వంట చేసే టైమ్లో వేడి తట్టుకోలేకపోతున్నారా..? ఈ టిప్స్ ట్రై చేసి చూడండి..!
వేసవిలో వంటగదిలో పనిచేయడం ఎంతో కష్టంగా మారుతుంది. అధిక ఉష్ణోగ్రతల మధ్య వంట చేయడం వల్ల శరీరం అలసటకు గురవుతుంది. అయితే కొన్ని సులభమైన మార్గాలను పాటిస్తే కిచెన్ వేడిని తగ్గించుకోవచ్చు. ఈ సూచనలు రోజువారీ వంటలో సౌకర్యం కలిగించడమే కాకుండా శరీరానికి చల్లదనాన్ని కూడా అందిస్తాయి.
వేసవి మితిమీరిన ఎండలతో వేడి తాళలేని స్థాయికి చేరుతుంది. ఇలాంటి సమయంలో వంటగదిలో పని చేయడం చాలా కష్టంగా మారుతుంది. ముఖ్యంగా మహిళలకు కిచెన్ పని చేసే సమయంలో అధిక ఉష్ణోగ్రత వల్ల అలసట, ఒత్తిడి, నీరసం వంటి సమస్యలు కలుగుతాయి. అయితే కొన్ని చిన్న చిన్న మార్పులతో వంటగదిలో చల్లదనాన్ని పెంచుకుని వేడిని తగ్గించుకోవచ్చు.
వంట చేసేటప్పుడు శరీరానికి చల్లదనాన్ని అందించేందుకు ఒక చిన్న పోర్టబుల్ ఫ్యాన్ను కిచెన్లో పెట్టుకోవచ్చు. ఇది వేడిని తట్టుకోవడంలో సహాయపడుతుంది. మొబైల్ ఫ్యాన్లు తక్కువ ఖర్చుతో దొరికే వీలుండటం వల్ల ప్రతి ఒక్కరూ వాడవచ్చు.
వంటగదిలో పర్యావరణ గాలి ప్రవేశం బాగా ఉండేలా చూసుకోవాలి. పెద్ద కిటికీలు, ఎగ్జాస్ట్ ఫ్యాన్లు ఉంటే వేడి త్వరగా బయటకు వెళ్లి కిచెన్ లో చల్లదనం ఏర్పడుతుంది. ఉదయం గాని, సాయంత్రం గాని గాలి బాగా వచ్చే సమయంలో కిటికీలు తెరిచి ఉంచడం మంచిది.
వేసవి కాలంలో ఒవెన్ వాడితే గది ఉష్ణోగ్రత మరింత పెరుగుతుంది. అందుకే వంటకు మైక్రోవేవ్ లేదా స్లో కుక్కర్ వంటివి ఉపయోగించడం ఉత్తమం. ఇవి వేడి తక్కువగా విడుదల చేస్తాయి.. శరీరానికి కూడా ఒత్తిడి తక్కువగా ఉంటుంది.
మధ్యాహ్నం వేళ వాతావరణ ఉష్ణోగ్రత ఎక్కువగా ఉంటుంది. ఆ సమయంలో వంట చేస్తే వేడితో శరీరం అలసిపోతుంది. అందుకే వంటను ఉదయాన్నే పూర్తి చేసుకోవడం ఉత్తమం. లేదంటే సాయంత్రం వేళ తేలికపాటి వంటలను ప్రిపేర్ చేయండి.
ఈ కాలంలో వేడి తగ్గించేందుకు కాపర్, స్టీల్ వంటివి ఎక్కువగా వాడాలి. ఇవి వేడిని సమంగా పంచి శరీరంపై ప్రభావాన్ని తగ్గిస్తాయి. అల్యూమినియం వంటి వేడిని ఎక్కువగా నిల్వ ఉంచే పదార్థాల వాడకాన్ని తగ్గించాలి.
వంటగదిలో వెలుతురు ఎక్కువగా వస్తే వేడి తక్కువగా అనిపించినా.. గది ఉష్ణోగ్రత పెరుగుతుంది. అందుకే హీట్ రెసిస్టెంట్ కర్టెన్లను కిటికీలకు అమర్చితే వేడి లోపలికి రాకుండా అడ్డుకోవచ్చు.
వంటగదిలో వేడి తగ్గించాలంటే కాంపాక్ట్ కుకింగ్ ఒక మంచి అలవాటు. అంటే రోజు మూడుసార్లు వండడం బదులుగా ఒకేసారి ఎక్కువగా వండి నిల్వ చేసుకుంటే మంచిది. దీనివల్ల మళ్లీ మళ్లీ స్టౌపై వంట చేయాల్సిన అవసరం ఉండదు. ఇలా చేస్తే వంటగదిలో ఉండే వేడి తగ్గిపోతుంది. వేసవిలో గ్యాస్ ఎక్కువగా వాడకుండా సమయం, శ్రమ, ఎనర్జీ కూడా ఆదా అవుతుంది. ఈ అలవాటు వల్ల ఆరోగ్యం కూడా బాగుంటుంది.
వంట చేసేటప్పుడు కొబ్బరినీరు, బటర్ మిల్క్ లేదా నిమ్మకాయ రసం తాగడం వల్ల శరీర ఉష్ణోగ్రత నియంత్రితంగా ఉంటుంది. ఇవి శక్తినిస్తాయి, ఉత్సాహంగా పని చేయటానికి ఉపయోగపడతాయి. వేసవిలో వంట చేయడం అంటే సవాల్ తో కూడిన పని అనే చెప్పాలి. అయితే ఈ సూచనలను పాటిస్తే వంటగదిలో వేడి నుంచి ఉపశమనం పొందటమే కాకుండా ఆరోగ్యంగా ఉండగలుగుతారు.