ఆరోగ్యంగా ఉండాలంటే ఈ 8 సూత్రాలు పాటిస్తే చాలట.. గంటల తరబడి కష్టపడక్కర్లేదు

8 Simple Habits To Skyrocket Your Health.jpg

ఆరోగ్యంగా ఉండాలంటే రాత్రికి రాత్రే జిమ్‌లో గంటల తరబడి గడపక్కర్లేదు, ఖరీదైన డైట్ ప్లాన్‌లు పాటించక్కర్లేదు. హార్వర్డ్, స్టాన్‌ఫోర్డ్ విశ్వవిద్యాలయాల్లో శిక్షణ పొందిన ప్రముఖ గ్యాస్ట్రోఎంటరాలజిస్ట్ డాక్టర్ సౌరభ్ సేథి ప్రకారం.. మన దైనందిన జీవితంలో చేసుకునే చిన్న చిన్న మార్పులే మన ఆరోగ్యాన్ని ఆకాశానికి తీసుకెళ్తాయి. “పర్ఫెక్షన్ కంటే కన్సిస్టెన్సీ (స్థిరత్వం) ముఖ్యం” అని ఆయన చెబుతున్నారు. మరి మీ ఆరోగ్యాన్ని మెరుగుపరిచే ఆ 8 సూత్రాలు ఏంటో తెలుసుకుందాం.

• నిద్రలేవగానే సోషల్ మీడియా స్క్రోలింగ్ చేయడం వల్ల శరీరంలో ‘కార్టిసాల్’ (ఒత్తిడి హార్మోన్) స్థాయిలు పెరుగుతాయి. దీనికి బదులుగా కృతజ్ఞతా భావంతో రోజును ప్రారంభించండి. ఇది నాడీ వ్యవస్థను ప్రశాంతపరిచి, జీర్ణక్రియకు సహకరిస్తుంది.
• ఉదయాన్నే కనీసం 10 నిమిషాల పాటు ఎండలో గడపండి. ఇది మీ శరీర అంతర్గత గడియారాన్ని రీసెట్ చేస్తుంది, విటమిన్-డిని అందిస్తుంది మరియు మీ మూడ్‌ను మెరుగుపరుస్తుంది.
• భారీ భోజనం చేసిన తర్వాత చిన్నపాటి నడక జీర్ణక్రియకు ఎంతో మేలు చేస్తుంది. ఇది రక్తంలోని చక్కెర స్థాయిలను నియంత్రించడమే కాకుండా, తిన్న తర్వాత వచ్చే బద్ధకాన్ని వదిలిస్తుంది.
• పెరుగు, దహి, కిమ్చీ లేదా గంజి వంటి పదార్థాలను మీ డైట్‌లో చేర్చుకోండి. ఇవి సహజ సిద్ధమైన ప్రోబయోటిక్స్‌గా పనిచేసి మీ పేగుల్లోని మంచి బ్యాక్టీరియాను పెంచుతాయి. దీనివల్ల జీర్ణ సంబంధిత సమస్యలు దరిచేరవు.
• పసుపు, అల్లం, జీలకర్ర, సోంపు మరియు మిరియాలు కేవలం రుచి కోసం మాత్రమే కాదు.. ఇవి శరీరంలోని వాపును తగ్గించి, పేగు ఆరోగ్యాన్ని మెరుగుపరుస్తాయి.
• రాత్రి 8 గంటల నుండి ఉదయం 8 గంటల వరకు ఏమీ తినకుండా ఉండటం వల్ల మీ జీర్ణవ్యవస్థకు తగినంత విశ్రాంతి లభిస్తుంది. ఈ సమయంలో శరీరం తనను తాను రిపేర్ చేసుకుంటుంది.
• బ్లూబెర్రీస్, స్ట్రాబెర్రీస్ వంటి పండ్లలో యాంటీ ఆక్సిడెంట్లు పుష్కలంగా ఉంటాయి. ఇవి శరీరంలోని ఒత్తిడిని తగ్గించి, మెదడును చురుగ్గా ఉంచుతాయి. అయితే వీటిని తినే ముందు శుభ్రంగా కడగడం మర్చిపోవద్దు.
• ఒకరికి పని చేసిన డైట్ అందరికీ పని చేయదు. ప్రతి ఒక్కరి శరీరం, జీర్ణవ్యవస్థ వేరువేరుగా ఉంటాయి. కాబట్టి మీ శరీరానికి ఏది పడుతుందో గమనించి, దాని ప్రకారం ఆహారాన్ని ఎంచుకోవడం నేటి కాలంలో చాలా ముఖ్యం.