సింపుల్గా, టేస్టీగా సాంబార్ చేయడం ఎలా..? ఇదిగో సూపర్ రెసిపీ..
ఇంట్లో అందుబాటులో ఉండే పదార్థాలతోనే రుచికరమైన ఉల్లిపాయ–టమాటో సాంబార్ను సులభంగా తయారు చేసుకోవచ్చు. కందిపప్పు, ఉల్లిపాయ, టమాటా, చింతపండు, సాంబార్ పొడి, వెల్లుల్లి పోపుతో చేసే ఈ సాంబార్ ఇడ్లీ, దోశ, వేడి అన్నంతో ఎంతో రుచిగా ఉంటుంది. తక్కువ సమయంలో తయారయ్యే ఈ సింపుల్ సాంబార్ రెసిపీని ఇంట్లో తప్పక ప్రయత్నించండి.
భారతదేశంలో, ముఖ్యంగా దక్షిణాన, సాంబార్ ఒక సంప్రదాయ వంటకం. దీనిని ఉదయం అల్పాహారంతో పాటు, మధ్యాహ్నం భోజనంలోనూ ఆనందిస్తారు. అనేక రకాల సాంబార్ వంటకాలు ఉన్నప్పటికీ, ఈ రెసిపీలో ఉల్లిపాయ, టమాటోను మాత్రమే ఉపయోగించి, సులభమైన పద్ధతిలో రుచికరమైన సాంబార్ను ఎలా తయారు చేయాలో ఈ కథనంలో తెలుసుకుందాం… ఇది ఇంట్లో అందుబాటులో ఉండే పదార్థాలతో తక్కువ సమయంలోనే సిద్ధం చేసుకోవచ్చు.
కావాల్సిన పదార్థాలు:
- కందిపప్పు: 100 గ్రాములు
- టమాటాలు: 2 చిన్నవి (పప్పు ఉడికించడానికి), 2 చిన్నవి (తరిగినవి), 3 చిన్నవి (పొడవుగా కట్ చేసినవి)
- ఉల్లిపాయలు: 3 చిన్నవి (పొడవుగా కట్ చేసినవి)
- పచ్చిమిర్చి: 3
- చింతపండు: నిమ్మ సైజు (రసం తీయడానికి)
- ఉప్పు: రుచికి సరిపడా
- పసుపు: పావు టీ స్పూన్
- కారం: 1 స్పూన్
- కరివేపాకు: కొద్దిగా (మరిగించేటప్పుడు, పోపులో)
- బెల్లం ముక్క: చిన్నది (ఐచ్ఛికం)
- సాంబార్ పొడి: 1 స్పూన్
- కొత్తిమీర: కొద్దిగా (చివరగా వేయడానికి)
- నీరు: అవసరాన్ని బట్టి
పోపు కోసం:
- నెయ్యి లేదా నూనె: 1 టేబుల్ స్పూన్
- ఆవాలు: అర స్పూన్
- మినపప్పు: అర స్పూన్
- జీలకర్ర: అర స్పూన్
- వెల్లుల్లి రెబ్బలు: 7-8 (దంచి)
- ఎండుమిర్చి: 2
- ఇంగువ: కొద్దిగా
తయారీ విధానం:
పప్పు ఉడికించుకోవడం: ముందుగా 100 గ్రాముల కందిపప్పును రెండు మూడు సార్లు శుభ్రంగా కడగాలి. దానిలోకి రెండు చిన్న సైజు టమాటాలను పొడవుగా కట్ చేసి వేయాలి. పప్పు తీసుకున్న గ్లాస్ తో రెండు గ్లాసుల నీరు పోసి, కుక్కర్లో మూత పెట్టి మూడు నుండి నాలుగు విజిల్స్ వచ్చేంత వరకు ఉడికించాలి. పప్పు చల్లారిన తర్వాత, మూత తీసి మ్యాషర్తో లేదా పప్పు గుత్తితో మెత్తగా మెదుపుకోవాలి. కావాలంటే చల్లారిన తర్వాత మిక్సీ జార్లో కూడా గ్రైండ్ చేసుకోవచ్చు.
కూరగాయలు – మసాలాలు కలపడం: మెత్తగా మెదుపుకున్న పప్పులోకి పొడవుగా కట్ చేసిన మూడు చిన్న సైజు ఉల్లిపాయలు, మూడు పచ్చిమిర్చి, సన్నగా తరిగిన రెండు టమాటాలు వేయాలి. రుచికి సరిపడా ఉప్పు, పావు టీ స్పూన్ పసుపు, ఒక స్పూన్ కారం వేసి వీటన్నింటినీ బాగా కలుపుకోవాలి.
ఉడికించడం: ఇప్పుడు దీనిలోకి అర కప్పు నీరు పోసి, మూత కొద్దిగా క్రాస్గా పెట్టి కొద్దిసేపు ఉడికించాలి. ఉల్లిపాయలు, టమాటాలు సాఫ్ట్గా ఉడికిన తర్వాత, నిమ్మ సైజు చింతపండును నానబెట్టి తీసిన రసాన్ని సాంబార్లోకి కలపాలి. మీ రుచికి తగ్గట్టు పులుపును అడ్జస్ట్ చేసుకోవచ్చు.
నీరు – సుగంధ ద్రవ్యాలు: తర్వాత ఒకటిన్నర కప్పుల వరకు నీరు వేయాలి. సాంబార్ చిక్కదనాన్ని బట్టి నీటిని సర్దుబాటు చేసుకోవచ్చు. కొద్దిగా కరివేపాకు కూడా వేయాలి. కరివేపాకును ఇలా మరిగేటప్పుడు వేయడం వలన మంచి సువాసన వస్తుంది. రుచి చూసి ఉప్పు సరిపోకపోతే మరికొంత వేసుకోవచ్చు. చిన్న బెల్లం ముక్క (ఐచ్ఛికం), ఒక స్పూన్ సాంబార్ పొడి వేసి బాగా కలుపుకోవాలి. సాంబార్ కొద్దిసేపు బాగా మరిగిన తర్వాత చివరగా కొద్దిగా కొత్తిమీర వేసి కలిపి, స్టవ్ ఆపి పక్కన పెట్టుకోవాలి.
పోపు తయారీ: స్టవ్ మీద చిన్న పాన్ పెట్టి, ఒక టేబుల్ స్పూన్ నెయ్యి లేదా నూనె వేయాలి. నూనె వేడి అయిన తర్వాత అర స్పూన్ ఆవాలు, అర స్పూన్ మినపప్పు, అర స్పూన్ జీలకర్ర వేసి ఫ్రై చేయాలి. అవి చిటపటలాడిన తర్వాత ఏడెనిమిది వెల్లుల్లి రెబ్బలు, రెండు ఎండుమిర్చి, కొద్దిగా కరివేపాకు, కొద్దిగా ఇంగువ వేసి దోరగా వేయించాలి. ఈ పోపు మొత్తం బాగా ఫ్రై అయిన తర్వాత, దానిని ముందుగా సిద్ధం చేసుకున్న సాంబార్లోకి కలపాలి.
పోపు సాంబార్లో బాగా కలిసేలా ఒకసారి మిక్స్ చేస్తే, ఎంతో రుచికరమైన సాంబార్ సిద్ధం. దీనిని వేడి వేడి అన్నంతో పాటు లేదా ఇడ్లీతో కలిపి తింటే చాలా బాగుంటుంది. ఇంకెందుకు ఆలస్యం.. ఈ సులభమైన రెసిపీని ఇంట్లో ప్రయత్నించి చూడండి.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..