Potato Pickle Recipe: మామిడికాయ, నిమ్మకాయ కాదు.. ఆలుగడ్డలతో అదిరిపోయే ఊరగాయ ఇలా చేయండి!
సాధారణంగా ఊరగాయ అంటే మనకు ముందుగా మామిడికాయ, నిమ్మకాయ, ఉసిరికాయ, టమాటా వంటి వాటే గుర్తుకొస్తాయి. కానీ ఆలుగడ్డలతో కూడా ఎంతో రుచికరమైన ఊరగాయను తయారు చేసుకోవచ్చని మీకు తెలుసా? ఇంట్లో అందుబాటులో ఉండే కొన్ని సింపుల్ పదార్థాలతోనే ఈ వెరైటీ ఊరగాయను సిద్ధం చేసుకోవచ్చు. అన్నం, పెరుగు అన్నం, పప్పు అన్నంతో పాటు దీనిని తింటే రుచి మరింత పెరుగుతుంది.
ఆలుగడ్డలతో ఎప్పుడూ కూరలు, ఫ్రైలు మాత్రమే కాకుండా ఈసారి కొత్తగా ఊరగాయను తయారు చేసి చూడండి. ఎక్కువ సమయం తీసుకోకుండా సులభంగా తయారు చేసుకునే ఈ రెసిపీ స్పైసీగా, పుల్లగా, కొద్దిగా తీపి రుచితో అదిరిపోతుంది. మరి ఆలుగడ్డలతో ఈ టేస్టీ ఊరగాయను ఎలా తయారు చేసుకోవాలి? కావాల్సిన పదార్థాలు ఏమిటో ఇప్పుడు చూద్దాం.
కావాల్సిన పదార్థాలు
ఆలుగడ్డలు – 2
ఆవాల పేస్ట్ – 2 టేబుల్ స్పూన్లు
నిమ్మరసం – 2 టేబుల్ స్పూన్లు
కారం – 1½ టేబుల్ స్పూన్లు
మెంతులు – ½ టీస్పూన్
పసుపు – ½ టీస్పూన్
బెల్లం తురుము – 2 టేబుల్ స్పూన్లు
ఉప్పు – తగినంత
తాలింపు కోసం
నూనె – 2 టేబుల్ స్పూన్లు
ఆవాలు – ½ టీస్పూన్
ఇంగువ – ⅓ టీస్పూన్
తయారీ విధానం
ముందుగా ఆలుగడ్డలను తొక్క తీసి చిన్న ముక్కలుగా కట్ చేసుకోవాలి. వాటిని నీటితో శుభ్రంగా కడిగి పక్కన పెట్టుకోవాలి.
ఒక గిన్నెలో ఆవాల పేస్ట్, నిమ్మరసం, కారం, పసుపు, వేయించి పొడి చేసిన మెంతులు, బెల్లం తురుము, ఉప్పు వేసి బాగా కలపాలి.
తర్వాత పాన్లో నూనె వేడి చేసి ఆవాలు వేయాలి. అవి చిటపటలాడిన తర్వాత ఇంగువ వేసి స్టవ్ ఆఫ్ చేయాలి. ఈ తాలింపును మసాలా మిశ్రమంలో కలపాలి.
చివరగా ఆలుగడ్డ ముక్కలను మసాలాలో వేసి బాగా కలపాలి. ఆలుగడ్డ ముక్కలకు మసాలా మొత్తం పట్టేలా కలిపితే రుచికరమైన ఆలుగడ్డ ఊరగాయ సిద్ధమవుతుంది.