అమెరికా వీసా సమస్యలపై జైశంకర్ కీలక చర్చలు.. మార్కో రూబియో సానుకూల స్పందన!

భారత్, అమెరికాల మధ్య దౌత్య, వ్యూహాత్మక బంధం మరింత బలోపేతం అవుతున్న తరుణంలో వీసా జారీ ప్రక్రియలో చట్టబద్ధమైన ప్రయాణికులు ఎదుర్కొంటున్న ఇబ్బందుల అంశం తెరపైకి వచ్చింది. అమెరికా వీసా పొందడంలో చట్టబద్ధమైన భారతీయ ప్రయాణికులు ఎదుర్కొంటున్న సవాళ్ల గురించి తాను తన అమెరికా సహచరుడు, విదేశాంగ కార్యదర్శి మార్కో రూబియోతో చర్చించినట్లు భారత విదేశాంగ మంత్రి ఎస్. జైశంకర్ వెల్లడించారు.

Eam S Jaishankar, Us Secretary Of State Marco Rubio

Balaraju Goud |
Updated on: May 24, 2026 | 2:02 PM

భారత్, అమెరికాల మధ్య దౌత్య, వ్యూహాత్మక బంధం మరింత బలోపేతం అవుతున్న తరుణంలో వీసా జారీ ప్రక్రియలో చట్టబద్ధమైన ప్రయాణికులు ఎదుర్కొంటున్న ఇబ్బందుల అంశం తెరపైకి వచ్చింది. అమెరికా వీసా పొందడంలో చట్టబద్ధమైన భారతీయ ప్రయాణికులు ఎదుర్కొంటున్న సవాళ్ల గురించి తాను తన అమెరికా సహచరుడు, విదేశాంగ కార్యదర్శి మార్కో రూబియోతో చర్చించినట్లు భారత విదేశాంగ మంత్రి ఎస్. జైశంకర్ వెల్లడించారు. న్యూఢిల్లీలో ఇరుదేశాల ప్రతినిధి బృందాల స్థాయి ద్వైపాక్షిక చర్చలు ముగిసిన అనంతరం, ఇద్దరు నేతలు కలిసి నిర్వహించిన సంయుక్త మీడియా సమావేశంలో ఈ వివరాలను వెల్లడించారు.

మీడియా సమావేశంలో జైశంకర్ మాట్లాడుతూ, ఇరు దేశాల మధ్య ఉన్న బలమైన సంబంధాలకు ప్రజల మధ్య పరస్పర అనుసంధానమే అసలైన గుండెకాయ వంటిదని అభివర్ణించారు. “వీసా జారీ విషయంలో చట్టబద్ధమైన ప్రయాణికులు ఎదుర్కొంటున్న సవాళ్లను యూఎస్ సెక్రటరీ రూబియో దృష్టికి తీసుకెళ్లాను. అక్రమ రాకపోకలను అరికట్టడానికి పూర్తి స్థాయిలో సహకరించుకుంటున్నాం. అయితే, ఆ నిబంధనల పర్యవసానంగా చట్టబద్ధమైన రాకపోకలపై ఎలాంటి ప్రతికూల ప్రభావం పడకూడదని భావిస్తున్నాం. ఇది మన వ్యాపార, సాంకేతిక, పరిశోధన సహకారానికి ఎంతో కీలకం” అని జైశంకర్ స్పష్టం చేశారు.

భారతదేశంలో అధికారిక పర్యటనలో ఉన్న అమెరికా విదేశాంగ కార్యదర్శి మార్కో రూబియో ఈ ప్రకటనపై సానుకూలంగా స్పందించారు. వీసా ఆలస్యం లేదా ఆటంకాలు కేవలం భారతదేశాన్ని మాత్రమే లక్ష్యంగా చేసుకుని చేస్తున్నవి కావని ఆయన స్పష్టం చేశారు. ఇది ప్రపంచవ్యాప్తంగా అన్ని దేశాలకూ అమలు చేస్తున్న ఒకే రకమైన వ్యవస్థ అని రూబియో పేర్కొన్నారు. ప్రస్తుతం తాము వీసా ప్రక్రియలో ఒక మార్పు, పరివర్తన కాలంలో ఉన్నామని, ఇలాంటి సమయాల్లో కొన్ని సాంకేతిక, పరిపాలనాపరమైన ఆటంకాలు ఎదురవడం సహజమేనని ఆయన వివరించారు.

భారత్-అమెరికా భాగస్వామ్యంలో వాణిజ్యం, సాంకేతిక రంగాల వృద్ధికి వీసా ప్రక్రియలను సులభతరం చేయడం ఎంతో అవసరమని, ఈ దిశగా సానుకూల పరిష్కారాల కోసం ఇరు దేశాలు మున్ముందు కూడా కలిసి పనిచేస్తాయని ఈ సమావేశం ద్వారా స్పష్టమైంది.