Monsoon Gardening: వర్షం నీరు ఇండోర్ ప్లాంట్స్కు అమృతమా.. లేక శాపమా?.. మొక్కలు పెంచేవారు తప్పక తెలుసుకోండి
ఇంటి లోపల అందాన్ని, పచ్చదనాన్ని పెంచడానికి చాలా మంది రకరకాల ఇండోర్ ప్లాంట్స్ను పెంచుకుంటూ ఉంటారు. అయితే, మారుతున్న వాతావరణం, వర్షాకాలం నేపథ్యంలో మొక్కల ప్రేమికుల్లో తరచూ ఒక సందేహం తలెత్తుతూ ఉంటుంది. కురుస్తున్న వర్షం నీటిని పట్టి, వాటిని రూమ్లలో ఉండే ఇండోర్ మొక్కలకు పోయవచ్చా? వర్షం నీరు మొక్కల ఆరోగ్యానికి మంచిదేనా.. లేక ఇండోర్ ప్లాంట్స్ త్వరగా కుళ్ళిపోవడానికి కారణమవుతుందా?
సాధారణంగా మనం వాడే మున్సిపల్ కుళాయి నీరు లేదా ఆర్ఓ ఫిల్టర్ నీటి కంటే.. ప్రకృతి ప్రసాదించే వాన నీటిలో మొక్కల ఎదుగుదలకు అవసరమైన ఏ ప్రత్యేక పోషకాలు దాగున్నాయి? ఈ వర్షాకాలంలో ఇండోర్ మొక్కల సంరక్షణకు సంబంధించి గార్డెనింగ్ నిపుణులు చెబుతున్న ఆసక్తికరమైన విషయాలను ఇప్పుడు పూర్తి వివరంగా తెలుసుకుందాం.
1. వాన నీరు మొక్కలకు ‘నేచురల్ అమృతం’
గార్డెనింగ్ నిపుణుల అభిప్రాయం ప్రకారం.. ఇండోర్ ప్లాంట్స్కు వర్షం నీరు అత్యంత ఆరోగ్యకరమైనది. ఎందుకంటే వాన నీటిలో ‘నైట్రోజన్’ శాతం సహజంగానే ఎక్కువగా ఉంటుంది. నైట్రోజన్ మొక్కల ఆకులు పచ్చగా, ఏపుగా పెరగడానికి ఇంధనంలా పనిచేస్తుంది.
సాధారణ కుళాయి నీటిలో క్లోరిన్, ఫ్లోరైడ్ వంటి రసాయనాలు ఉంటాయి. ఇవి కాలక్రమేణా కుండీలలోని మట్టిలో పేరుకుపోయి ఇండోర్ మొక్కల ఆకులు బ్రౌన్ కలర్లోకి మారేలా చేస్తాయి. కానీ వర్షం నీరు పూర్తిగా రసాయన రహితంగా ఉండటం వల్ల మొక్కలకు ఎంతో మేలు చేస్తుంది.
2. ఆక్సిజన్ మరియు మట్టి శుద్ధి
ఆకాశం నుండి పడే వాన నీటిలో ఆక్సిజన్ స్థాయిలు చాలా ఎక్కువగా ఉంటాయి. ఈ నీటిని ఇండోర్ మొక్కలకు పోసినప్పుడు.. వేర్ల వ్యవస్థకు అద్భుతమైన ఆక్సిజన్ అంది, వేర్లు కుళ్ళిపోకుండా కాపాడతాయి.
వాన నీరు స్వభావ సిద్ధంగా కొద్దిగా ఆమ్లత్వాన్ని కలిగి ఉంటుంది. ఇండోర్ మొక్కలు పెరగడానికి ఇలాంటి మైల్డ్ అసిడిక్ వాతావరణం మట్టిలో అవసరం. ఇది మట్టిలోని ఇతర పోషకాలను మొక్కలు సులభంగా పీల్చుకునేలా చేస్తుంది.
వర్షం నీటిని వాడేటప్పుడు పాటించవలసిన ముఖ్యమైన నియమాలు:
మొదటి వర్షం నీటిని వాడకండి: వర్షాకాలం ప్రారంభంలో పడే మొదటి 15-20 నిమిషాల వర్షం నీటిని పట్టుకోకూడదు. ఎందుకంటే గాలిలో ఉండే కాలుష్యం, దుమ్ము-ధూళి ఆ నీటితో పాటు కిందకు వస్తాయి. వర్షం బాగా పడ్డాక లభించే స్వచ్ఛమైన నీటిని మాత్రమే సేకరించాలి.
రూమ్ టెంపరేచర్కు తెచ్చాకే పోయాలి: వర్షం నీరు చాలా చల్లగా ఉంటుంది. ఆ చల్లటి నీటిని నేరుగా రూమ్ లోపల ఉండే మొక్కలకు పోస్తే వాటి వేర్లు ‘షాక్’ కు గురవుతాయి. కాబట్టి నీటిని పట్టిన తర్వాత కాసేపు రూమ్ ఉష్ణోగ్రతకు వచ్చే వరకు ఉంచి, ఆపై మొక్కలకు పోయాలి.
నీరు ఎక్కువ అవ్వకుండా చూడండి: ఇండోర్ ప్లాంట్స్కు ఎక్కువ నీరు అవసరం లేదు. కాబట్టి వాన నీరు కదా అని కుండీ నిండా నిరంతరం పోస్తూ ఉండకూడదు. మట్టి పైపొర ఎండిపోయినప్పుడు మాత్రమే తగినంత నీరు పోయాలి.
మీ ఇంట్లోని మనీ ప్లాంట్, స్నేక్ ప్లాంట్, ఆలోవెరా లేదా పీస్ లిల్లీ వంటి ఇండోర్ మొక్కలు వానాకాలంలో డల్ అయిపోకుండా ఉండాలంటే.. వారానికి ఒకటి లేదా రెండుసార్లు సాధారణ నీటికి బదులు వాన నీటిని పోసి చూడండి, మొక్కలు సరికొత్త కాంతితో మెరిసిపోతాయి.