
మన వంటింట్లో ప్రతిరోజూ తప్పనిసరిగా వాడే కూరగాయలలో ఉల్లిపాయలు మొదటి స్థానంలో ఉంటాయి. కూరల నుంచి పచ్చి సలాడ్ల వరకు ఉల్లిపాయ లేనిదే రుచి రాదు. ఇవి జీర్ణక్రియను మెరుగుపరచడంతో పాటు ఆరోగ్యానికి ఎంతో మేలు చేస్తాయి. అయితే మనం తరచుగా ఉల్లిపాయల తొక్క ఒలిచినప్పుడు వాటిపై నల్లటి పొడి లాంటి మచ్చలను గమనిస్తుంటాం. చాలామంది వీటిని సాధారణ మట్టి మచ్చలుగా భావించి, పైపొరను తీసేసి లేదా నీటితో కడిగేసి వంటల్లో వాడేస్తుంటారు. కానీ, ఇలా చేయడం ఆరోగ్యానికి తీవ్ర హాని కలిగిస్తుందని ఆరోగ్య నిపుణులు హెచ్చరిస్తున్నారు.
ఉల్లిపాయలపై కనిపించే ఈ నల్లటి మచ్చలు సాధారణ మురికి కాదు.. అది ఒక రకమైన బూజు. సాధారణంగా మట్టిలో ఉండే ఆస్పెర్గిల్లస్ నైగర్ అనే శిలీంధ్రం వల్ల ఉల్లిపాయలపై ఈ నల్లటి మచ్చలు ఏర్పడతాయి. ఉల్లిపాయలు మట్టిలో పెరుగుతాయి కాబట్టి తేమ, సరిగ్గా నిల్వ చేయకపోవడం వల్ల ఈ ఫంగస్ వాటిపై వేగంగా వృద్ధి చెందుతుంది.
ఈ శిలీంధ్రం అందరికీ తీవ్రమైన ప్రాణాపాయం కలిగించకపోయినా, కొన్ని వర్గాల వారికి మాత్రం ప్రమాదకరంగా మారవచ్చు.
ఆస్తమా – శ్వాసకోశ సమస్యలు ఉన్నవారు: బూజుకు సంబంధించిన సూక్ష్మ కణాలు గాలి ద్వారా శ్వాసలోకి ప్రవేశించి శ్వాసకోశ అలెర్జీలను, ఆస్తమా లక్షణాలను తీవ్రతరం చేస్తాయి.
రోగనిరోధక శక్తి తక్కువగా ఉన్నవారు: ఇమ్యూనిటీ బలహీనంగా ఉన్నవారు, షుగర్ లేదా ఇతర దీర్ఘకాలిక అనారోగ్యాలతో బాధపడేవారు ఆహార పరిశుభ్రత విషయంలో చాలా అప్రమత్తంగా ఉండాలి. వీరు బూజు పట్టిన ఉల్లిపాయలను తింటే ఇన్ఫెక్షన్లు వచ్చే అవకాశం ఉంది.
ఉల్లిపాయపై నల్లటి మచ్చలు కేవలం పై పొట్టుపై మాత్రమే ఉంటే, ఆ పొరను పూర్తిగా తీసివేసి, ఉల్లిపాయను శుభ్రంగా కడిగి లోపలి భాగాన్ని నిశితంగా పరిశీలించాలి. ఒకవేళ నల్లటి మచ్చలు లోపలి పొరలపై కూడా వ్యాపించి ఉంటే, ఆ ఉల్లిపాయను అస్సలు తినకూడదు. కేవలం మచ్చ ఉన్న భాగాన్ని కట్ చేసి మిగిలినది వాడటం కూడా సురక్షితం కాదు. ఉల్లిపాయ మెత్తగా మారినా, కుళ్లినట్లు అనిపించినా, లేదా ఏదైనా అసాధారణ వాసన వస్తున్నా వెంటనే పారవేయడమే ఉత్తమం.
ఉల్లిపాయలను ఎప్పుడూ తేమ లేని, పొడిగా మరియు గాలి బాగా తగిలే ప్రదేశంలో నిల్వ చేయాలి. వీటిని ఎట్టి పరిస్థితుల్లోనూ బంగాళాదుంపలతో కలిపి ఉంచకూడదు. బంగాళాదుంపల నుంచి విడుదలయ్యే తేమ, వాయువుల వల్ల ఉల్లిపాయలు త్వరగా కుళ్లిపోయి బూజు పట్టే అవకాశం ఉంటుంది. సగం కోసిన ఉల్లిపాయలను బయట గాలికి వదిలేయకుండా, గాలి చొరబడని డబ్బాలో పెట్టి ఫ్రిజ్లో నిల్వ చేసుకోవాలి.