార ఉత్పత్తుల విక్రయాలను ప్రోత్సహించే విధంగా ఉన్నాయని, సంబంధిత నిబంధనలకు అనుగుణంగా లేవని ఎఫ్ఎస్ఎస్ఏఐ పేర్కొంది. శిశు పోషకాహారానికి సంబంధించిన 2020 నిబంధనల్లోని నాలుగో నిబంధనలోని రెండో ఉపనిబంధన, అలాగే శిశు పాల ప్రత్యామ్నాయాల చట్టంలోని సంబంధిత నిబంధనలను ప్రస్తావించింది.
మరో కేసు తదుపరి దశ శిశు ఫార్ములా ఆహారం పోషక ప్రమాణాలకు సంబంధించినది. నెస్లే తయారు చేసిన ఒక నమూనాను ప్రయోగశాలలో పరీక్షించగా, అందులో బయోటిన్ పరిమాణం నిర్దేశిత ప్రమాణం కంటే తక్కువగా ఉన్నట్లు ఎఫ్ఎస్ఎస్ఏఐ తెలిపింది. అదే నమూనాను మరోసారి సూచిత ప్రయోగశాలకు పంపి పరీక్షించగా, అక్కడ కూడా నిర్దేశిత స్థాయి కంటే తక్కువగా ఉన్నట్లు వెల్లడించింది.
అయితే, నెస్లే ఇండియా తమ ఉత్పత్తులు వర్తించే నిబంధనలకు అనుగుణంగానే ఉన్నాయని స్పష్టం చేసింది. సంబంధిత ఉత్పత్తుల లేబుళ్లకు ఎఫ్ఎస్ఎస్ఏఐ నిపుణుల కమిటీ ఆమోదం ఉందని కంపెనీ తెలిపింది. కాగా, ఈ మూడు కేసుల్లో తదుపరి విచారణ, నిర్ణయం చట్టపరమైన ప్రక్రియలో భాగంగా కొనసాగనుంది.
మరిన్ని జాతీయ వార్తల కోసం ఇక్కడ క్లిక్ చేయండి..