తమిళనాడులో లభించిన ‘డైనోసర్ గుడ్లు’!

తమిళనాడులో వేల సంవత్సరాల కాలం నాటి డైనోసర్ గుడ్లు బయటపడ్డాయి..? అవీ అంటూ ఫోటోలు, వీడియోలు అటు రాష్ట్రంలో, ఇటు సోషల్ మీడియాలో తెగ వైరల్‌గా మారి చక్కర్లు కొడుతున్నాయి. అయితే, అసలు విషయం ఏంటన్నది పురావస్తు శాఖ అధికారులు బయటపెట్టారు. డైనోసర్ గుడ్లు..అదే రాక్షబల్లి గుడ్ల రహాస్యం గుట్టు విప్పారు.

తమిళనాడులోని పెరంబలూర్ జిల్లా కున్నాం గ్రామంలో 50 ఎకరాలలో చెరువుల కోసం తవ్వకాలు చేపట్టారు. అయితే, ఆ తవ్వకాల్లో భారీ పరిమాణంలో ఉండి గుడ్లను పోలిన వింత ఆకారాలు బయటపడ్డాయి. వాటిని చూసిన స్థానికులు అవీ పూర్వకాలం నాటి రాక్షసబల్లి గుడ్లుగా భావించారు. అంతేకాదు, ఆ నోట ఈ నోట ఈ వార్త విస్తృతంగా పాకిపోయింది. తమిళనాడులో డైనోసర్ గుడ్లు బయటపడ్డాయంటూ సోషల్ మీడియాలోనూ వైరల్‌గా మారింది.

స్థానికుల సమాచారం మేరకు వాటిని స్వాధీనం చేసుకున్నారు పురావస్తుశాఖ అధికారులు. అవి డైనోసర్ గుడ్లు కాదని, అమ్మోనైట్ అవక్షేపాలు అని నిపుణులు నిర్ధారించారు. స్థానిక జియాలజీ, పురావస్తు శాస్త్ర నిపుణుల బృందం తవ్వకాలు జరుపుతున్న స్థలాన్ని సందర్శించారు. పెరంబలూరులో లభ్యమైనవి ‘డైనోసర్ గుడ్లు’ కాదని స్పష్టం చేశారు. దాదాపు 416 మిలియన్ సంవత్సరాల క్రితం డెవోనియన్ కాలంలో ఉద్భవించిన పెద్ద, విభిన్న సముద్ర జాతుల సమూహం అమ్మోనైట్ శిలాజాలు అని నిపుణుల బృందం పేర్కొంది. వీటినే డైనోసర్ గుడ్లు అని అసత్యాలు ప్రచారం చేశారని ఆ వదంతులను కొట్టిపారేశారు.