ఐదింటిలో మధ్య వేలు మాత్రమే ఎందుకు పొడవుగా ఉంటుంది..? దీని వెనుక దాగున్న అసలు సైన్స్ ఇదే..
చేతి ఐదు వేళ్లలో మధ్య వేలు మాత్రమే ఎందుకు అన్నింటికంటే పొడవుగా ఉంటుంది? చూపుడు వేలో లేదా ఉంగరం వేలో పెద్దదిగా ఉండొచ్చు కదా అన్న ఆలోచన ఎప్పుడైనా వచ్చిందా? ఇది కేవలం శరీర రూపానికి సంబంధించిన యాదృచ్ఛిక విషయం కాదు. మనం బరువైన బ్యాగ్ మోసినా, బస్సు హ్యాండిల్ పట్టుకున్నా చేతికి అసలైన బలాన్నిచ్చే ఆ వేలు పొడవు వెనుక లక్షలాది సంవత్సరాల మానవ పరిణామ రహస్యం దాగి ఉంది.
ఐదు వేళ్లూ ఒక్కలా ఉండవు అనే సామెత తరచూ వింటూనే ఉంటాం. కానీ చేతి ఐదు వేళ్లలో మధ్య వేలు మాత్రమే ఎందుకు అన్నింటికంటే పొడవుగా ఉంటుంది? చూపుడు వేలో లేదా ఉంగరం వేలో ఇంకా పెద్దదిగా ఉండవచ్చు కదా. ఇది కేవలం సాధారణ శరీర నిర్మాణం మాత్రమే కాదు, దీని వెనుక లక్షలాది సంవత్సరాల మానవ పరిణామ రహస్యాలు, అద్భుతమైన బయోమెకానిక్స్ దాగి ఉన్నాయి. మనం రోజూ ప్రయాణించేటప్పుడు బస్సు హ్యాండిల్ పట్టుకోవడమైనా, బరువైన షాపింగ్ బ్యాగ్ మోయడమైనా, డోర్ నాబ్ తిప్పడమైనా అసలైన భారం చేతిపైనే పడుతుంది. శాస్త్రవేత్తల పరిశోధనల ప్రకారం.. మనం ఏదైనా వస్తువును చేత్తో గట్టిగా పట్టుకున్నప్పుడు, అత్యధిక ఒత్తిడి, బలం మధ్య వేలు పైనే కేంద్రీకృతమవుతాయి. చేతి వేళ్లలోని ఎముకల్లో మధ్య వేలి ఎముక అన్నింటికంటే పొడవైనది, దృఢమైనది. దీని చుట్టూ ఉండే కండరాలు, స్నాయువులు చేతి మధ్య భాగానికి అనుసంధానమై ఉండటం వల్ల గరిష్ట శక్తిని అందించే కెప్టెన్‌లా ఈ వేలు పనిచేస్తుంది.
ఆదిమ మానవుడి మనుగడ సూత్రం
ఈ శారీరక నిర్మాణం వెనుక కథ ఆదిమ యుగంలోనే మొదలైంది. ప్రాచీన కాలంలో మానవుడు చెట్ల కొమ్మలను పట్టుకుని వేలాడటం, ఎత్తైన చెట్ల నుంచి పండ్లను కోయడం, అడవి జంతువుల బారి నుంచి తప్పించుకోవడానికి రాళ్లు, బల్లెం వంటి ఆయుధాలను విసరడం నిత్యకృత్యంగా ఉండేది. ఈ పనులన్నింటికీ చేతి పట్టు అత్యంత బలంగా ఉండటం జీవన్మరణ సమస్యగా మారేది. ఎవరికైతే మధ్య వేలు దృఢంగా, పొడవుగా ఉందో వారు వస్తువులను, కొమ్మలను అత్యంత సమర్థవంతంగా పట్టుకోగలిగారు. ప్రకృతి ఎంపిక సిద్ధాంతం ప్రకారం ఈ లక్షణం తరతరాలుగా జన్యువుల ద్వారా బదిలీ అయి నేటి మానవ శరీరంలో శాశ్వతంగా స్థిరపడింది.
బొటనవేలితో సమన్వయం.. ఆర్చ్ నిర్మాణం
మధ్య వేలి పొడవుకు, ఎదురుగా ఉండే బొటనవేలికి మధ్య ఉన్న సమన్వయం ప్రకృతి చేసిన మరో వింత. నాలుగు వేళ్లు ఒకవైపు, బొటనవేలు వీటికి ఎదురుగా ఉండటం వల్లే మనుషులు వస్తువులను గుండ్రంగా చుట్టి పట్టుకోగలుగుతారు. మధ్య వేలు పొడవుగా ఉండి, మిగతా వేళ్లు క్రమంగా చిన్నవిగా ఉండటం వల్ల చేతిని ముడిచినప్పుడు అరచేయి సహజంగానే ఒక కప్పు లేదా ఆర్చ్ ఆకారంలోకి మారుతుంది. ఈ అర్ధచంద్రాకార అమరిక కారణంగా చేతిలో పట్టుకున్న వస్తువు అటూ ఇటూ జారిపోకుండా ఖచ్చితమైన సమతుల్యత ఏర్పడుతుంది. సూదిని పట్టుకోవడంలో ఉండే సున్నితత్వం, సుత్తిని తిప్పడంలో ఉండే మొరటు బలం రెండూ ఈ వేలి పొడవు వల్లే సాధ్యమవుతున్నాయి.
మనిషి సాంకేతిక పరిజ్ఞానాన్ని సృష్టించగలిగాడంటే, నాగరికతను నిర్మించగలిగాడంటే దానికి ఒక ముఖ్య కారణం సాధనాలను సమర్థవంతంగా వాడగల చేతి అమరికే. లక్షలాది సంవత్సరాల పాటు ప్రకృతి చెక్కిన ఈ అద్భుత శిల్పంలో మధ్య వేలి పొడవు మనిషి ఉనికికి అత్యంత కీలకమైన పునాది.