టాయిలెట్ ఫ్లష్ ట్యాంక్‌కు రెండు బటన్లు ఎందుకు ఉంటాయి..? ఇలా చేస్తే మస్త్ నీళ్లు ఆదా..
వాష్‌రూమ్‌కి వెళ్లినప్పుడు ఫ్లష్ ట్యాంక్‌పై రెండు బటన్లు కనిపిస్తే మీరు ఏం చేస్తారు? ఏదో ఒకటి నొక్కేస్తారా.. లేక రెండూ కలిపి ఒకేసారి గట్టిగా ప్రెస్ చేస్తారా? మీలాగే చాలామంది చేసే ఈ చిన్న పొరపాటు వల్ల వేల లీటర్ల నీరు వృథాగా పోతోందని మీకు తెలుసా? ఆధునిక టాయిలెట్లలో కనిపించే ఆ చిన్న, పెద్ద బటన్ల వెనుక ఒక ఆసక్తికరమైన సైన్స్ దాగుంది. వాటి వివరాలు ఈ స్టోరీలో తెలుసుకుందాం..
ఆధునిక ఇళ్లు, కార్యాలయాలు, హోటళ్లు లేదా షాపింగ్ మాల్స్‌లోని వాష్‌రూమ్‌లకు వెళ్లినప్పుడు చాలా మంది దృష్టిని ఒక విషయం ఆకర్షిస్తుంది. అక్కడ ఫ్లష్ చేయడానికి ఒకే బటన్ ఉండదు. బదులుగా రెండు వేర్వేరు బటన్లు కనిపిస్తాయి.. ఒకటి చిన్నది, మరొకటి పెద్దది. అయితే ఈ రెండు బటన్లను ఎందుకు ఇచ్చారో చాలా మంది ఆలోచించరు. అవగాహన లేక చాలామంది రెండింటిలో ఏదో ఒకదాన్ని నొక్కడం లేదా పని త్వరగా అయిపోతుందని భావించి రెండింటినీ కలిపి ఒకేసారి ప్రెస్ చేయడం చేస్తుంటారు. కానీ ఈ చిన్న డిజైన్ వెనుక పర్యావరణ పరిరక్షణ, నీటి ఆదాకు సంబంధించిన ఒక అద్భుతమైన సైన్స్ దాగుంది.
ఏమిటీ డ్యూయల్ ఫ్లష్ సిస్టమ్..?
ఆధునిక టాయిలెట్లలో అమర్చే ఈ ప్రత్యేక సాంకేతికతను డ్యూయల్ ఫ్లష్ సిస్టమ్ అని పిలుస్తారు. అవసరాన్ని బట్టి ఖచ్చితమైన పరిమాణంలో మాత్రమే నీటిని విడుదల చేయడం దీని ప్రధాన సూత్రం.
చిన్న బటన్: సాధారణంగా మూత్రవిసర్జన తర్వాత ఫ్లష్ చేయడానికి చిన్న బటన్‌ను రూపొందించారు. దీన్ని నొక్కినప్పుడు కేవలం 3 లీటర్ల నీరు మాత్రమే విడుదలవుతుంది.
పెద్ద బటన్: మలవిసర్జన తర్వాత ఫ్లష్ చేయడానికి ఈ పెద్ద బటన్‌ను వాడాలి. దీని ద్వారా సుమారు 6 లీటర్ల నీరు వేగంగా ట్యాంక్ నుంచి బయటకు వస్తుంది.
ప్రతిసారీ ట్యాంక్‌లోని నీరంతటినీ వృథా చేయకుండా, వ్యర్థాల స్వభావాన్ని బట్టి నీటి పరిమాణాన్ని ఎంచుకునే అవకాశాన్ని ఈ మెకానిజం అందిస్తుంది.
పాత విధానానికి భిన్నంగా..
గతంలో వాడిన సాంప్రదాయ టాయిలెట్లలో ఒకే ఫ్లష్ హ్యాండిల్ లేదా సింగిల్ బటన్ మాత్రమే ఉండేది. దాంతో ప్రతిసారీ ఫ్లష్ చేసినప్పుడు ఏకంగా 9 నుంచి 12 లీటర్ల నీరు మొత్తం వృథాగా పోయేది. ఇంట్లో రోజూ వాడే మొత్తం నీటిలో అత్యధిక భాగం టాయిలెట్లలోనే ఖర్చవుతుంది. ఇలాంటి అనవసర నీటి వ్యర్థాన్ని అరికట్టేందుకే ఆస్ట్రేలియాకు చెందిన ఇంజనీర్లు మొదట ఈ డ్యూయల్ ఫ్లష్ టెక్నాలజీని అందుబాటులోకి తెచ్చారు.
నిజంగానే నీరు ఆదా అవుతుందా?
ఖచ్చితంగా అవుతుంది. ఒక సగటు కుటుంబంలో డ్యూయల్ ఫ్లష్ విధానాన్ని సరైన పద్ధతిలో వాడితే ఏటా వేల లీటర్ల స్వచ్ఛమైన నీటిని ఆదా చేయవచ్చు. చిన్న బటన్ వాడాల్సిన చోట పెద్ద బటన్ వాడకుండా జాగ్రత్తపడితేనే రోజువారీ నీటి వినియోగం గణనీయంగా తగ్గుతుంది. అంతేకాదు తాగునీటి శుద్ధి వ్యవస్థలపై కూడా ఒత్తిడి తగ్గుతుంది.
వినియోగదారులు సులభంగా గుర్తుపట్టేందుకే తయారీదారులు ఆ బటన్ల పరిమాణాలను వేర్వేరుగా డిజైన్ చేస్తారు. అయినప్పటికీ అవగాహన లోపంతో ఇప్పటికీ చాలామంది రెండింటినీ ఒకేసారి నొక్కి మరింత నీటిని వృథా చేస్తుంటారు. ఇది కేవలం బాత్‌రూమ్ డెకరేషన్ లేదా మోడ్రన్ లుక్ కోసం పెట్టిన డిజైన్ కాదు.. ప్రతి నీటి బొట్టునూ సంరక్షించేందుకు రూపొందించిన శక్తివంతమైన ఆవిష్కరణ. ఇకపై ఫ్లష్ చేసే ముందు ఏ బటన్ నొక్కుతున్నారో ఒక్క క్షణం గమనించడం మర్చిపోకండి.