విహారయాత్రలో వింత పోకడ.. ప్రాణాలు బలిగొంటున్న ‘ఆల్పైన్ డివోర్స్’ గురించి తెలుసా?
ప్రస్తుత డేటింగ్ ప్రపంచంలో సంబంధాలు ఏర్పడటం ఎంత వేగంగా జరుగుతుందో, విడిపోవడం కూడా అంతే వింతగా మారుతోంది. తాజాగా సోషల్ మీడియాలో ట్రెండ్ అవుతున్న ఒక పదం వింటే ఒళ్లు గగుర్పొడుస్తుంది. అదే 'ఆల్పైన్ డివోర్స్'. ఇది వినడానికి ఏదో హాలీవుడ్ థ్రిల్లర్ సినిమా పేరులా అనిపించినా, దీని వెనుక ఉన్న క్రూరమైన భావన తెలిస్తే ఎవరైనా సరే ఆశ్చర్యంతో పాటు తీవ్ర భయాందోళనలకు గురవ్వాల్సిందే.
ఆల్పైన్ డివోర్స్ అంటే.. భాగస్వామిని ఎంతో ప్రేమగా కొండ ప్రాంతాలకు విహారయాత్రకు తీసుకెళ్లి, అక్కడ వారిని ఒంటరిగా వదిలేసి వెళ్ళిపోవడం. ఇది కేవలం సంబంధాన్ని తెంచుకోవడమే కాదు, గడ్డకట్టే చలిలో, అడవి జంతువుల మధ్య ప్రాణాపాయంలోకి నెట్టడం. టిక్టాక్ వంటి వేదికలపై చాలా మంది మహిళలు తమకు ఎదురైన ఇలాంటి భయంకరమైన అనుభవాలను పంచుకోవడంతో ఈ విషయం ఇప్పుడు ప్రపంచవ్యాప్తంగా చర్చనీయాంశంగా మారింది.
ప్రాణాంతక ఘటనలు
సంబంధాన్ని గౌరవప్రదంగా ముగించే ధైర్యం లేని వారు ఇటువంటి మార్గాన్ని ఎంచుకుంటున్నారు. ఎదురుగా కూర్చుని “విడిపోదాం” అని చెప్పలేక, బాధ్యతల నుండి తప్పించుకోవడానికి భాగస్వామిని మారుమూల ప్రాంతాల్లో వదిలేయడం ఒక రకమైన శారీరక వేధింపు కిందకు వస్తుంది. చరిత్రను పరిశీలిస్తే, 1893లో రాబర్ట్ బార్ రాసిన ‘ది ఆల్పైన్ డివోర్స్’ అనే కథ నుండి ఈ పదం వచ్చింది. ఆ కథలో భర్త తన భార్యను చంపాలనే ఉద్దేశంతో కొండపైకి తీసుకెళ్తాడు.
నేటి కాలంలో కూడా ఇలాంటి ఘటనలు ప్రాణాలను బలిగొంటున్నాయి. ఫిబ్రవరి 2026లో ఆస్ట్రియాలో జరిగిన ఒక సంఘటనే దీనికి నిదర్శనం. థామస్ ప్లాంబెర్గర్ అనే వ్యక్తి తన గర్ల్ఫ్రెండ్ను పర్వతంపై గడ్డకట్టే చలిలో వదిలేయగా, ఆమె హైపోథెర్మియాతో మరణించింది. ఈ నేరానికి అతనికి జైలు శిక్ష కూడా పడింది. ఇటువంటి చర్యలు కమ్యూనికేషన్ లోపం మరియు మానసిక పరిపక్వత లేకపోవడం వల్లే జరుగుతున్నాయని నిపుణులు హెచ్చరిస్తున్నారు.
జాగ్రత్త తప్పనిసరి
మరికొందరు తమ భాగస్వామి కష్టకాలంలో ఎలా స్పందిస్తుందో పరీక్షించడానికి కావాలనే ఇటువంటి ‘టెస్టులు’ పెడుతున్నారు. ఇది క్రమంగా ప్రాణాంతకమైన వేధింపులకు దారితీస్తోంది. గ్రాండ్ కాన్యన్ వంటి ప్రదేశాల్లో ఒంటరిగా మిగిలిపోయిన మహిళలు అపరిచితుల సాయంతో ప్రాణాలు దక్కించుకున్న ఉదాహరణలు ఎన్నో ఉన్నాయి. ఈ భయంకరమైన ధోరణి వల్ల చాలా మంది మహిళలు ఇప్పుడు భాగస్వాములతో కలిసి వెళ్లడం కంటే, సోలో ట్రిప్స్ వెళ్లడమే సురక్షితమని భావిస్తున్నారు. ఏదైనా కొత్త సంబంధంలో ఉన్నప్పుడు లేదా సాహసయాత్రలకు వెళ్లే ముందు భాగస్వామి ప్రవర్తనను సరిగ్గా అంచనా వేయడం అవసరం. ప్రేమ పేరుతో ప్రాణాల మీదకు తెచ్చే ఇటువంటి వికృత పోకడల పట్ల అప్రమత్తంగా ఉండాలి.