సన్‌ఫ్లవర్ నూనె vs పల్లీ నూనె.. మీ గుండెకు ఏది మంచిది..? అందరూ చేసే తప్పులు ఇవే..
Sunflower Oil vs Groundnut Oil: మనం ఎంత మంచి కూరగాయలు తింటున్నాం అన్నదానికంటే.. వాటిని ఏ నూనెతో వండుతున్నామన్నదే మన రక్తనాళాల ఆరోగ్యాన్ని నిర్ణయిస్తుంది. ఆధునికత పేరుతో పల్లీ నూనెను పక్కనపెట్టి సన్‌ఫ్లవర్‌కు మారిన వారు కొందరైతే.. కాదు కాదు, మళ్లీ పాతకాలం నాటి వేరుశనగ నూనే శ్రేష్టమంటున్నవారు మరికొందరు. సైన్స్ పరంగా చూస్తే ఈ రెండింటిలో మీ శరీరానికి, మీ వంటలకు ఏది మంచిది..? అనే విషయాలు ఈ స్టోరీలో తెలుసుకుందాం..
Updated on: Nov 06, 2026 | 4:06 PM
ఆధునిక జీవనశైలిలో గుండె ఆరోగ్యంపై శ్రద్ధ పెరిగిన తర్వాత వంటింట్లో వాడే నూనెలపై చర్చ ఊపందుకుంది. దశాబ్దాలుగా తెలుగు లోగిళ్లలో సంప్రదాయ వంటకాలకు పల్లీ నూనె వాడుతుండగా, లైట్ ఆయిల్ అంటూ సన్‌ఫ్లవర్ నూనె మార్కెట్‌ను ఆక్రమించింది. అయితే ఈ రెండింటిలో ఆరోగ్యానికి ఏది నిజంగా మేలు చేస్తుందనే విషయంలో చాలామంది అయోమయానికి గురవుతున్నారు. పోషకాల సమతుల్యతను పరిశీలిస్తే.. పల్లీ నూనెలో మోనో అన్‌శాచురేటెడ్ ఫ్యాటీ యాసిడ్లు ఎక్కువగా ఉంటాయి. ఇవి రక్తంలో చెడు కొలెస్ట్రాల్‌ను తగ్గించి, మంచి కొలెస్ట్రాల్‌ను స్థిరంగా ఉంచడానికి దోహదపడతాయి. మరోవైపు సన్‌ఫ్లవర్ ఆయిల్‌లో పాలీ అన్‌శాచురేటెడ్ ఫ్యాటీ యాసిడ్లు సమృద్ధిగా ఉంటాయి. చర్మానికి, రోగనిరోధక శక్తికి మేలు చేసే విటమిన్ E సన్‌ఫ్లవర్ ఆయిల్‌లో ఎక్కువగా లభించినప్పటికీ, పల్లి నూనెలో ఉండే రెస్వెరాట్రాల్ వంటి శక్తివంతమైన యాంటీఆక్సిడెంట్లు గుండె నాళాలు దెబ్బతినకుండా కాపాడతాయి.
డీప్ ఫ్రైకు ఏది బెస్ట్.?
భారతీయ వంట శైలికి స్మోకింగ్ పాయింట్ అత్యంత కీలకం. పల్లి నూనెకు స్మోకింగ్ పాయింట్ ఎక్కువగా ఉండటం వల్ల డీప్ ఫ్రైలు, పోపులు, ఎక్కువ సేపు మరిగించే వంటకాలకు ఇది అత్యంత సురక్షితమైనది. అధిక ఉష్ణోగ్రతల వద్ద కూడా ఇది విషపూరిత పదార్థాలుగా మారకుండా నిలకడగా ఉంటుంది. సన్‌ఫ్లవర్ ఆయిల్ తేలికగా ఉండి వంటకాలకు జిడ్డును తగ్గించినప్పటికీ, అధిక మంటపై ఎక్కువసేపు వేడి చేస్తే త్వరగా ఆక్సీకరణకు గురవుతుంది. అందుకే సన్‌ఫ్లవర్ ఆయిల్‌ను సాధారణ తాలింపులకు, బేకింగ్‌కు వాడటం మంచిది తప్ప పదే పదే డీప్ ఫ్రై చేయడానికి సరిపోదు.
మరొక ప్రధాన తేడా వీటిలోని ఒమేగా ఫ్యాటీ యాసిడ్ల నిష్పత్తిలో కనిపిస్తుంది. సన్‌ఫ్లవర్ ఆయిల్‌లో ఒమేగా-6 ఫ్యాటీ యాసిడ్లు చాలా ఎక్కువగా ఉంటాయి. ఆహారంలో ఒమేగా-3 కంటే ఒమేగా-6 మోతాదు మించితే శరీరంలో దీర్ఘకాలిక వాపులు, కీళ్ల నొప్పులు వచ్చే ప్రమాదం ఉందని అధ్యయనాలు చెబుతున్నాయి. పల్లీ నూనెలో ఒమేగా-6, ఒమేగా-9 సమతుల్యంగా ఉండటం వల్ల శరీర జీవక్రియలకు ఇది మరింత సహకరిస్తుంది. పైగా రిఫైన్డ్ ఆయిల్స్‌తో పోలిస్తే సంప్రదాయ గానుగ పల్లి నూనె శరీరానికి మరింత సహజమైన శక్తిని ఇస్తుంది.
మొత్తంగా చూస్తే ఏ ఒక్క నూనె కూడా సంపూర్ణమైనది కాదు. అధిక ఉష్ణోగ్రతలతో చేసే భారతీయ వేపుళ్లకు, సంప్రదాయ కూరలకు పల్లీ నూనె ఉత్తమ ఎంపిక కాగా తక్కువ నూనెతో త్వరగా పూర్తయ్యే వంటకాలకు సన్‌ఫ్లవర్ ఆయిల్ అనుకూలంగా ఉంటుంది. పోషకాహార నిపుణుల సలహా ప్రకారం ఒకే నూనెపై పూర్తిగా ఆధారపడకుండా, వంట రకాన్ని బట్టి నూనెను ఎంచుకోవడం లేదా నెలకోసారి మార్చి వాడటం శరీరానికి అన్ని రకాల కొవ్వు ఆమ్లాలను సమతుల్యంగా అందిస్తుంది.
