వర్షంలో తడిస్తే జుట్టు రాలిపోతుందా..? అసలు నిజాలు తెలిస్తే నోరెళ్లబెడతారు..
వర్షంలో తడిస్తే ఊడిపోతుందని మనలో చాలా మంది నమ్ముతుంటారు. కానీ ఇందులో నిజమెంత? నిపుణుల ప్రకారం.. జుట్టు రాలడానికి వర్షపు నీరు నేరుగా కారణం కాదు. వానలో తడిసిన తర్వాత మనం చేసే కొన్ని చిన్న చిన్న తప్పులు, సరైన సంరక్షణ తీసుకోకపోవడమే దీనికి ప్రధాన కారణం. ఆ విషయాలు ఈ స్టోరీలో తెలుసుకుందాం..
Updated on: Jul 20, 2026 | 8:42 PM
వర్షాకాలంలో చాలా మందిని వేధించే ప్రధాన సమస్య జుట్టు రాలడం. వర్షంలో తడవడం వల్లే జుట్టు ఎక్కువగా రాలిపోతుందని, వర్షపు నీరు జుట్టును బలహీనపరుస్తుందని చాలా మంది నమ్ముతుంటారు. కానీ నిపుణుల అభిప్రాయం ప్రకారం.. వర్షపు నీరు నేరుగా జుట్టు రాలడానికి కారణం కాదు. దానికి బదులుగా, వర్షంలో తడిచిన తర్వాత జుట్టును సరిగ్గా సంరక్షించుకోకపోవడమే దీనికి ప్రధాన కారణం. వర్షపు నీరు, వాతావరణంలోని తేమ, కాలుష్యం మిశ్రమం తల చర్మం, జుట్టు ఆరోగ్యంపై తీవ్ర ప్రభావం చూపుతాయి. ఈ వర్షాకాలంలో మీ జుట్టును సురక్షితంగా ఉంచుకోవడానికి నిపుణులు చెబుతున్న నిజాలు ఏంటో తెలుసుకుందాం..
జుట్టు రాలడానికి వర్షపు నీరు నేరుగా కారణం కాదు..
క్యాపిల్లరీ హాస్పిటల్ నిపుణుల ప్రకారం.. వర్షపు నీరు నేరుగా జుట్టును రాల్చదు. అయితే వర్షంలో తడిచిన తర్వాత గాలిలో ఉండే అధిక తేమ కారణంగా జుట్టు చాలాసేపు తడిగా ఉండిపోతుంది. ఇలాంటి సమయంలో బయట ఉండే దుమ్ము, ధూళి, కాలుష్య కణాలు తల చర్మానికి సులభంగా అంటుకుంటాయి. ఈ పరిస్థితి జుట్టు ఆరోగ్యంపై ప్రతికూల ప్రభావాన్ని చూపి, కుదుళ్లను బలహీనపరుస్తుంది.
సిటీల్లో కురిసే వర్షపు నీరు ప్రమాదకరమా?
ప్రముఖ చర్మవ్యాధి నిపుణురాలు డాక్టర్ సురుచి పూరి ప్రకారం.. ముఖ్యంగా పట్టణ ప్రాంతాల్లో కురిసే వర్షపు నీరు పూర్తిగా స్వచ్ఛమైనది కాదు. ఇది పారిశ్రామిక పొగలు, వాహన కాలుష్యం, వాతావరణంలోని రసాయనాలను గ్రహించి, కాస్త ఆమ్లంగా మారుతుంది. ఇటువంటి యాసిడ్ నీరు తల చర్మం pH సమతుల్యతను దెబ్బతీస్తుంది. ఫలితంగా తలపై దురద, తీవ్రమైన చుండ్రు, ఇన్ఫెక్షన్లు మరియు జుట్టు రాలడం వంటి సమస్యలు ఎదురవుతాయి.
ఫంగల్ ఇన్ఫెక్షన్ల ముప్పు
వర్షాకాలంలో గాలిలో తేమ ఎక్కువగా ఉండటం వల్ల తల చర్మం ఎక్కువ సేపు ఆరదు. ఈ తేమ శిలీంధ్రాలు, బ్యాక్టీరియా పెరగడానికి అనుకూలమైన వాతావరణాన్ని సృష్టిస్తుంది. జుట్టు ఎక్కువ సేపు తడిగా ఉంటే, ఫంగల్ ఇన్ఫెక్షన్ల ప్రమాదం పెరుగుతుంది. ఇది జుట్టు కుదుళ్లను లోపలి నుండి బలహీనపరిచి, జుట్టు విపరీతంగా రాలడానికి కారణమవుతుంది. అంతేకాకుండా తడి జుట్టు చాలా సున్నితంగా ఉంటుంది కాబట్టి, దానిని గట్టిగా కట్టడం లేదా బలంగా దువ్వడం వల్ల కూడా జుట్టు విరిగిపోతుంది.
వర్షంలో తడిచిన తర్వాత జుట్టు రక్షణకు సింపుల్ చిట్కాలు..
హెయిర్ వాష్ : మీరు వర్షంలో తడిసి ఇంటికి రాగానే మొదటగా చేయాల్సిన పని జుట్టును శుభ్రమైన నీటితో క్షుణ్ణంగా కడగడం. దీనివల్ల వర్షపు నీటిలోని దుమ్ము, కాలుష్యం, ఆమ్ల పదార్థాలు తొలగిపోతాయి. ఆ తర్వాత సల్ఫేట్ లేని తేలికపాటి షాంపూతో తలస్నానం చేయడం ఉత్తమం.
పొడిగా ఉంచుకోండి: జుట్టును ఎక్కువ సేపు తడిగా ఉంచకూడదు. తలస్నానం చేసిన తర్వాత మెత్తని టవల్తో తల చర్మాన్ని అద్ది ఆరబెట్టండి.
ముందస్తు రక్షణ: వీలైనంత వరకు బయటకు వెళ్ళేటప్పుడు గొడుగు లేదా టోపీని ఉపయోగించడం మంచిది. అలాగే బయటకు వెళ్ళే ముందు లీవ్ ఇన్ కండిషనర్ లేదా హెయిర్ సీరమ్ అప్లై చేయడం వల్ల, అది జుట్టుపై ఒక రక్షణ పొరను ఏర్పరచి, కాలుష్యం నేరుగా జుట్టులోకి ప్రవేశించకుండా నిరోధిస్తుంది.
మొత్తమ్మీద జుట్టు రాలడానికి వర్షపు నీరు మాత్రమే కారణం కాదు, మన నిర్లక్ష్యమే ప్రధాన కారణం. వర్షంలో తడిచిన తర్వాత సరైన జుట్టు సంరక్షణ తీసుకోకపోతే చుండ్రు, ఫంగల్ ఇన్ఫెక్షన్లు రావడం ఖాయం.
