థైరాయిడ్ వస్తే జీవితాంతం మందులు వాడాలా? నిపుణులు చెబుతున్న వాస్తవాలు

Thyroid Disorder Myths

థైరాయిడ్ వస్తే జీవితాంతం మందులు వాడాల్సిందేనని, ఇది కేవలం మహిళలకు మాత్రమే వచ్చే వ్యాధి అని చాలామంది భావిస్తుంటారు. కానీ వైద్య నిపుణులు మాత్రం ఈ అభిప్రాయాలు పూర్తిగా సరైనవి కావని చెబుతున్నారు. థైరాయిడ్ లక్షణాలను సకాలంలో గుర్తించడం, సరైన చికిత్స పొందడం చాలా ముఖ్యం.

థైరాయిడ్ అంటే ఏమిటి?

మన గొంతు భాగంలో సీతాకోకచిలుక ఆకారంలో ఉండే థైరాయిడ్ గ్రంథి శరీర జీవక్రియను నియంత్రించే కీలక అవయవం. ఇది విడుదల చేసే హార్మోన్లు శరీరానికి అవసరమైన శక్తి ఉత్పత్తి, గుండె స్పందన, బరువు నియంత్రణ, నిద్ర, మానసిక ఆరోగ్యం వంటి అనేక అంశాలను ప్రభావితం చేస్తాయి. ఈ హార్మోన్ల ఉత్పత్తిలో అసమతుల్యత ఏర్పడినప్పుడు థైరాయిడ్ సమస్యలు తలెత్తుతాయి.

థైరాయిడ్‌పై ఉన్న ప్రధాన అపోహలు

థైరాయిడ్ వచ్చిన ప్రతి ఒక్కరూ జీవితాంతం మందులు వాడాల్సిన అవసరం లేదని వైద్యులు చెబుతున్నారు. కొంతమందికి మాత్రమే దీర్ఘకాలిక చికిత్స అవసరం అవుతుంది. సరైన ఆహారం, వ్యాయామం, ఆరోగ్యకరమైన జీవనశైలి పాటించడం ద్వారా సమస్యను నియంత్రణలో ఉంచుకోవచ్చు. అలాగే థైరాయిడ్ కేవలం మహిళలకు మాత్రమే వస్తుందని భావించడం కూడా అపోహే. పురుషులు, పిల్లలు కూడా ఈ వ్యాధికి గురయ్యే అవకాశం ఉంది. అయితే లక్షణాలను నిర్లక్ష్యం చేయడం వల్ల చాలా సందర్భాల్లో ఆలస్యంగా గుర్తించబడుతోంది.

థైరాయిడ్‌కు కారణాలు

జన్యుపరమైన అంశాలు, అయోడిన్ లోపం లేదా అధిక వినియోగం, ఆటో ఇమ్యూన్ వ్యాధులు, రక్తహీనత, టైప్-1 సెలియాక్ వ్యాధి, లూపస్, కీళ్లవాతం, స్జోగ్రెన్ సిండ్రోమ్ వంటి సమస్యలు థైరాయిడ్‌కు కారణమవుతాయి.

థైరాయిడ్ ప్రధాన రకాలు

హైపోథైరాయిడిజంలో థైరాయిడ్ హార్మోన్లు తక్కువగా ఉత్పత్తి అవుతాయి. దీనివల్ల బరువు పెరగడం, మలబద్ధకం, అలసట, పొడి చర్మం, శక్తి తగ్గడం వంటి లక్షణాలు కనిపిస్తాయి. హైపర్ థైరాయిడిజంలో హార్మోన్లు అధికంగా ఉత్పత్తి అవుతాయి. దీంతో బరువు వేగంగా తగ్గడం, గుండె వేగంగా కొట్టుకోవడం, ఆందోళన, నిద్రలేమి, కండరాల బలహీనత వంటి సమస్యలు ఎదురవుతాయి. నిపుణుల అభిప్రాయం ప్రకారం, థైరాయిడ్ లక్షణాలను నిర్లక్ష్యం చేయకుండా సకాలంలో పరీక్షలు చేయించుకోవడం అత్యంత అవసరం. సరైన చికిత్స, సమతుల్య ఆహారం, ఆరోగ్యకరమైన జీవనశైలితో థైరాయిడ్‌ను సమర్థవంతంగా నియంత్రించవచ్చని వైద్యులు సూచిస్తున్నారు.