కుక్కలు బైక్‌ల వెంట ఎందుకు పడతాయి.. దీని వెనుక ఉన్న సైంటిఫిక్ రీజన్ తెలిస్తే అవాక్కే..

Why Do Dogs Chase Vehicles,

కుక్కలు మనిషికి అత్యంత విశ్వసనీయమైన స్నేహితులు. అయితే వీధికుక్కలు రోడ్లపై నడిచే వారిని లేదా కదులుతున్న వాహనాలను వెంబడించి మొరగడం, దాడి చేయడానికి ప్రయత్నించడం తరచుగా చూస్తుంటాం. ఈ దుష్ప్రవర్తన కారణంగా చాలా రోడ్డు ప్రమాదాలు కూడా జరుగుతున్నాయి. అసలు కుక్కలు కదులుతున్న వాహనాలను ఎందుకు వెంబడిస్తాయి? దీని వెనుక ఉన్న ఆసక్తికరమైన శాస్త్రీయ కారణం ఏమిటో తెలుసుకుందాం.

టైర్లపై ఉన్న వాసనే అసలు కారణం

కుక్కలు బైక్‌లు, స్కూటర్లు, కార్లను శత్రువుల వలె వెంబడించడానికి బలమైన శాస్త్రీయ కారణాలు ఉన్నాయి. అడవి జంతువుల మాదిరిగానే, వీధి కుక్కలు కూడా తమకంటూ ఒక భూభాగాన్ని ఏర్పరచుకుంటాయి. తమ భూభాగాన్ని గుర్తించడానికి అవి వాహనాల టైర్లు, స్తంభాలు, గోడలపై మూత్ర విసర్జన చేస్తాయి. ఈ మూత్రం వాసన ద్వారా అవి తమ ప్రాంతాన్ని మార్క్ చేసుకుంటాయి.

వాసన చూసే శక్తి

కుక్కలకు వాసన చూసే శక్తి అసాధారణంగా ఉంటుంది. ఒక వాహనం రోడ్డుపై వెళ్తున్నప్పుడు దాని టైర్లపై వేరే ప్రాంతానికి చెందిన కుక్క మూత్రం వాసనను అక్కడి కుక్కలు త్వరగా గ్రహిస్తాయి. ఇతర ప్రాంతాల నుండి వచ్చిన కుక్కలు తమ భూభాగంలోకి చొరబడటాన్ని ఈ కుక్కలు సహించలేవు. మీ వాహనం టైర్లపై అపరిచిత కుక్క వాసనను గుర్తించిన వెంటనే దానిని పొంచి ఉన్న శత్రువుగా భావించి అరుపులతో వెంబడించడం ద్వారా దాన్ని తరిమికొట్టడానికి ప్రయత్నిస్తాయి. అందుకే అవి బైక్‌ల వెంటపడతాయి.

పాత గాయాలు

కుక్కలు చాలా సున్నితమైన జీవులు. కొన్నిసార్లు భావోద్వేగాల కారణంగా కూడా అవి వాహనాలను వెంబడిస్తాయి. కుక్కల గుంపులోని ఏదైనా ఒక కుక్క వాహన ప్రమాదంలో చనిపోతే లేదా గాయపడితే ఆ గుంపులోని మిగిలిన కుక్కలు కోపంతో అదే రకమైన వాహనాలను శత్రువులుగా చూసి వెంబడించడం ప్రారంభిస్తాయి.

ప్రమాదం నివారించడానికి ఏం చేయాలి?

ఒక కుక్క మీ వాహనాన్ని వెంబడించడం ప్రారంభిస్తే, కొన్ని జాగ్రత్తలు పాటించాలి..

వేగం పెంచవద్దు: వెంటనే వాహనం వేగాన్ని పెంచడం ప్రమాదకరం. ఎందుకంటే ఇది ప్రమాదానికి కారణం కావచ్చు.

ఆగండి లేదా వేచి చూడండి: కుక్కలు సాధారణంగా 100-200 మీటర్ల తర్వాత వెంబడించడం మానేస్తాయి. కాబట్టి నెమ్మదిగా వెళ్లండి.

హారన్ ఉపయోగించండి: కుక్కలు పెద్ద శబ్దాలకు కొంచెం భయపడతాయి. ఒక కుక్క వెంబడించడం ప్రారంభిస్తే, కొన్ని సెకన్ల పాటు నిరంతరం హారన్ మోగించండి. ఆ శబ్దానికి అవి పారిపోయే అవకాశం ఉంది.

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..