జుట్టు రాలడం నుంచి తలనొప్పి వరకు.. ఒంట్లో విటమిన్ డి తగ్గితే ఎలాంటి సమస్యలు వస్తాయంటే..
ఆధునిక జీవనశైలి కారణంగా విటమిన్ డి లోపం చిన్నపిల్లల నుంచి పెద్దల వరకు చాలామందిని వేధిస్తోంది. ఎండకు దూరంగా ఉండటం, బిజీ వర్క్ షెడ్యూల్స్, అపార్ట్మెంట్ జీవనం, రాత్రివేళల్లో మొబైల్ ఫోన్ల అధిక వినియోగం వంటి అలవాట్లు దీనికి కారణమవుతున్నాయి. విటమిన్ డి లోపంతో అలసట, కండరాల బలహీనత, ఎముకల సమస్యలు వంటి ఇబ్బందులు ఎదురయ్యే అవకాశం ఉంది.
ప్రస్తుత ఆధునిక జీవనశైలిలో ఊబకాయం, మధుమేహం వంటి ఆరోగ్య సమస్యలతో పాటు విటమిన్ డి లోపం కూడా తీవ్రమైన ఆందోళన కలిగిస్తోంది. చిన్నపిల్లల నుండి పెద్దల వరకు అనేక మంది ఈ సమస్యతో బాధపడుతున్నారు. అపార్ట్మెంట్లు, బిజీ ఆఫీస్ షెడ్యూల్లు, ఎండకు దూరంగా ఉండటం, మొబైల్ ఫోన్ల అధిక వినియోగం వంటివి విటమిన్ డి లోపానికి ప్రధాన కారణాలుగా నిలుస్తున్నాయి. క్లయింట్లు, పేషెంట్లకు చేసిన నివేదికల ప్రకారం, ప్రతి పది మందిలో కనీసం నలుగురికి విటమిన్ డి లోపం ఉన్నట్లు తెలుస్తోంది. మన పూర్వీకుల కాలంలో లేదా మన తల్లిదండ్రుల కాలంలో ఈ సమస్య దాదాపుగా ఉండేది కాదు.. కానీ ఇప్పుడు ఇది సర్వసాధారణమైపోయింది.
విటమిన్ డి లోపం వల్ల కలిగే అనర్థాలు
విటమిన్ డి లోపం వల్ల కలిగే నష్టాలు తీవ్రమైనవి. జుట్టు రాలడం, తరచుగా తలనొప్పి, మైగ్రేన్, కండరాల బలహీనత, నరాలు బలహీనపడటం, శరీర బలహీనత, ఏకాగ్రత లోపించడం వంటి లక్షణాలు ఈ లోపాన్ని సూచిస్తాయి. అంతేకాదు, విటమిన్ డి లోపం ఉన్నవారిలో ఒత్తిడి, భయం వంటి మానసిక సమస్యలు కూడా అధికంగా ఉంటాయి. మైగ్రేన్ వంటి సమస్యలను నియంత్రించడానికి విటమిన్ డి స్థాయిలు సరిగా ఉండటం అత్యవసరం.
సూర్యరశ్మి ప్రాముఖ్యత – ఆధునిక జీవనశైలి ప్రభావం
ఈ సమస్యకు ప్రధాన కారణాలలో ఒకటి సూర్యరశ్మికి సరైన సమయాల్లో దూరంగా ఉండటం. చాలా మంది ఎండకు వెళ్తే చర్మం నల్లబడుతుందని లేదా ఇచ్చింగ్ సమస్యలు వస్తాయని ఆందోళన చెందుతారు. అయితే, ఉదయం 6:00 నుండి 8:30 గంటల మధ్య లభించే లేత సూర్యరశ్మి విటమిన్ డికి ఉత్తమ సహజ వనరు. ఈ సమయంలో సూర్యరశ్మిని తీసుకోవడం వల్ల ఎటువంటి చర్మ సమస్యలు ఉండవు. ఆధునిక నిర్మాణాలు, అపార్ట్మెంట్లు, ఇళ్లకు సూర్యరశ్మి సరిగా రాకపోవడం కూడా ఈ లోపానికి దోహదపడుతోంది. గతంలో వంటింట్లోకి, హాల్లోకి నేరుగా సూర్యకిరణాలు పడేవి, కానీ ఇప్పుడు ఇళ్లను కట్టుకునే విధానం మారిపోయింది. అందుకే చాలామంది పార్కు వంటి ప్రదేశాలకు ఫిట్నెస్ కోసం, ఎండను పొందడం కోసం వెళ్తున్నారు. రాత్రి ఆలస్యంగా పడుకోవడం, ఉదయం ఆలస్యంగా నిద్రలేవడం కూడా సూర్యరశ్మిని పొందకుండా అడ్డుకుంటున్నాయి. రాత్రి ఆలస్యంగా పడుకుంటే, ఉదయం సూర్యరశ్మిని పొందలేరు. మొబైల్ ఫోన్ల అధిక వాడకం కూడా ఈ అలవాట్లను ప్రోత్సహిస్తోంది.. దీనివల్ల రెటీనా దెబ్బతినే ప్రమాదం, మైగ్రేన్ వచ్చే అవకాశాలు పెరుగుతాయి.
విటమిన్ డి అధికంగా ఉండే ఆహారాలు
విటమిన్ డి లోపాన్ని అధిగమించడానికి సరైన ఆహారం, సూర్యరశ్మి తప్పనిసరి. విటమిన్ డి అధికంగా ఉండే ఆహారాలను క్రమం తప్పకుండా తీసుకోవాలి.
- గుడ్లు
- పాలు, చీజ్, బటర్
- సోయాబీన్స్, పుట్టగొడుగులు, సోయా చంక్స్
- సార్డిన్ ఫిష్, సాల్మన్ ఫిష్, ట్యూనా వంటి కొవ్వు చేపలు
పనీర్ వంటి పాల ఉత్పత్తులు, పప్పులలో కూడా విటమిన్ డి ఉన్నప్పటికీ, అవి తక్కువ పరిమాణంలో ఉంటాయి. ఈ ఆహారాలను ఉడకబెట్టడం, ఆమ్లెట్, ఫ్రై, కూర లేదా రోస్టెడ్గా వివిధ పద్ధతులలో తీసుకోవచ్చు, తద్వారా బోర్ కొట్టకుండా, ఇష్టంగా తినవచ్చు. బయటి మసాలాలకు బదులుగా ఇంట్లో తయారుచేసిన మసాలాలను ఉపయోగించడం ఆరోగ్యానికి మరింత మంచిది.
ప్రతిరోజూ ఉదయం 10 నుండి 15 నిమిషాల పాటు ఎండలో కూర్చోవడం లేదా వాకింగ్, జాగింగ్ చేయడం ద్వారా విటమిన్ డిని సమృద్ధిగా పొందవచ్చు. ఈ సరళమైన మార్గాలను అనుసరించడం ద్వారా విటమిన్ డి లోపాన్ని సమర్థవంతంగా ఎదుర్కోవచ్చు, తద్వారా ఆరోగ్యకరమైన జీవనాన్ని పొందవచ్చు. ఆరోగ్యంగా ఉండాలంటే సూర్యరశ్మి, సరైన ఆహారం రెండూ ముఖ్యమని గుర్తుంచుకోవాలని ఆరోగ్య నిపుణులు సూచిస్తున్నారు.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..