ఈ మొక్క మీ ఇంట్లో ఉంటే బల్లులకు చుక్కలే.. ఇలా చేస్తే ఒక్కటి కూడా కనిపించదు..
బల్లుల బెడదతో బెంబేలెత్తిపోతున్నారా? వాటిని తరిమికొట్టడానికి మీరు చేసే ప్రయత్నాలన్నీ విఫలమవుతున్నాయా? అయితే ఈ చిట్కా మీ కోసమే.. తులసి మొక్క కేవలం భక్తినే కాదు బల్లుల నుండి మీ ఇంటికి రక్షణను కూడా ఇస్తుంది. బల్లులను, దోమలను పారద్రోలే ఈ తులసి మ్యాజిక్ ఏంటో తెలిస్తే మీరు వెంటనే ప్రయత్నిస్తారు. ఆ వివరాలు తెలుసుకుందాం..
వేసవి వచ్చిందంటే చాలు.. ఎండలతో పాటు ఇంట్లో బల్లుల హల్ చల్ కూడా మొదలవుతుంది. కిటికీలు, గోడలు, చివరకు వంటగదిలో కూడా బల్లులు కనిపిస్తూ అసహ్యం కలిగిస్తాయి. వీటిని తరిమికొట్టడానికి మార్కెట్లో దొరికే రసాయనాలు వాడినా అవి మళ్లీ మళ్లీ వస్తూనే ఉంటాయి. అయితే మన ఇంట్లో ఉండే పవిత్రమైన తులసి మొక్కతో బల్లులకు చెక్ పెట్టవచ్చని మీకు తెలుసా..? రసాయనాల అవసరం లేకుండా, తులసి మొక్కను ఉపయోగించి బల్లులను ఎలా తరిమికొట్టవచ్చో ఇప్పుడు తెలుసుకుందాం.
బల్లులకు తులసి ఎందుకు శత్రువు..?
తులసిని మనం పవిత్రంగా పూజిస్తాం. అయితే శాస్త్రీయంగా చూస్తే తులసి ఆకుల్లో యూజినాల్ అనే శక్తివంతమైన సుగంధ తైలం ఉంటుంది. దీని నుంచి వచ్చే ఘాటైన వాసన మానవులకు ప్రశాంతతను ఇస్తుంది కానీ బల్లులు, దోమలు, ఈగలకు మాత్రం అది ఒక విషవాయువులా అనిపిస్తుంది. ఈ వాసన తగలగానే బల్లుల నాడీ వ్యవస్థ స్తంభించిపోతుంది, అందుకే అవి ఆ పరిసరాల నుండి త్వరగా పారిపోతాయి.
తులసిని ఉపయోగించి బల్లులను తరిమికొట్టే 5 మార్గాలు
ద్వారబంధాల వద్ద తులసి కోట:
బల్లులు సాధారణంగా కిటికీలు, వెంటిలేటర్లు లేదా తలుపుల సందుల నుండి వస్తాయి. మీ ఇంటి కిటికీల దగ్గర లేదా ప్రధాన ద్వారం పక్కన చిన్న తులసి కుండీలను ఉంచండి. ఆ వాసన గోడల వెంట ప్రవహించి బల్లులు లోపలికి రాకుండా లక్ష్మణ రేఖలా పనిచేస్తుంది.
తులసి ఆకుల పొట్లాలు
వంటగదిలో లేదా అల్మారాల్లో మొక్కలు ఉంచడం కుదరదు కాబట్టి కొన్ని పచ్చి తులసి ఆకులను తీసుకుని చిన్న పలచని వస్త్రంలో కట్టి మూలల్లో ఉంచండి. రెండు రోజులకు ఒకసారి ఆకులను మారుస్తూ ఉండండి.
పవర్ఫుల్ తులసి హోమ్ మేడ్ స్ప్రే
ఒక పిడికెడు తులసి ఆకులను నీటిలో వేసి బాగా మరిగించండి. నీరు సగం అయ్యే వరకు మరిగించి, ఆ రసాన్ని వడకట్టండి. అందులో కొద్దిగా వెనిగర్ లేదా నిమ్మరసం కలిపి స్ప్రే బాటిల్లో నింపండి. దీన్ని గోడల మూలల్లో, లైట్ల వెనుక స్ప్రే చేస్తే ఒక్క బల్లి కూడా అటువైపు రాదు.
తులసి-వెల్లుల్లి మిశ్రమం
తులసి ఆకులతో పాటు వెల్లుల్లి రెబ్బలను కలిపి పేస్ట్ చేసి, ఆ నీటిని స్ప్రే చేయడం వల్ల ఫలితం రెట్టింపు అవుతుంది. వెల్లుల్లిలోని అల్లిసిన్, తులసిలోని యూజినాల్ కలిసి బల్లులను ఇంటి నుండి తరిమికొట్టడంలో అద్భుతంగా పనిచేస్తాయి.
ఎండిన తులసి కొమ్మలు
తులసి మంజరి లేదా ఎండిన కొమ్మలను కూడా పారవేయకుండా గదుల మూలల్లో ఉంచవచ్చు. వీటి నుంచి వచ్చే ఎండు వాసన కూడా కీటకాలను దరిచేరనీయదు.
మరిన్ని ఇంటి చిట్కాలు
తులసితో పాటు ఇవి కూడా పాటిస్తే మీ ఇల్లు బల్లుల రహితం అవుతుంది.
కాఫీ పొడి – పొగాకు: కాఫీ పొడిని పొగాకుతో కలిపి చిన్న చిన్న ఉండలుగా చేసి బల్లులు తిరిగే చోట ఉంచండి. ఇది వాటికి ప్రాణాంతకం.
ఐస్ కోల్డ్ వాటర్: బల్లిపై ఒక్కసారిగా చల్లటి నీటిని చల్లితే, అది షాక్కు గురై కొద్దిసేపు కదలకుండా ఉండిపోతుంది. అప్పుడు దాన్ని సులభంగా బయట పడేయవచ్చు.
నెమలి ఈకలు: బల్లులకు నెమలి అంటే భయం. అందుకే కిటికీల దగ్గర నెమలి ఈకలను అమర్చడం వల్ల అవి రావు.