ఎడారిలో అరుదైన లైఫ్స్టైల్! ఈ తెగ మహిళల అందం వెనుక సీక్రెట్ ఇదే
ఆఫ్రికా ఖండంలోని నమీబియా దేశం ఉత్తర భాగంలో నివసించే హింబా తెగ ప్రజలు ప్రపంచంలోనే అత్యంత అసాధారణమైన జీవనశైలిని కలిగి ఉన్నారు. నీటి ఎద్దడి ఎక్కువగా ఉండే ఎడారి ప్రాంతంలో నివసించే వీరు, జీవితంలో ఒక్కసారి కూడా నీళ్లతో స్నానం చేయరు. అయినప్పటికీ వీరు చాలా శుభ్రంగా, సహజమైన శరీర సుగంధంతో మెరిసిపోతుంటారు. వినడానికి వింతగా ఉన్నా ఇది అక్షర సత్యం.
హింబా మహిళలు ఎప్పుడూ ఎర్రటి రంగులో మెరిసిపోతూ కనిపిస్తారు. దీనికి కారణం వారు శరీరంపై రాసుకునే ‘ఒక్రె’ అనే ప్రత్యేకమైన పేస్ట్. వెన్న, ఎర్రటి మట్టి కలిపి తయారు చేసే ఈ మిశ్రమం వారిని ఎండ వేడి నుండి కాపాడటమే కాకుండా చర్మాన్ని కోమలంగా ఉంచుతుంది. నీళ్లకు బదులుగా వారు అనుసరించే ‘పొగ స్నానం’ పద్ధతి వారి సంస్కృతిలో ఒక ముఖ్యమైన భాగం.
పొగ స్నానం
హింబా మహిళలు తమ శరీరాన్ని శుభ్రపరుచుకోవడానికి ‘స్మోక్ బాత్’ (పొగ స్నానం) చేస్తారు. ఒక చిన్న గిన్నెలో వేడి బొగ్గులు వేసి, వాటిపై కొన్ని రకాల మూలికలను వేస్తారు. ఆ మూలికల నుండి వచ్చే పొగను శరీరం మొత్తానికి పట్టిస్తారు. ఈ వేడి పొగ చర్మ రంధ్రాలను తెరిచి, చెమట ద్వారా మలినాలను బయటకు పంపుతుంది. మరింత ప్రభావవంతంగా ఉండటం కోసం కొందరు దీనిని బ్లాంకెట్ కప్పుకుని మరీ చేస్తారు. ఇది చర్మాన్ని తాజాగా ఉంచడమే కాకుండా శరీర దుర్వాసనను కూడా పోగొడుతుంది.
వీరు రోజూ వాడే ఒక్రె పేస్ట్ కేవలం అలంకరణ మాత్రమే కాదు, అదొక సహజ రక్షణ కవచం. ఎడారిలో ఉండే కఠినమైన ఎండ, పొడి గాలి నుండి ఇది వారి చర్మాన్ని రక్షిస్తుంది. అలాగే కీటకాలు, దోమలు కుట్టకుండా ఈ పేస్ట్ అడ్డుకుంటుంది. ఈ ఎర్రటి రంగు వారి సంస్కృతిలో భూమికి మరియు రక్తానికి (జీవానికి) చిహ్నంగా భావిస్తారు. వీరి హెయిర్ స్టైల్స్, ఆభరణాలు కూడా వారి సామాజిక హోదాను ప్రతిబింబిస్తాయి.
పశుపోషణే ప్రాణం
హింబా తెగ ప్రజలు ప్రధానంగా పశువుల కాపరులు. పశువులు, మేకల మందలతో కలిసి నీరు, మేత దొరికే ప్రాంతాలకు బంజారాల్లా వలస వెళ్తుంటారు. వీరి నివాసాలు (గుడిసెలు) కూడా చాలా ప్రత్యేకంగా ఉంటాయి. ఆధునిక ప్రపంచానికి దూరంగా ఉన్నప్పటికీ, తమ పూర్వీకుల సంప్రదాయాలను కాపాడుకోవడంలో వీరు ఎంతో పట్టుదలగా ఉంటారు. కుటుంబ సభ్యుల పట్ల, సమాజం పట్ల వీరికి గొప్ప గౌరవం ఉంటుంది.
ప్రస్తుతం వీరి వింత జీవన విధానాన్ని చూడటానికి ప్రపంచం నలుమూలల నుండి పర్యాటకులు నమీబియాకు వస్తుంటారు. నీరు లేని కఠిన వాతావరణంలో కూడా తమదైన శైలిలో శుచిత్వాన్ని, అందాన్ని కాపాడుకుంటున్న వీరి జీవన విధానం నిజంగా ఆశ్చర్యకరం.